သျှမ်းပြည်မြောက်ပိုင်းမှာ လက်နက်ကိုင်တပ်ဖွဲ့တွေ စစ်ရေးတင်းမာနေတဲ့အနေအထားကနေ ရွာသားတွေ ဖမ်းဆီးခေါ်ဆောင်သွားခြင်းခံရပါတယ်။

နို၀င်ဘာလ ၂၀ ရက်နေ့က ည ရ နာရီခန့်အချိန်မှာ လားရှိုးမြို့နယ် အီနိုင်းကျေးရွာအုပ်စု လူပျိုခေါင်းဆောင် စိုင်းမောင်ကို လက်နက်ကိုင်တပ်ဖွဲ့တဖွဲ့ကနေ ၀င်ရောက်ဖမ်းဆီးခေါ်ဆောင်သွားခဲ့ရာကနေ အဆက်အသွယ်မရတာကြောင့်ဆွေမျိုးမိဘတွေ စိုးရိမ်နေရကြောင်းသိရပါတယ်။

အီနိုင်းရွာသားတဦးကတော့ – စုံစမ်းမေးမြန်းဖို့ ဆိုပြီးလာခေါ်သွားတယ်။ ဘာအကြောင်းမေးမြန်းမှာလည်းမသိ။ သူပြန်လာမှဘဲသိရမှာပါ။ ပြန်လွှတ်လာမယ်လို့လည်း ပြောသွားပါတယ်– လို့ သျှမ်းသံတော်ဆင့်ကိုပြောပါတယ်။

အီနိုင်းအုပ်စုရဲ့ လူပျိုခေါင်းဆောင် ကိုဖမ်းဆီးသွားတာဟာ အီနိုင်းအုပ်စုမှာလှုပ်ရှားနေတဲ့ မြောက်ပိုင်းမဟာမိတ်တပ်ဖွဲ့ဝင်တွေရဲ့လက်ချက်ဖြစ်တယ်ဆိုပေမယ့် ဒီအကြောင်းနဲ့ပတ်သက်ပြီး မြောက်ပိုင်းမဟာမိတ်တပ်ဖွဲ့ဝင်တွေက အတည်ပြုတာမရှိသေးပါဘူး။

အီနိုင်းအုပ်စုဘက်မှာ အစိုးရတပ် ၊ မြောက်ပိုင်းမဟာမိတ်တပ်ဖွဲ့ဝင် TNLA နဲ့ SSPP/SSA တို့ပူးပေါင်းတပ်ဖွဲ့ အပြင် RCSS/SSA လည်းလှုပ်ရှားပါတယ်။

ပြီးခဲ့တဲ့ သီတင်းကျွတ်ချိန်တုန်းကလည်း စစ်ရေးတင်းမာနေကြချိန် အီနိုင်းအုပ်စုဒေသခံတဦး သတ်ဖြတ်ခံရတဲ့အပေါ် RCSS/SSA ရဲ့လက်ချက်လို့သတင်းတွေထွက်နေပေမယ့် ဒီကိစ္စနဲ့ပတ်သက်ပြီး RCSS/SSA ဘက်က ထုတ်ပြန်ထားတာ မရှိခဲ့ပါဘူး။

အီနိုင်းအုပ်စုဒေသခံတဦးကတော့ – ကျနော်တို့ရွာသားတွေကတော့ ဘယ်လက်နက်ကိုင်တပ်ဖွဲ့ကမဆို လာတောင်းရင် ပေးရတယ်။ ဖြတ်သန်းသွားလာရင်လည်းထောက်ပ့ံတယ်ကူညီပေးရပါတယ်။ အစိုးရတပ်အပါအဝင်ပါဘဲ။ဒါပေမယ့် ဘယ်လက်နက်ကိုင်တပ်ဖွဲ့မှ ကျနော်တို့ ရပ်ရွာကို လုံခြုံမှုမပေးတဲ့အပြင် ရွာသားတွေကို ဟိုဘက်ယိမ်းတယ် ဒီဘက်ယိုင်တယ် ဟိုဘက်အဖွဲ့အမာခံ ဒီဘက်အဖွဲ့အမာခံဆိုပြီးဖမ်းဆီးတယ်။ ကျနော်တို့ ရွာသားတွေအားလုံး ထိုင်းကိုဘဲထွက်ပြေးရအောင်လို့ ပြောနေကြတာ။– ဟု သျှမ်းသံတော်ဆင့်ကိုပြောပါတယ်။

နို၀င်ဘာလ ၂၀ ရက်နေ့ မနက်ပိုင်းကလည်း မြောက်ပိုင်းမဟာမိတ်တပ်ဖွဲ့ဝင်တွေနဲ့ RCSS/SSA တို့ နမ္မတူမြို့နယ် ကောင်းခါအုပ်စု နဲ့ ပန်လုံအုပ်စုကြား ပန်လုံရွာအနောက်ဘက် ၂ မိုင်လောက်အကွာမှာရှိတဲ့ လွယ်ဟန်းတောင်ကြောမှာ တိုက်ပွဲဖြစ်ခဲ့ပါတယ်။ တိုက်ပွဲကြောင့် ဘေးလွှတ်ရာကိုစစ်ဘေးတိမ်းရှောင်ခဲ့တာလည်းရှိခဲ့ပါတယ်။