သျှမ်းပြည် မြို့တော် တောင်ကြီးတန်ဆောင်တိုင်ပွဲတော်သို့ လာရောက်လည်ပတ်သူများထံ တည်းခိုခန်းအမည်ခံသူများက ဖေ့စ်ဘုတ်ပေ့ချ်အတုဖြင့် ကြိုတင်အခန်းငှားရမ်းပေးပြီး ငွေလိမ်ယူနေကြသည်ဟု သတင်းရရှိသည်။

ဖြစ်စဉ်တစ်ခုအရ ပြီးခဲ့သည့် နိုဝင်ဘာလ ၁ ရက်နေ့တွင် တောင်ကြီးတန်ဆောင်တိုင် ပွဲတော်သို့ ရောက်ရှိလာသူများသည် တောင်ကြီးမြို့ ဘုရားဖြူရပ်ကွက်၊ နယ်မြေ ၂ တွင် ရှိသည်ဆိုသော “Pine Garden Villa” တည်းခိုခန်း၌ သုံးရက်စာ ကြိုတင်ဘိုကင်ယူထားခဲ့သည်။

သို့သော် တောင်ကြီးသို့ အမှန်တကယ် ရောက်လာသည့်အခါ အဆိုပါတည်းခိုခန်းကို ဆက်သွယ်ရန် ပေးထားသည့် ဖုန်းနံပါတ်အား ဆက်သွယ်၍မရတော့ကြောင်း ကိုယ်တိုင်ကြုံတွေ့သူများက သျှမ်းသံတော်ဆင့်သို့ ပြောပြသည်။

ရန်ကုန်ဘက်မှ လာရောက်လည်ပတ်သည့် ခရီးသွားအမျိုးသားတစ်ဦးက “တောင်ကြီးမလာခင် ပြီးခဲ့တဲ့ အောက်တိုဘာလ ၂၉ ရက် ညကမှ ဘိုကင်သုံးရက်စာ ယူထားတာ။ တောင်ကြီးရောက်တော့ သူ့ပေ့ချ်က ဖုန်းနံပါတ်ကို ဆက်တာ ဆက်မရတော့ဘူး။ ကျွန်တော်တို့လည်း တောင်ကြီးကို အခုမှ ရောက်ဖူးတာ၊ ရောက်ရောက်ချင်းကို အလိမ်ခံလိုက်ရတယ်” ဟု ပြောပြသည်။

၎င်းတို့အနေဖြင့် သုံးရက်စာ တည်းခိုရန် ငွေကျပ် ၄ သိန်း ၂ သောင်း ကို ကြိုတင်လွှဲထားခဲ့ခြင်းကြောင့် အလိမ်ခံရသည်မှာ သေချာကြောင်း အတည်ပြုသည်။

ထိုသို့ တည်းခိုစရာ နေရာအခက်အခဲ ဖြစ်နေသော်လည်း တောင်ကြီးမြို့ရှိ အသိမိတ်ဆွေများ၏ အကူအညီဖြင့် နေရာထိုင်ခင်း အဆင်ပြေသွားခဲ့ကြောင်း ၎င်းခရီးသွား အမျိုးသားက ဆက်ပြောသည်။

ထို့အပြင် တောင်ကြီးမြို့ခံများ၏ ပြောပြချက်အရ ဘုရားဖြူရပ်ကွက်၊ နယ်မြေ ၂ တွင် အဆိုပါ တည်းခိုခန်းနာမည်ကို မကြားဖူးကြောင်းနှင့် အလိမ်ခံရသည်မှာ ဖြစ်နိုင်ကြောင်းလည်း ထပ်လောင်းအတည်ပြုသည်။

တောင်ကြီးမြို့ခံ အမျိုးသားတစ်ဦးမှ “တန်ဆောင်တိုင် ပွဲတော်မတိုင်ခင်ကတည်းက ဟိုတယ်၊ တည်းခိုခန်းတွေက အကုန်ပြည့်နေပြီးသား။ လာချင်တဲ့သူတွေလည်း အခန်းမရကြလို့ လိုင်းပေါ်မှာ မေးနေကြတယ်၊ ဒီဟာကို အခွင့်ကောင်းယူပြီး လိမ်တာဖြစ်နိုင်တယ်။ ဘုရားဖြူ နယ်မြေ ၂ မှာ အဲ့ဒီတည်းခိုခန်းနာမည် မကြားဖူးဘူး” ဟု ရှင်းပြသည်။

၎င်းမြို့ခံအမျိုးသားက တောင်ကြီးတန်ဆောင်တိုင်ပွဲတော် လာရောက်လည်ပတ်မည်ဆိုပါက သေချာစုံစမ်းပြီးမှ လာသင့်ကြောင်းနှင့် လူမှုကွန်ရက်ပေါ်ရှိ အလိမ်အညာများကို အလွယ်တကူ မယုံသင့်ကြောင်း အကြံပြု ပြောကြားသည်။

ထိုကဲ့သို့ ဖေ့စ်ဘုတ်ပေ့ချ်အတုဖြင့် တည်းခိုရန်နေရာ အလိမ်ခံရသူများမှာ ငါးဦးထက်မနည်း ရှိနေပြီး လိမ်လည်သူများသည် အကောင့်တုများဖြင့် လိမ်လည်နေကြောင်း သိရသည်။

သျှမ်းသံတော်ဆင့်မှ အဆိုပါ Pine Garden Villa ဖေ့စ်ဘွတ်ခ်ပေ့ချ်မှ ပေးထားသည့် ဖုန်းနံပါတ်ကို ယနေ့ နိုဝင်ဘာလ ၃ ရက် နံနက်ပိုင်းတွင် ဆက်သွယ်ကြည့်ခဲ့ရာ ဖုန်းအဆက်အသွယ် မရခဲ့ဘဲ ထိုဖေ့စ်ဘုတ်ပေ့ချ် စာမျက်နှာသို့ ဝင်ကြည့်ခဲ့ရာ ပြီးခဲ့သည့် အောက်တိုဘာလ ၁၇ ရက်နေ့မှသာ စတင်ဖွင့်လှစ်ထားခြင်းဖြစ်ပြီး Follower (၂၁) ဦး သာ ရှိကြောင်း တွေ့ရှိရသည်။

တောင်ကြီးတန်ဆောင်တိုင်ပွဲတော်ကို အောက်တိုဘာလ ၂၉ ရက်နေ့မှ နိုဝင်ဘာလ ၅ ရက်နေ့အထိ ကျင်းပမည်ဖြစ်ပြီး အနယ်နယ်အရပ်ရပ်မှ ခရီးသွားများဖြင့် စည်ကားနေသည်။

ပြီးခဲ့သည့် နိုဝင်ဘာလ ၁ ရက် ညပိုင်းတွင် တောင်ကြီးတန်ဆောင်တိုင် ပွဲတော်အတွင်း ရုတ်တရက် မိုးရွာချခဲ့သဖြင့် လူအများအပြား မိုးလွတ်ရာသို့ ပြေးကြရာ ရုန်းရင်းဆန်ခတ် လူတိုးမှုများကြောင့် လူအုပ်ပိပြီး သတိလစ်မေ့မျောသူများ အယောက် ၈၀ ထက်မနည်း ရှိခဲ့သည်ဟု သတင်းရရှိသည်။