သျှမ်းပြည်မြို့တော် တောင်ကြီးမြို့တွင် ကျင်းပနေသည့် တန်ဆောင်တိုင်ပွဲတော် ကာလအတွင်း ခါးပိုက်နှိုက်ခြင်းနှင့် ပစ္စည်းလုယက်ခံရသူများ ပိုမိုများပြားလာကြောင်း သတင်းရရှိသည်။
တောင်ကြီးတန်ဆောင်တိုင် ပွဲတော်ကို မူလက ပြီးခဲ့သည့် အောက်တိုဘာလ ၂၉ ရက်နေ့မှ နိုဝင်ဘာလ ၅ ရက်နေ့အထိ ကျင်းပရန် သတ်မှတ်ခဲ့သော်လည်း ရာသီဥတု အခြေအနေကြောင့် ပွဲတော်ရက်ကို နိုဝင်ဘာလ ၈ ရက်နေ့အထိ ထပ်တိုးသတ်မှတ်လိုက်သည်။
ပွဲတော် စတင်ကျင်းပခဲ့သည့် ၈ ရက်မြောက်နေ့အထိ အဆိုပါ ပွဲတော်ရက်အတွင်း ပိုက်ဆံအိတ်နှင့် ဖုန်းများ ခါးပိုက်နှိုက်ခံရသူ ၃၀ ဦးထက်မနည်း ရှိခဲ့ကြောင်း သိရသည်။
“ပိုက်ဆံအိတ်ကို လွယ်သွားတာ ဘယ်အချိန် အိတ်ဖောက်ပြီး ယူသွားလဲ မသိလိုက်ဘူး။ ငွေသား ၁၃ သိန်း ပါသွားတယ်။ လူကလည်း အရမ်းများတော့ ဒါကို အခွင့်ကောင်းယူပြီး လုပ်စားနေကြတာပါ။ ပွဲသွားရင် ပိုက်ဆံအများကြီး မယူသွားစေချင်ဘူး၊ တန်ဖိုးကြီး ပစ္စည်းလည်း မယူသွားစေချင်ဘူး”ဟု ကိုယ်တိုင် ကြုံတွေ့ခဲ့ရသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို့အပြင် ပွဲခင်းထဲတွင် ပျောက်ဆုံးသွားသော ဖုန်းကို ငွေကျပ် ၈ သိန်းဖြင့် ပြန်လည်ရွေးထုတ်ခဲ့ရကြောင်း၊ အချို့သော ဖုန်းပျောက်ဆုံးသူများမှာ ပြန်မရတော့ဘဲ အများစု ပျောက်ဆုံးသွားသော ဖုန်းများမှာ အိုင်ဖုန်း (iPhone) အမျိုးအစားများ ဖြစ်ကြောင်း ခရီးသွား အမျိုးသားတစ်ဦးက ပြောသည်။
တန်ဆောင်တိုင်ပွဲတော် လာရောက်လည်ပတ်သူများသည် ဆိုင်ကယ်ရပ်နားခ ဈေးကြီးပေးရခြင်း၊ အစားအသောက်များကို ဈေးကြီးပေး ဝယ်စားနေရခြင်း စသည့် အဆင်မပြေမှုများနှင့်ပါ ကြုံတွေ့ နေရကြောင်း ရန်ကုန်မှ လာရောက်သည့် ခရီးသွား အမျိုးသားတစ်ဦးက ပြောသည်။
“ပွဲတော်ကတော့ ပျော်ဖို့ကောင်းပါတယ်။ အစားအသောက်တွေဆို တစ်ခါစားရင် သိန်းဂဏန်းနဲ့ ရှင်းရတာ။ ကားထားဖို့ နေရာဆိုလည်း ရှာရခက်သလို၊ တစ်ခါထားရင် ငွေကျပ် ၅ သောင်းလောက် ပေးရတယ်။ ပါလာတဲ့ ငွေနဲ့က မလောက်ငှတာမျိုး ကြုံရတာပေါ့။ ဒီကြားထဲ ခါးပိုက်နှိုက်တွေကိုလည်း သတိထားနေရသေးတယ်”ဟု အဆိုပါ ခရီးသွား အမျိုးသားက ပြောသည်။
အဆိုပါ တန်ဆောင်တိုင် ပွဲတော်အတွင်း ဆိုင်ခန်းငှားရမ်းခအဖြစ် တစ်ခန်းလျှင် ငွေကျပ် သိန်း ၄၀ ပေးငှားထားရသောကြောင့် အစားအသောက်များ ဈေးတင်ရောင်းရခြင်း ဖြစ်ကြောင်း ဈေးသည်အများစုက ဆိုသည်။
ပြီးခဲ့သည့် နိုဝင်ဘာလ ၃ ရက်နေ့တွင်လည်း ပွဲတော်သို့ လာရောက်လည်ပတ်သူများထံ တည်းခိုခန်း အမည်ခံသူများက ဖေ့စ်ဘုတ်ပေ့ချ်အတုဖြင့် ကြိုတင်အခန်းငှားရမ်းပေးကာ ငွေလိမ်ယူခဲ့ခြင်းကြောင့် အလိမ်ခံရသူ ငါးဦးထက်မနည်း ရှိခဲ့သည်။
ထို့အပြင် အောက်တိုဘာလ ၂၈ ရက်တွင် တောင်ကြီးမြို့နယ်၊ ဖါမွန်း ကျေးရွာအုပ်စုရှိ ကောင်ရွေးရွာ၌ မီးရှူးမီးပန်းများ ပြုလုပ်နေစဉ် ပေါက်ကွဲမှုဖြစ်ပွားပြီး အမျိုးသမီး ၁ ဦး သေဆုံးကာ ၂ ဦး ပြင်းထန်စွာ ဒဏ်ရာရရှိခဲ့ကြောင်း သိရှိရသည်။
Leave a Comments