သျှမ်းပြည်တောင်ပိုင်း တောင်ကြီးမြို့နယ် ပေါမူကျေးရွာတွင် ပအိုဝ်းပြည်သူ့စစ် (PNO) က ပြည်သူပိုင်မြေများကို အဓမ္မ သိမ်းယူပြီး အကွက်ရိုက်ကာ ပြန်လည်ရောင်းချနေကြောင်း ဒေသခံများ ပြောပြချက်အရ သိရသည်။

ပအိုဝ်းပြည်သူ့စစ PNO မှ ပေါမူဒေသခံများကို လျှပ်စစ်မီးနှင့် လမ်းဖောက်ပေးမည်ဟု ဆိုကာ ဒေသခံများ၏ မြေယာများကို ယမန်နှစ် (၂၀၂၃) ခုနှစ်ကတည်းက သိမ်းယူခဲ့ပြီး ခြံစည်းရိုးများ ခတ်ကာ ကန့်သတ်ထားခဲ့သည်။

ထိုသို့ သိမ်းယူပြီးနောက် လျှပ်စစ်မီးများ အမှန်တကယ် ရရှိသည့်အချိန်တွင်လည်း ဒေသခံများထံမှ ငွေကြေးများ ထပ်မံကောက်ခံကာ လျှပ်စစ်မီး သွယ်တန်းယူစေခဲ့ပြီး ပိုက်ဆံမထည့်နိုင်သည့် အိမ်များမှာ လျှပ်စစ်မီး မရရှိခဲ့ကြောင်း ပေါမူဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

“PNO အခုရောင်းနေတဲ့ မြေက ဒေသခံပိုင်တဲ့ မြေတွေပဲ။ သူတို့က လျှပ်စစ်မီးပေးမယ်ဆိုပြီး မြေတွေ သိမ်းသွားတာ။ လျှပ်စစ်မီးလည်းရရော ပိုက်ဆံ ၆ သိန်းပေးမှ မီးရမယ်တဲ့။ မြေတွေက မတရား သိမ်းခံရတယ်။ ခုဆို သူတို့ အကွက်ရိုက်ပြီး ရောင်းနေကြပြီ” ဟု ပေါမူဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယခုကာလတွင် မြေကွက်ရောင်းဝယ်မှု ပိုမို များပြားလာတာကြောင့် PNO မှ အကွက်ရိုက် ပြန်လည်ရောင်းချမှုများ ပြုလုပ်နေသည်ဟု သိရသည်။

PNO မှ သိမ်းဆည်းလိုက်သည့် မြေယာများသည် ဒေသခံများနှင့် နောင်မျိုးဆက်အတွက် တောင်ယာလုပ်ကိုင်စားသောက်ရန် ထားရှိထားသည့် မြေဖြစ်ပြီး ယခုကဲ့သို့ မြေဧက ထောင်နှင့်ချီ ဆုံးရှုံးခဲ့သောကြောင့် ရှေ့ဆက်လုပ်ကိုင် စားသောက်ရန် မြေယာရှားပါးလာကြောင်း ၎င်းအမျိုးသားက ထပ်လောင်းပြောကြားသည်။

ထို့အပြင် ပြည်သူများမှ မတရားခံရသည်ကို PNO ကို မပြောရဲဘဲ ခေါင်းငုံ့ခံနေရပြီး ဒေသခံများ လက်ရှိ လုပ်ကိုင်နေသော မြေယာများကိုပါ အကွက်ရိုက် ရောင်းချနေသည် ဟု သိရသည်။

“သူတို့က မြေတွေကို ခြံလာခတ်သွားတာ။ ပြောလည်း ဘာထူးမှာလဲ၊ သူတို့က လက်နက်ရှိတယ်လေ။ ဥပဒေလည်း သူတို့လက်ထဲမှာ ဆိုတော့ ခေါင်းငုံ့ခံနေရတယ်။ အခု သူတို့သိမ်းထားတဲ့ မြေကွက်ဘေးက လယ်ယာတွေကိုပါ ခြံခတ်ထားတယ်။ လာဝယ်တဲ့ သူလည်း ရှိတယ်”ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

တောင်ကြီးမြို့နယ် ပေါမူဒေသတွင် စိုက်ပျိုးရေးလုပ်ငန်းများဖြင့် အသက်မွေးဝမ်းကြောင်း ပြုနေရပြီး အဓိက စိုက်ပျိုးသည်မှာ ပြောင်းနှင့် ဆန်စပါး ဖြစ်သည်။

အလားတူ ဆီဆိုင်မြို့နယ်တွင်လည်း ပြီးခဲ့သည့် ၂၀၂၃ ခုနှစ်တွင် PNO မှ ဒေသခံ မြေယာများကို မတရား သိမ်းဆည်းခဲ့ခြင်းကြောင့် ဒေသခံများနှင့် ပြဿနာ ဖြစ်ပွားခဲ့ကြောင်း သိရသည်။

ထိုပြဿနာဖြစ်ပြီးနောက် PNO ကသာ လက်နက်အားကိုးဖြင့် အနိုင်ရရှိခဲ့ပြီး မြေယာဆုံးရှုံးရသည့် ဒေသခံများမှာ လျော်ကြေးအနည်းငယ်သာ ရရှိခဲ့ကြသည်။

ပြီးခဲ့သည့် စက်တင်ဘာလအတွင်း ပေါမူဒေသတွင် PNO စစ်သင်တန်းဆင်းပွဲကို အင်အားထောင်နှင့်ချီ ပြုလုပ်ခဲ့ပြီး တစ်အိမ်လျှင် ငွေကျပ် ၅သောင်း ကောက်ခံ၍ စစ်ယူနီဖောင်းများကို ကိုယ်တိုင်ဝယ်ယူကာ တက်ရောက်ခဲ့ရကြောင်း သိရသည်။

ထို့အပြင် လူငယ် အများစုမှာ စစ်မှုထမ်းခေါ်စာများကြောင့် မိမိနေရပ်ကို စွန့်ကာ နယ်ဝေးသို့ သွားရောက် အလုပ်လုပ်ကာ ရှောင်တိမ်းနေရကြောင်း သိရသည်။

အလုပ်သင် သတင်းထောက် နန်းလရောင် ရေးသားသည်။