သျှမ်းပြည် တောင်ကြီးခရိုင် ရွာငံမြို့နယ်မှ စစ်ကောင်စီ ဖမ်းဆီးခေါ်ဆောင်သွားသည့် အရပ်သားများ ယနေ့ အထိ အဆက်အသွယ်မရကြောင်း စုံစမ်းသိရသည်။

ပြီးခဲ့သည့် မတ်လ ၃၀ ရက်တွင် စစ်ကောင်စီမှ ဖမ်းဆီးသွားသည့် ရွာငံမြို့နယ် ကျောက်ဂူပြင်ကျေးရွာမှ အရပ်သား ၉ ဦးသည် ယနေ့ အထိ အဆက်အသွယ်မရကြသေး သဖြင့် မိဘ ဆွေမျိုး မိသားစုဝင်များက စိုးရိမ်နေကြကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“သူတို့က သုံးကောက်ဂျင် ကစားနေကြတာ၊ အိမ်မှာ အပျော်ဆော့နေကြသလိုမျိုးပေါ့နော်၊ အဲ့တာ ပျူစောထီးက သတင်းပေးလိုက်လို့ စစ်ကောင်စီက လာဖမ်းတာ၊ လာဖမ်းတဲ့ အချိန်မှာ တချို့က ရိုက်နှက်ခံရတယ်၊ အရိုက်ခံ ရတဲ့ တစ်ယောက် အခုဆေးရုံတင်ထားရတယ်၊ သူ့ကိုတော့ ဖမ်းမသွားဘူး” ဟု အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီ တပ်သား ၂၀ဦးခန့်သည် ဆိုင်ကယ် ၊ ကား တို့နှင့် ရောက်လာကြခြင်း ဖြစ်ပြီး သုံးကောင်ဂျင် ကစားနေကြသည့် အရပ်သားများကို ဝင်ရောက်ဖမ်းဆီးခဲ့သည်။ ထိုဝင်ရောက်ဖမ်းဆီးချိန်တွင်လည်း ရိုက်နှက် ကန်ကျောက်မှုများ လည်း ရှိသည့်အတွက် အမျိုးသား တစ်ဦးက ဒဏ်ရာရရှိခဲ့ပြီး လက်ရှိမှာ ဆေးရုံတင်နေရသော်လည်း စစ်ကောင်စီ ဘက်မှ လာရောက်ကြည့်ရှု၊ တာဝန်ယူပေးမှုလည်း မရှိကြောင်း သိရသည်။

လက်ရှိတွင်လည်း ဖမ်းဆီးခံရသူများ နှင့် ပတ်သက်ပြီး အဆက်အသွယ်မရသဖြင့် မိသားစုဝင်များက စိုးရိမ်နေကြကြောင်းလည်း အထက်ပါ ပုဂ္ဂိုလ်က ဆက်ပြောသည်။

“ရွာငံမှာ အချုပ်ခန်းကနေ ကလောအချုပ်ထောင်သို့ လွှဲပြောင်းမယ်လို့ပြောသွားတယ်၊ လာဖမ်းတဲ့ အချိန်မှာ ရှိတဲ့ ပိုက်ဆံတွေကိုလည်း သူတို့အကုန်ယူသွားတယ်၊ မိသားစုဝင်တွေကတော့ ဖမ်းခံရတဲ့သူတွေအတွက် အရမ်းစိတ်ပူ နေကြတယ်၊ ဘယ်ကို လိုက်ရမှန်း မသိကြဘူး ” ဟု အထက်ပါ ပုဂ္ဂိုလ်ကပြောပါသည်။

စစ်ကောင်စီ တပ်ဖွဲ့သည် ရွာငံမြို့နယ်ရှိ ကျေးရွာ တော်တော်များများတွင်လောင်းကစားဝိုင်း ဦးဆောင် ဖွင့်လှစ်နေပြီး ကျောက်ဂူပြင်ကျေးရွာက အရပ်သားပြည်သူများ နေအိမ်တွင်း ဆော့ကစားသည့် လောင်းကစားဝိုင်းကို ဝင်ရောက်စီးနင်း၍ ကစားဝိုင်းငွေကြေးများနှင့် အရပ်သားပြည်သူများကိုပါ ဖမ်းဆီးသွားခဲ့ခြင်းဖြစ်ကြောင်း သိရသည်။

ပြီးခဲ့သည့် မတ်လ ၂၅ ရက်တွင်လည်း စစ်အင်အား ၁၀၀ ဝန်းကျင်ရှိ စစ်ကောင်စီ တပ်ဖွဲ့သည် ရွာငံမြို့နယ်ရှိ အလယ်ချောင်ကျေးရွာ နှင့် ငှက်သောက်ရွာရှိ နေအိမ်များကို ဝင်ရောက်ရှာဖွေခြင်းများ ပြုလုပ်ပြီး တချို့အိမ်ကိုလည်း မီးရှို့ဖျက်ဆီးမှု ရှိခဲ့သည်။

၂၀၂၃ ခုနှစ် ဖေဖော်ဝါရီလ (၂၈) ရက်နေ့ထိ စစ်အာဏာသိမ်း ကာလအတွင်း စစ်ကောင်စီ နှင့် လက်အောက်ခံ အဖွဲ့အစည်းများ က မီးရှို့ဖျက်ဆီးမှုကြောင့် သျှမ်းပြည်မှ အရပ်သားပြည်သူ နေအိမ်ပေါင်း ၁၃၅ အိမ် ရှိနေပြီး ရွာငံမှ ၁၈ အိမ် ရှိနေကြောင်း Data for Myanmar က မတ်လ ၂၀ ရက်နေ့တွင် ထုတ်ပြန်ထားသည်။