သျှမ်းပြည်မြောက်ပိုင်း နမ္မတူမြို့နယ်မန်စံကျေးရွာအနီး တိုက်ပွဲဖြစ်ပွါးသဖြင့် ဘုန်းကြီးကျောင်းသို့ စစ်ဘေးရှောင် ၄၀၀ ကျော်ရောက်ရှိနေကြောင်း သိရသည်။
နမ္မတူမြို့နယ် မန်စံအုပ်စုအတွင်း TNLA နှင့် RCSS/SSA တပ်များ ဒီဇင်ဘာလ ၃၁ ရက်ညပိုင်းနှင့် ဇန်နဝါရီလ ၁ ရက်နေ့မွန်းတည့်ချိန်ကတည်းက စပြီး ယနေ့ မွန်းတည့်ချိန်အထိတိုက်ပွဲများဖြစ်ပွါးခဲ့ခြင်းဖြစ်ကြောင်း၊ မန်စံအုပ်စုဝင် နားငူး၊ နားဟန်း၊ နောင်အော် ရွာသားများ မန်စံဘုန်းကြီးကျောင်းသို့ တိမ်းရှောင်နေကြရကြောင်း စစ်ဘေးရှောင်များအားကူညီမှုပေးနေသည့် လူငယ်တဦးပြောသည်။
နမ္မတူမြို့နယ် ပြည်သူ့လွှတ်တော်ကိုယ်စားလှယ် နန်းခမ်းအေးက – “နားငူး ၊ နားဟန်း၊ နောင်အော်၊ နားကျိုင်း ရွာက ရွာသားတွေ မနေ့က ၁၉၀ ကျော်ရောက်တယ်။ ဒီနေ့ကျတော့ ၂၀၀ ထပ်ရောက်လာတယ်။ မန်ဝါ ရွာသားတွေကတော့ မထွက်လာနိုင်သေးဘူး။၀န်ထမ်းတွေအပါအဝင်ပေါ့ အယောက် ၅၀ လောက်ရှိတယ်ပြောတယ်။ ကျမ အခု စစ်ဘေးရှောင်တွေဆီကိုထပ်သွားမလို့ ”- ဟု သျှမ်းသံတော်ဆင့်အားပြောသည်။
မန်ဝါရွာအနီးတွင်ဖြစ်ပွါးသော ပစ်ခတ်မှုမှာ ဇန်နဝါရီလ ၂ ရက်နေ့ မွန်းတည့်ချိန်အထိ မရပ်သေးသဖြင့် ရွာသားများ မထွက်လာနိုင်သေးကြောင်း ဆိုပါသည်။
နားကျိုင်းရွာတွင်မူ ရွာတွင်းသို့ လက်နက်ကြီးတလုံးကျကြောင်း၊ သို့သော် လူသူထိခိုက်သေဆုံးမှု တော့ မရှိခဲ့ကြောင်း စစ်ဘေးရှောင်များအား ကူညီမှုပေးနေသည့် လူငယ်ကပြောပြသည်။
“တချို့လည်း မထွက်လာနိုင်သေးဘူး။ တချို့လည်း မထွက်လာရဲတာရှိတယ်။ သူတို့ကိုကြိုဖို့လည်း အသင့်သွားစောင့်နေကြတာရှိပါတယ်။ ” – ဟု စစ်ဘေးရှောင်ကူညီရေးကော်မတီမှ စိုင်းဘဉာဏ် ကပြောသည်။
သျှမ်းပြည်နယ် မြောက်ပိုင်း နမ္မတူ မြို့နယ် အတွင်း တိုက်ပွဲများ မကြာခဏဖြစ်ပွားကာ ဒေသခံများ စစ်ဘေးရှောင်မှု ပြုလုပ်နေရသဖြင့် လယ်ယာ မစိုက်ပျိုးနိုင်ကြောင်း၊ အလုပ်အကိုင် ကောင်းမွန်စွာ မပြုလုပ်နိုင်သည့် အတွက် အခက်အခဲများစွာ ရင်ဆိုင်နေရကြောင်းလည်း ဒေသခံ က ပြောသည်။
သျှမ်းပြည်နယ် မြောက်ပိုင်း နမ္မတူ မြို့နယ် အတွင်း မြောက်ပိုင်း မဟာမိတ် တပ်ဖွဲ့ များ၊ မြန်မာ့တပ်မတော် ၊ သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) တို့လှုပ်ရှားပါသည်။ သို့သော် အစိုးရတပ်မတော်က ၂၀၁၈ ဒီဇင်ဘာလမှ ၂၀၁၉ မတ်လအထိ ၄ လ အတွင်း တဖက်သတ်အပစ်ရပ်ထားမည်ဟုကြေငြာချက်ထုတ်ထားပါသည်။
