သျှမ်းပြည်တောင်ပိုင်း၊ရွာငံမြို့နယ် မြင်းကျဒိုးကျေးရွာမှ ဓနုတိုင်းရင်းသား လူမျိုးများ ဒီမိုကရေစီပါတီ( DNDP) အဖွဲ့ဝင်တစ်ဦး နှင့် အရပ်သားတစ်ဦး ထပ်မံ အသတ်ခံရကြောင်း သတင်းရရှိသည်။

ဖြစ်စဉ်မှာ ယမန်နေ့ ဇူလိုင်လ (၁၄)ရက်ညဘက်တွင် ညောင်ပင်ခွ ကျေးရွာတွင် DNDP ဒုဥက္ကဌ ဦးစံတင့်နှင့် ဝက်ကုမ္ပဏီလုပ်ငန်း လုပ်ကိုင်သူ ဦးအောင်ဝင်းစိန်တို့ကို အမည်မသိ လက်နက်ကိုင် အဖွဲ့မှ လာရောက် ဖမ်းဆီးခေါ်ဆောင်သွားခဲ့ပြီး အသတ်ခံရကြောင်း ရွာငံဒေသခံများပြောပြချက်အရသိရသည်။

အဆိုပါ အသတ်ခံရသူမှာ အသက် (၄၀)ကျော် အရွယ် ရှိပြီဖြစ်ပြီး ဝက်ကုမ္ပဏီလုပ်ငန်း လုပ်ကိုင်သူ ဦးအောင်စိန်ဝင်းသည် ပျူစောထီး အဖွဲ့ဝင် တစ်ဦး ဖြစ်ကြောင်းနှင့် ဦးစံတင့်သည်လည်း စစ်တပ်နှင့် ပတ်သက်ဆက်နွယ်သူ ဖြစ်သောကြောင့် အသတ်ခံရခြင်း ဖြစ်နိုင်ကြောင်း ဒေသခံ အမျိုးသားတစ်ဦးက ပြောသည်။

“မနေ့ညတုန်းက သူတို့ ညောင်ပင်ခွဘက်ကို သွားရင်း ဖမ်းပြီး အသတ်ခံရတယ်လို့ သိရတယ်၊ ဒလန်လို့ ခေါင်းစဉ်တပ်ပြီး သတ်နေကြတော့ သူတို့လည်း စစ်တပ်နဲ့ လွတ်ကင်းတဲ့သူ မဟုတ်လို့ အသတ်ခံရတာ ဖြစ်နိုင်တယ်၊ တော်လှန်ရေးဘက်ကလည်း သူတို့ကို စာတွေပေးဖူးတယ်လို့လည်း သိရတယ်။”ဟု ဒေသခံ အမျိုးသားတစ်ဦးက ပြောသည်။

ထိုသို့ ဒေသခံနှစ်ဦး အသတ်ခံရသောကြောင့် ဒေသတွင်း သွားလာရေး ကန့်သတ်လာပြီး စစ်တပ်ဂိတ်များတွင်လည်း စစ်ဆေး တင်းကျပ်လာနိုင်သောကြောင့် သတိထား သွားလာစေလိုကြောင်း ၎င်းအမျိုးသားက ပြောသည်။

ထို့အပြင် မြင်းကျဒိုးရွာနှင့် ညောင်ပင်ခွ ကျေးရွာဘက်တွင် စစ်ကော်မရှင်တပ်များက တပ်စွဲနေရာချသည့် ဒေသဖြစ်သော်လည်း ဒေသတွင်း ဖမ်းဆီးသတ်ဖြတ်မှုများ မကြာခဏ ဖြစ်ပေါ်နေဆဲ ဖြစ်သည်။

“မြင်းကျဒိုးက စစ်တပ် အထိုင်ချတဲ့ နေရာဖြစ်တယ်၊ စစ်တပ်ရှိလည်း ပျူစောထီးတို့ အုပ်ချုပ်ရေးမှုးတို့ဆို ခဏခဏ အသတ်ခံရတယ်၊ သူတို့က ဂိတ်လုပ်ထားလည်း ပိုက်ဆံတောင်းဖို့ပဲ သိတာ နယ်မြေအေးချမ်း လုံခြုံအောင် ဘာမှ ကူညီပေးနိုင်တဲ့ တပ်လည်း မဟုတ်ဘူး၊ သူတို့ရှိလည်း ဘာမထူးဘူး အနေကျပ် အသွားကြပ်တာပဲရှိတယ်။”ဟု ရွာငံဒေသခံ အမျိုးသားတစ်ဦးက ပြောသည်။

လက်ရှိ အသတ်ခံရသော နှစ်ဦးအနက် ဦးအောင်ဝင်းစိန်သည် စစ်တပ်များအတွက် ကျေးရွာအတွင်း ကားများကို စာရင်းကောက်၍ အလှည့်ကျ ချောဆွဲပို့ပေးနေပြီး စစ်တပ်အတွက်ဟု ဆို၍ ငွေကြေးကောက်ခံမှုများလည်း ရှိကြောင်း အဆိုပါ အမျိုးသားက ပြောသည်။

ယခုလက်ရှိ ရွာငံမြို့နယ်တွင် အုပ်ချုပ်ရေးမှုးများ၊ ပျူစောထီးအဖွဲ့ဝင်များနှင့် အရပ်သားများ မကြာခဏ အသတ်ခံနေရပြီး မည်သည့် တပ်ဖွဲ့က လာရောက်သတ်ဖြတ်သွားသည်ကို အတိကျ မသိရှိရသော်လည်း ဒေသခံအများစုက PDF အဖွဲ့ ဖြစ်နိုင်ကြောင်း ထင်မြင်ကြသည်။

ပြီးခဲ့သည့် ၂၀၂၅ ခုနှစ် နိုဝင်ဘာလ ၂၉ ရက်တွင် ရွာငံမြို့နယ် မြင်းကျဒိုးကျေးရွာ၌ နေထိုင်သည့် အသက် ၆၀ ဝန်းကျင် ပျူစောထီးခေါင်းဆောင် ဦးဝင်းမြင့်နှင့် ၎င်း၏လက်အောက်ငယ်သား အမျိုးသားတစ်ဦးတို့ လိုက်ပါစီးနင်းလာသည့် အိမ်စီးကားကို ရွာငံ-အောင်ပန်း အမြန်လမ်းကြီး တစ်နေရာတွင် ဓနုပြည်နယ်အမျိုးသားလွတ်မြောက်ရေးတပ်ဖွဲ့ (DSNDA) က ပစ်ခတ်တိုက်ခိုက်ခဲ့ရာ ၂ ဦးလုံး သေဆုံးသွားခဲ့ကြောင်း သိရသည်။