သျှမ်းပြည်တောင်ပိုင်း ကျေးသီးမြို့နယ်အတွင်း နှစ်ပေါင်း ၂၀ ကျော်ကြာ သိမ်းဆည်းခံထားရသော လယ်ယာမြေဧက ၅၀၀၀ ကျော်အနက် လယ်ယာမြေများအား မြေတိုင်းဦးစီးဌာနနှင့်အတူ ကွင်းဆင်းတိုင်းတာနိုင်ရန် လယ်ယာပိုင်ရှင် နှင့် ရပ်ရွာအကြီးအကဲများ လွှတ်တော်ကိုယ်စားလှယ်များ တွေ့ဆုံဆွေးနွေးခဲ့ကြကြောင်းသိရသည်။

နို၀င်ဘာလ ၆ ရက်နေ့ မနက်ပိုင်းက ကျေးသီးမြို့ မိုင်းကောင်ဝ်အုပ်စု မိုင်းကောဝ် ဘုန်းကြီးကျောင်းတွင် သက်ဆိုင်ရာ အာဏာပိုင်များ နှင့်ဒေသခံလူထု ၂၀၀ ခန့်တွေ့ဆုံခဲ့ကြခြင်းဖြစ်သည်။

၁၉၉၆ ခုနှစ်ကတည်းက သိမ်းဆည်းခံရသော မြေဧက ၅၀၀၀ ကျော်အနက် ရွာမြေ၊ လယ်မြေ၊ စားကျက်မြေ၊ ထင်းစိုက်ခင်း၊ သာသနာမြေနှင့် အခြားမြေများအားကွင်းဆင်းတိုင်းတာကာ ပြန်လည်ရရှိရေးအတွက် လွှတ်တော်မှ တဆင့်ပြန်လည်တင်ပြတောင်းဆိုကြမည်ဖြစ်ကြောင်း လူထုကျေးသီးမြို့နယ် ကျားခေါင်းပါတီခေါ် သျှမ်းတိုင်းရင်း သားများဒီမိုကရေစီအဖွဲ့ချုပ် SNLD မှပြည်နယ်လွှတ်တော်ကိုယ်စားလှယ် စိုင်းစံမိန်း က သျှမ်းသံတော်ဆင့်အား ပြော သည်။

“ဒေသခံလူထုရဲ့သဘောထားတွေကိုမေးမြန်းတယ်။ ဆွေးနွေးတယ်။ ကွင်းဆင်းပြီး အသုံးပြုနေတဲ့မြေယာတွေ တိုင်း တာဖို့ သဘောတူခဲ့ကြတယ်။ ကျေးသီးမြို့မြေတိုင်းဦးစီးဌာနနဲ့ ကျနော်တို့ပေါင်းပြီး ၁၀ ရက်နေ့ ကျရင် စပြီးတော့ ကွင်းဆင်းတိုင်းတာစာရင်းယူပါမယ်။ မိုက်ဟုန်းလိန်ရွာ ၊ နောင်ဟီးရွာ၊ ဆူမ်မောန်းရွာ၊ မိုက်ဟုန်းချို ရွာတွေမှာ တရွာပြီး တရွာလုပ်သွားပါမယ်။ ဒေသခံလူထုဘက်ကနေလည်းဘဲ ကျနော်တို့နဲ့ လက်တွဲ ပူးပေါင်းပါ၀င် ဖို့တိုက်တွန်းပါတယ်။ ဒါမှ စာရင်းအမှန်အကန်ရရှိမှာဖြစ်တယ်။ ”- ဟု စိုင်းစံမိန်း ကပြောသည်။

ရရှိလာသောအချက်အလက်များအား မြေတိုင်းဦးစီးမှ အစီရင်ခံစာရေးသားကာ သက်ဆိုင်ရာသို့တင်ပြပြီးနောက် ပြည်သူ့လွှတ်တော်ကိုယ်စားလှယ်မှ လွှတ်တော်အတွင်း ဆက်လက်တင်ပြတောင်းဆိုသွားမည်ဖြစ်ကြောင်း စိုင်းစံမိန်းက ဆက်ပြောသည်။

ယနေ့ကျင်းပသော မြေယာဆိုင်ရာလူထုနှင့်တွေ့ဆုံပွဲသို့ ဌာနဆိုင်ရာဝန်ထမ်းများ မြို့နယ်အုပ်ချုပ်ရေး ပိုင်းမှ ကိုယ်စားလှယ်များ၊ မြေစာရင်းဦးစီးဌာန၊ စိုက်ပျိုးရေးဌာန၊ စီမံကိန်းဦးစီးဌာန၊ သစ်တောဦးစီးဌာန၊ စည်ပင်သာယာရေး ကော်မတီဥက္ကဌ၊ သိမ်းဆည်းလယ်ယာမြေနှင့်တခြားမြေများပြန်လည်စီစစ်ရေးကော်မတီ တို့မှ ကိုယ်စားလှယ်များ လည်းတက်ရောက်ကြောင်းသိရသည်။

လက်ရှိတွင် ကျောက်မီးသွေးတူးဖော်သည့်နေရာရှိ အဆောက်အအုံများအနီး လူထု၏ ဘိုးဘွားအစဉ်အဆက် လယ်ယာမြေများတွင်လည်း လွန်ခဲ့သည့်နှစ်များကတည်းက စိုက်ပျိုးလုပ်ကိုင်ခွင့်မပေးကြောင်း၊ထို့အတွက် ပြန် လည်လုပ်ကိုင်ခွင့်ရရေး လွှတ်တော်ကိုယ်စားလှယ်မှတဆင့်တောင်းဆိုသွားမည်ဖြစ်ကြောင်း ဆွေးနွေးပွဲ တက် ရောက်သူများကဆွေးနွေးခဲ့ကြောင်းသိရသည်။

ကျေးသီး မြို့နယ်အတွင်းရှိ လယ်ယာမြေဧက ၅၄၅၉ အား ကျေးသီးအခြေစိုက် ခလရ ၁၃၁ က လွန်ခဲ့သည့် ၁၉၉၆ က သိမ်းယူခဲ့ပြီး ၂၀၀၉ ခုနှစ်က ကျောက်မီးသွေး တူးဖော်ခွင့်ပြု ခဲ့သည်။ ၂၀၁၇ ခုနှစ် အဆိုပါတပ်တိုးချဲ့မြေ အား အသုံးပြုရန်မလိုအပ်တော့သဖြင့် နိုင်ငံတော်သို့လွဲပြောင်းပေးခဲ့သည်။ အဆိုပါလယ်ယာမြေများအား ကျောက်မီးသွေးတူးရန်အတွက် အမှတ် ၂ ပင်းပက်သံမဏိစက်ရုံအား လွဲပြောင်းထပ်မံလွဲပြောင်းပေးမည်ဟုဆိုသဖြင့် လူထုမှပြန်လည်တောင်းဆိုကြခြင်းဖြစ်သည်။