တောင်ကြီး တန်ဆောင်တိုင်ကာလ အတွင်း ဖမ်းဆီးခံခဲ့ရသည့် လူငယ် (၁၄၀)ကျော်ကို စစ်ကောင်စီတပ်က စစ်သင်တန်းပေးပြီး ရှေ့တန်းပို့နေကြောင်း ဒေသခံများထံမှ စုံစမ်းသိရသည်။
ပြီးခဲ့သည့် အောက်တိုဘာလ ကတည်းက စတင်ပြီး တောင်ကြီးမြို့ပေါ်တွင် စစ်ကောင်စီတပ်မှ ဖမ်းဆီးမှုများ ပြုလုပ်ခဲ့ပြီး ညဘက် ပေါ်တာဆွဲ ဖမ်းဆီးမှုများပါ ထပ်မံပြုလုပ်ခဲ့ပြီး တန်ဆောင်တိုင်ကာလတွင် ဖမ်းဆီးခံရသူ လူငယ် (၁၄၀ )ကျော် ရှိခဲ့သည်။
အဆိုပါ လူငယ် (၁၄၀)ကျော်ထဲတွင် အမျိုးသမီးများလည်း ပါဝင်နေပြီး ယခင်က ငွေပေးလျှင် ပြန်လွှတ်ပေးသော်လည်း ယခုအချိန်တွင် ငွေပေးလျှင်လည်း မရတော့ဘဲ ဖမ်းဆီးခံရသူများကို ကျိုင်းတုံဘက်သို့ စစ်သင်တန်း တက်ရောက်ခိုင်းကာ ရှေ့တန်းပို့လိုက်သည်ဟု ဖမ်းဆီးခံရသည့် လူငယ်များနှင့် နီးစပ်သူက ပြောသည်။
“တောင်ကြီးတန်ဆောင်တိုင် မတိုင်ခင်လေးက လူငယ်အများကြီး ROYAL တောင်ကြီးမှာ ၂၀ ကျော် ဖမ်းခံရတယ်။ မိန်းကလေးတွေလည်းပါတယ်၊ PNO ဘက်က သားသမီးတွေကိုတော့ ပြန်လွှတ်တာပေါ့။ တစ်ခြား ဘာမှ မရှိတဲ့ သူတွေကတော့ ငွေနဲ့ ပေးလည်း မရဘူး အဖမ်းခံရတယ်။ ပြီးရင် ကျိုင်းတုံဘက်ကို ပို့ပြီး ရှေ့တန်းပို့တယ် ကြားတယ်” ဟု အဆိုပါ နီးစပ်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုသို့ ဖမ်းဆီးခံရမှုများကြောင့် ညဘက် အပြင်မထွက်ရဲကြတော့ဘဲ ပိုက်ဆံပေးနိုင်ပြီး လက်နက်ကိုင်အဖွဲ့နှင့် ဆက်စပ်သူများသာ ညဘက် အပြင်ထွက်ကြတော့ကြောင်း တောင်ကြီးမြို့နေ လူငယ် တစ်ဦးက ပြောသည်။
ထို့ကဲ့သို့ စစ်ကောင်စီတပ်မှ ပေါ်တာဆွဲ ဖမ်းဆီးမှုများ လုပ်ဆောင်လာသောကြောင့် မိဘများအနေဖြင့် မိမိတို့၏ သားသမီးများအတွက် လုံခြုံရေးကို ပို၍ စိုးရိမ်နေရကြောင်း မြို့ခံ အမျိုးသမီးတစ်ဦးက ဆိုသည်။
“ကိုယ်က သားယောကျ်ားလေး မွေးထားရတော့ ပိုဆိုးတာပေါ့။ ညဘက်လည်း စိတ်ပူတယ်၊ နေ့လည်း ဘယ်သွားသွား စိတ်ပူတယ်။ ကိုယ်က ကျောထောက်နောက်ခံ ဘာမှ မရှိတော့ စိုးရိမ်ရတယ်။ ပိုက်ဆံရှိရင်တောင် ပြန်ရွေးလို့ မရတော့ဘူးလေ”ဟု အဆိုပါ အမျိုးသမီးက သျှမ်းသံတော်ဆင့်ကို ပြောသည်။
ယခုလက်ရှိ တောင်ကြီးမြို့ပေါ်တွင် ညဘက် ၇ နာရီကျော်မှ စပြီး မြို့ထဲနှင့် ရပ်ကွက်များတွင် လူသွားလာမှု နည်းပါးလာပြီး ညဈေးတန်းများ၌သာ လူအနည်းငယ် ရှိတော့သည်ဟု ဒေသခံများထံမှ သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments