လင်းခေးခရိုင်အတွင်း PNLO နဲ့ RCSS တို့ကြား တင်းမာမှုဖြစ်ပွါး

0

တနိုင်ငံလုံးပစ်ခတ်တိုက်ခိုက်မှုရပ်စဲရေးစာချုပ် NCA အတူတကွလက်မှတ်ရေးထိုးထားတဲ့ တိုင်းရင်းသား လက် နက်ကိုင်တပ်ဖွဲ့ ၂ ဖွဲ့ PNLO နဲ့ RCSS တို့ဟာ သျှမ်းပြည်တောင်ပိုင်း လင်းခေးခရိုင် မောက်မယ်မြို့နယ်မှာ ၂ ဖက်စစ်ရေးတင်းမာမှုတွေဖြစ်ပွါးနေပါတယ်။

Photo By Tai Freedom/ သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် တပ်သားများ

အောက်တိုဘာလဆန်းပိုင်းကတည်းကစပြီး သျှမ်းပြည်တောင်ပိုင်း မိုင်းပန်မြို့နယ် နဲ့ မောက်မယ်မြို့နယ် ထဲမှာ လှုပ်ရှားသွားလာနေတဲ့ ဒီ ၂ ဖွဲ့ဟာ စစ်ရေးတင်းမာနေခဲ့ကြတာဖြစ်ပါတယ်။

RCSS/SSA ရဲ့ ပြောခွင့်ရ ဒုတိယ ဗိုလ်မှူးကြီးစိုင်းဦးက – “ကျနော်တို့က အဲဒီဘက်ကို ကျူးကျော်လှုပ်ရှားတာ မဟုတ်ပါဘူး။ အဲဒီဒေသဟာ ဟိုးအရင်ကတည်းကဘဲ ကျနော်တို့လှုပ်ရှားခဲ့တဲ့ ဒေသဖြစ်ပါတယ်။ မိုင်းပန်မှာ ၂ ဖွဲ့ကြားတိုက်ပွဲဖြစ်ပွါးခဲ့တဲ့နောက်ပိုင်းကျနော်တို့ကို အင်အားတွေဖြည့် တင်းနေတယ်ဆိုပြီး ကျနော်တို့ကို ပြော ဆိုလာပါတယ်။ တကယ်တော့ ကျနော်တို့ယခင်ကတည်းက လှုပ်ရှားလာတဲ့ဒေသဖြစ်တယ်”- လို့ သျှမ်းသံတော်ဆင့်ကို ပြောပါတယ်။

PNLO ခေါင်းဆောင်ပိုင်းဖြစ်တဲ့ ခွန်မြင့်ထွန်းက – “ဒီဒေသမှာ ပြီးခဲ့တဲ့ ၂၀၁၇ ခုနှစ်တုန်း PNLO နဲ့ RCSS ကြား စစ်ရေး ပဋိပက္ခတွေဖြစ်ပွါးခဲ့ဖူးတယ်။ အဲဒီနောက်ပိုင်း RCSS ဘက်က စစ်အင်အားတိုးချဲ့ပြီးလှုပ်ရှားလာတော့ ဒေသခံလူထုကနေ တိုက်ပွဲဖြစ်ပွါးမှာကိုစိုးရိမ်နေကြတယ်။ တကယ်တော့ ကျနော်တို့ ၂ ဖွဲ့ဟာ အပစ်ရပ် လက်မှတ်ထိုးပြီးတဲ့အဖွဲ့တွေဖြစ်ပါတယ်။ ငြိမ်းချမ်းစွာတွေ့ဆုံပြီး ဖြေရှင်းလို့ရပါတယ် ”- လို့ RFA သတင်းဌာနကို ဖြေကြားထားပါတယ်။

ဆွေးနွေးရေးကိစ္စနဲ့ ပတ်သက်ပြီး မိမိတို့ဘက်မှ တစုံတရာမကြားသိရသေးကြောင်း ဗိုလ်မှူးကြီးစိုင်းဦးက ပြောပါတယ်။

ယခုလ ၁၆ ရက်နေ့ကလည်း PNLO နဲ့ RCSS တို့ မိုင်းပန်မြို့နယ် နားမွန်အုပ်စု မိုက်ပုတ်-ပန်ပိရွာမှာ တိုက်ပွဲဖြစ် ပွါးခဲ့ပါသေးတယ်။

“ပြသနာမဖြစ်ခင်က ပြသနာမဖြစ်အောင်ကျနော်တို့ရှောင်ခြင်းဟာ ပြသနာဖြစ်ပြီးမှ တွေ့ဆုံဆွေးနွေးဖြေရှင်းတာ ထက် ကောင်းပါတယ်။ ဒါပေမယ့် သူတို့ဘက်ကနေလဲ ဘာမှ ပြောမ လာသေးဘူး”- ဟု ဗိုလ်မှူးကြီးစိုင်းဦးကပြောပါတယ်။

NCA လက်မှတ်အတူတကွရေးထိုးခဲ့ကြတဲ့ PNLO နဲ့ RCSS တို့ဟာ အဲဒီဒေသဘက်မှာ ပြီးခဲ့တဲ့ ၂၀၁၄ ခုနှစ်တုန်းက နယ်မြေ ပြသနာ တကြိမ်ဖြစ်ပွါးခဲ့ပါတယ်။ အဲဒီတုန်းကတော့ PNLO ခေါင်းဆောင်ခွန်မြင့်ထွန်း နဲ့ RCSS/SSA ဘက်က ဗိုလ်ချုပ်ကြီးယွက်စစ် တို့တွေ့ဆုံဆွေးနွေးနိုင်ခဲ့ပြီးတော့ ပြသနာပြေလည်သွားခဲ့ပါတယ်။

Leave a Comments

LEAVE A REPLY

Please enter your comment!
Please enter your name here