သျှမ်းပြည်တောင်ပိုင်း၊ ရွာငံမြို့နယ် တပင်ပျော်ကျေးရွာမှ သက်ငယ်မုဒိမ်းကျူးလွန်သည့် အမျိုးသား နှစ်လကျော် ကြာသည်အထိ မဖမ်းမိသေးကြောင်း သတင်းရရှိသည်။

ပြီးခဲ့သည့် မေလ ဒုတိယပတ်တွင် ရွာငံမြို့နယ် တပင်ပျော်ကျေးရွာ၌ အသက်(၁၄)နှစ်အရွယ် မိန်းကလေးတစ်ဦးကို တစ်ရွာတည်းနေ အသက်(၄၀)ကျော်အရွယ် မောင်တူးဆိုသူက အဓမ္မပြုကျင့်ခဲ့သည်။

အဆိုပါ ဖြစ်စဉ်အပြီး တရားခံဖြစ်သူကို ဖမ်းဆီးစစ်ဆေးနေစဉ် မောင်တူးသည် ရွာငံဆေးရုံမှ လက်ထိတ်တန်းလန်းဖြင့် ထွက်ပြေးလွတ်မြောက်သွားခဲ့ပြီး နှစ်လကျော် ကြာသည်အထိ လွတ်မြောက်နေဆဲ ဖြစ်ကြောင်း သိရသည်။

“စစ်သားတွေက စစ်ကြောင်းတော့ နေ့တိုင်းရှိတယ်၊ တရားခံကို ရှာတာလား သူတို့ကိစ္စရှိလို့လားတော့ မသိဘူး၊ ဖမ်းဆီးဖို့ရော အစီစဉ်ရှိလားတောင် မသိဘူး၊ ကြာလာတော့ လူတွေက မေ့ပျောက်လာကြတယ်၊ ဘယ်သူမှ အရေးယူ ဆောင်ရွက်ပေးတာမျိုး မရှိဘူး၊ ဒီတိုင်း မေ့ပျောက်သွားမှာ စိုးရိမ်တယ်။”ဟု ရွာငံဒေသခံ အမျိုးသားတစ်ဦးက ပြောသည်။

စစ်ကော်မရှင်တပ်သားများက တပင်ပျော်ကျေးရွာနှင့် အနီးတဝိုက် ကျေးရွာများတွင် တပ်စွဲထားပြီး စစ်ကြောင်းထိုးမှုများ ခပ်စိပ်စိပ် လုပ်ဆောင်နေသောကြောင့် ဒေသခံများ ခြံမသွားရဲကြကြောင်း အဆိုပါ အမျိုးသားက ပြောသည်။

ထို့အပြင် တရားခံကို ဖမ်းဆီးနိုင်ခြင်း မရှိသေးသောကြောင့် ကျူးလွန်ခံရသူ မိသားစုဝင်နှင့် ဒေသခံများက စိတ်မချနိုင်သေးကြောင်းနှင့် တရားခံကို အမြန်ဆုံး ဖမ်းဆီးမှုများ အ‌လေးထား လုပ်ဆောင်ပေးစေလိုကြောင်း ဒေသခံ အမျိုးသမီးတစ်ဦးက တောင်းဆိုထားသည်။

“တရားခံက မမိသေးတော့ ရွာထဲမှာတောင် စိတ်ချ လက်ချမနေနိုင်သေးဘူး၊ ဘယ်ချိန်ပြန်လာပြီး ဒုက္ခပေးမလဲ စိုးရိမ်နေရတာ၊ ကျူးလွန်ခံရတဲ့ မိသားစုဝင်ဆို ပိုလို့တောင် စိတ်မချနိုင်သေးဘူး တစ်ခုခု ပြန်လာလုပ်မှာ စိုးရိမ်ရတယ်၊ဒီအမှုတောင် အလေးထား မဆောင်ရွက်ပေးနိုင်ရင် ဘယ်နား ယုံကြည်အားကိုးလို့ရတော့ မလဲ၊ စစ်တပ်ရှိလည်း ဘာမှမထူးဘူး ဆိုတာ ဖြစ်လာတယ်။”ဟု အဆိုပါ အမျိုးသမီးက ပြောသည်။

ရွာငံမြို့နယ်အတွင်း စစ်ကော်မရှင်တပ်က နယ်မြေစိုးမိုးထားပြီး ဒေသတွင်း လူသတ်မှုနှင့် ခိုးဆိုးလုယက်မှုနှင့် မုဒိမ်းမှု ကိစ္စများကို ဥပဒေအရ အရေးယူ ဆောင်ရွက်မှုများ မလုပ်ပေးသောကြောင့် ဒေသခံများ အနေဖြင့် စစ်ကော်မရှင်တပ်အပေါ် ယုံကြည်မှု ကင်းမဲ့နေကြောင်း ၎င်းအမျိုးသမီးက ဆက်ပြောသည်။

လက်ရှိရွာငံမြို့နယ်တွင် စစ်ကော်မရှင်တပ်က နယ်မြေစိုးမိုးထားသည့်အပြင် ကျေးရွာအတွင်းရှိ ပျူစောထီးခေါင်း‌ဆောင်များ ၊ စစ်ကော်မရှင်တပ် သတင်းပေးသူနှင့် ပုဂ္ဂိုလ်ရေးအရ မကျေနပ်သူများကို အမည်မသိလက်နက်ကိုင် အဖွဲ့က ပစ်ခတ်သတ်ဖြတ်မှုများ ပြုလုပ်နေကြောင်း သိရသည်။