တောင်ကြီးမြို့တွင် ရိုးရာတန်ဆောင်တိုင်ပွဲတော်ကို နို၀င်ဘာလ ၁၄ ရက်မှ ၂၃ ရက်နေ့အထိ ၁၀ ရက်တိုင်တိုင် ကျင်းပမည်ဖြစ်ကြောင်းသိရသည် ။
ပြီးခဲ့သည့် စက်တင်ဘာလက သျှမ်းပြည်နယ်တောင်ကြီးတန်ဆောင်တိုင်ပွဲတော် ကျင်းပရေးဆပ်ကော်မတီ အစည်းအဝေးမှ ထုတ်ပြန်ချက်အရ တန်ဆောင်တိုင်မီးပုံးပျံပွဲတော်ကို ၉ ရက်သာကျင်းပမည်ဆိုသည့်အပေါ် မီးပုံးပျံပညာရှင်များ ဒေသခံလူထုများ တောင်းဆိုမှုကြောင့် ယခင်နှစ်များအတိုင်း ၁၀ ရက်ပြန်လည်ကျင်း ပမည်ဖြစ်ကြောင်း အောက်တိုဘာ ၁၇ ရက်နေ့က ကြေငြာလိုက်သည်။
“ဒေသခံလူထုရဲ့မေတ္တာရပ်ခံချက်တွေ ၊ မီးပုံးပျံပညာရှင်တွေရဲ့တောင်းဆိုမှုကြောင့် သျှမ်းပြည်နယ်အစိုးရနဲ့ မီးပုံးပျံပွဲတော်ကျင်းပရေးကော်မတီကနေပြီး အောက်တိုဘာလ ၁၇ ရက်နေ့က အစည်းအဝေးထပ်မံကျင်းပပြီးတော့ ဒါ ၁၀ ရက်အကြာပွဲကျင်းပဖို့ပြန်ပြီး ဆုံးဖြတ်လိုက်ရတာဖြစ်ပါတယ်။”- ဟုလူမှုရေးဝန်ကြီးဒေါက်တာမျိုးထွန်းက သတင်းသမားများအားပြောဆိုသည် ။
နှစ်စဉ် ရိုးရာမပျက် ကျင်းပလျက်ရှိသော တောင်ကြီးတန်ဆောင်တိုင်ပွဲတော်ကို ယခုနှစ်တွင်လည်း အဝေရာမီးပုံးပျံကွင်းတွင် ပြုလုပ်ကျင်းပသွားမည်ဖြစ်ပြီး နေ့လွှတ် အရုပ် မီးပုံးပျံ၊ ညမီးကြီး၊ စိန်နားပန် မီးပုံးပျံ အမျိုးအစားများ ပြိုင်ပွဲဝင်လွှတ်တင်ကြမည်ဖြစ်ကြောင်း၊ အောက်တိုဘာလ ၂၃ ရက်နေ့တွင် ဆုပေးပွဲအခမ်းအနားကျင်းပမည်ဖြစ်ကြောင်းသိရသည်။
ယမန်နှစ်က တောင်ကြီးတန်ဆောင်တိုင်ပွဲတော်ကိုအောက်တိုဘာလ ၂၆ မှ နို၀င်ဘာလ ၄ ရက်နေ့အထိ ကျင်းပခဲ့ပြီး ပြိုင်ပွဲဝင် နေ့လွှတ် ညလွှတ် မီးပုံးပျံပေါင်း ၃၀၀ ကျော်ရှိကြောင်းသိရသည်။
Leave a Comments