လယ်ယာမြေလုပ်ပိုင်ခွင့်ပြုလက်မှတ် ပုံစံ (၇) ရရှိထားသူများအနေဖြင့် ဥပဒေပါ ပြဋ္ဌာန်းချက်များကို လိုက်နာရန် ပျက်ကွက်လျှင် လယ်ယာမြေလုပ်ပိုင်ခွင့် ဆုံးရှုံးနိုင်ကြောင်းနှင့် လုပ်ငန်းစဉ်အဆင့်ဆင့်ကို ဥပဒေနှင့်အညီ ဆောင်ရွက်ရန် ဗဟိုလယ်ယာမြေစီမံခန့်ခွဲမှုအဖွဲ့က ယနေ့ (ဧပြီလ ၂၀ ရက်) တွင် ထုတ်ပြန်လိုက်သည်။

လယ်ယာမြေဥပဒေ ပုဒ်မ (၁၂) နှင့် (၁၃) အရ ပုံစံ (၇) ကိုင်ဆောင်သူများသည် မိမိတို့၏ လယ်ယာမြေကို စိုက်ပျိုးရေးအတွက်သာ အသုံးပြုရမည်ဖြစ်ပြီး သက်ဆိုင်ရာ မြေခွန်နှင့် အခွန်အခများကိုလည်း ပုံမှန်ပေးဆောင်ရန် တာဝန်ရှိကြောင်း ဖော်ပြထားသည်။

လယ်ယာမြေကို ရောင်းချခြင်း၊ ပေါင်နှံခြင်း၊ ငှားရမ်းခြင်း၊ လဲလှယ်ခြင်း သို့မဟုတ် ပေးကမ်းခြင်းများ ပြုလုပ်ရာတွင် တရားဝင်မှုရှိစေရန်အတွက် သတ်မှတ်ထားသော တံဆိပ်ခေါင်းခွန်နှင့် မှတ်ပုံတင်ခများ ပေးဆောင်ကာ သက်ဆိုင်ရာ မြို့နယ်ဦးစီးဌာနရုံးတွင် မဖြစ်မနေ မှတ်ပုံတင်ရမည်ဖြစ်သည်။

အလားတူ အမွေဆက်ခံခြင်းဖြင့် ရရှိလာသော လယ်ယာမြေများကိုလည်း သတ်မှတ်ချက်များနှင့်အညီ မှတ်ပုံတင်ရန် လိုအပ်ကြောင်း ပြဋ္ဌာန်းထားသည်။

လယ်ယာမြေကို ပေါင်နှံရာတွင်လည်း စိုက်ပျိုးထုတ်လုပ်မှုအတွက် အရင်းအနှီးရယူရန် ရည်ရွယ်ချက်ဖြင့်သာ ပေါင်နှံခွင့်ရှိပြီး အစိုးရဘဏ် သို့မဟုတ် အစိုးရက အသိအမှတ်ပြုထားသော ဘဏ်များတွင်သာ ဆောင်ရွက်ရမည်ဟု ကန့်သတ်ထားသည်။

မြေယာအသုံးချမှုနှင့် ပတ်သက်၍ ခွင့်ပြုချက်မရှိဘဲ အခြားနည်းလမ်းဖြင့် အသုံးပြုခြင်း (ဥပမာ – အဆောက်အဦးဆောက်လုပ်ခြင်း၊ မြေဖို့ခြင်း) နှင့် သီးနှံအမျိုးအစား ပြောင်းလဲစိုက်ပျိုးခြင်းများကို တားမြစ်ထားသည်။

ထို့ပြင် ခိုင်လုံသော အကြောင်းပြချက်မရှိဘဲ လယ်ယာမြေကို လှပ်ထားခြင်း မပြုရဘဲ လှပ်ထားရန် အကြောင်းပေါ်ပေါက်ပါက ကျေးရွာမှတစ်ဆင့် မြို့နယ်စီမံခန့်ခွဲမှုအဖွဲ့သို့ တင်ပြရမည်ဖြစ်ကာ ထိုသို့လှပ်ထားခြင်းသည် နှစ်နှစ်ဆက်တိုက်ထက် မပိုစေရဟု ဥပဒေတွင် ပြဋ္ဌာန်းထားသည်။

မြေယာအငြင်းပွားမှု ဖြစ်ပွားနေသည့် ကာလအတွင်း၌လည်း အဆိုပါမြေကို အရောင်းအဝယ်ပြုလုပ်ခြင်း သို့မဟုတ် လွှဲပြောင်းခြင်းများ မပြုလုပ်ရန် တားမြစ်ထားသည်။

လယ်ယာမြေစီမံခန့်ခွဲမှုအဖွဲ့ အဆင့်ဆင့်က ချမှတ်ထားသော အမိန့်နှင့် ညွှန်ကြားချက်များကို လိုက်နာရန် ပျက်ကွက်ပါက တည်ဆဲဥပဒေအရ အရေးယူခြင်းခံရနိုင်ကြောင်း သိရသည်။