တအာင်းတပ်ဖွဲ့ TNLA မှ ၂ လ နီးပါးအကြာဖမ်းဆီးသွားသော နမ့်ခမ်းမြို့သူ နန်းမိုဟွမ်အား သွားရောက်ကြိုလာသည့် သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA က သူမ၏ မိသားစုထံပြန်လည်အပ်နှံသည့်အခမ်းအနားတရပ် ၀မ့်ဟိုင်းဌာနချုပ်တွင် ပြုလုပ်ခဲ့သည်။
အောက်တိုဘာလ ၁၇ ရက်နေ့ ယနေ့မနက် ၉ နာရီခန့်က စတင်ခဲ့ခြင်းဖြစ်ပြီး SSPP/SSA ဘက်က ဒု ဗိုလ်မှူးကြီး စိုင်းဆု ၊ ဒုဗိုလ်မှူးကြီး စိုင်းဆိုင်ဟန်နှင့် ဗိုလ်မှူး သန်းအောင် တို့မှ နန်းမိုဟွမ်အား သူမ၏ ဆွေမျိုး ၁၈ ဦးထံပြန်လည်အပ်နှံပေးခဲ့ကြောင်းသိရသည်။
“အဲဒီအပ်နှံပွဲမှာ တက်ရောက်ခဲ့သူစုစုပေါင်း ၂၀၀ ကျော်ရှိပါတယ်။ ကျောင်းသူကျောင်းသားတွေရော၊ ရပ်မိရပ်ဖ တွေအပါအဝင်ပေါ့။ SSPP/SSA ဘက်က ဒု ဗိုလ်မှူးကြီး စိုင်းဆု ကတော့ – နန်းမိုဟွမ် စစ အဖမ်းခံရ ကတည်းက သူမ ကိုပြန်လွှတ်ပေးဖို့အတွက် SSPP/SSA ဘက်က တတ်စွမ်းနိုင် သလောက်ကြိုးစား ခဲ့တယ်။ တခြားသောအဖွဲ့ အစည်းတွေ နဲ့ချိတ်ဆက်ပြီးတော့လည်း TNLA ကို တိုက်တွန်းတောင်းဆိုတယ်။ အဘက်ဘက်နဲ့ ချိတ်ဆက် ဆောင်ရွက်ခဲ့ပါတယ်။အခုတော့ သူမ ပြန်လွှတ်လာတဲ့အတွက် SSPP/SSA ဘက်က ကြိုးစားဆောင်ရွက်မှု အောင်မြင်တယ်လို့ပြောလို့ရပါတယ်- လို့ပြောဆိုသွားပါတယ် ”- ဟု အခမ်းအနားတက်ရောက်သူ ၀မ့်ဟိုင်းဒေသခံ စိုင်းဦး ကသျှမ်သံတော်ဆင့်အားပြောပြသည်။
နန်းမိုဟွမ်အား သြဂုတ်လ ၁၇ ရက်နေ့က TNLA တအာင်းတပ်ဖွဲ့က သူမ၏ နေအိမ်တွင် ၀င်ရောက်ဖမ်းဆီးခဲ့သည်။ ၂၀၁၇ ခုနှစ်က ၄င်းအိမ်ဆိုင်အား ကျပ်ငွေ ၁၁ သိန်းဝင်ကောက်ရာမှအပြန် တအာင်းတပ်သား ၂ ဦးအား အစိုးရတပ်မတော်က ခြုံခိုတိုက်ခိုက်ရာတွင် TNLA တပ်သားတဦးသေဆုံးပြီး တဦး ဒဏ်ရာဖြင့် ဖမ်းဆီးခြင်းခံခဲ့ရသည့်အပေါ် နန်းမိုဟွမ်မှ သတင်းပေးသည်ဟုဆိုကာ ၀င်ရောက်ဖမ်းဆီးခဲ့သည်။ ၄င်းနှင့်ပတ်သက်ပြီး နန်းမိုဟွမ်ထံ ဖုန်းဖြင့်ဆက်သွယ်ပြောဆိုရာတွင် နန်းမိုဟွမ်က မိသားစု အသက် လုံခြုံရေးသည် ငွေကြေး ၁၁ ထက် ပိုပြီးအဖိုးတန်ကြောင်းထို့အတွက် မိမိမှ အကြောင်းကြားခြင်းလုံးဝမပြုရကြောင်း ပြောဆိုခဲ့သည်ဟု မိသားစုဝင်များထံမှသိရသည်။
အသက် ၃၆ နှစ်အရွယ် နန်းမိုဟွမ် တွင် လူမမယ် အရွယ် သားသမီး ၃ ဦးရှိကြောင်းသိရသည်။ သူမ ပြန်လည်လွှတ်မြောက်ရေးအတွက် နမ့်ခမ်းဒေသခံလူထုတရပ်လုံးက စီတန်းလှည့်လည်ဆန္ဒထုတ်ဖော်ခဲ့သည်။ အလားတူ နိုင်ငံရေးပါတီများ၊ လက်နက်ကိုင်အဖွဲ့အစည်းများ၊ လူမှုအခြေပြုအဖွဲ့အစည်းများအပြင် အစိုးရ၏ အမျိုးသားပြန်လည်ရင်ကြားစေ့ရေးနှင့် ငြိမ်းချမ်းရေးဗဟိုဌာနချုပ် NRPC က ကြေငြာချက်များအသီးသီးထုတ်ပြန်ကာ TNLA အား တိုက်တွန်းခဲ့ကြသည်။
နို၀င်ဘာလ ၁၀ ရက်နေ့က မြောက်ပိုင်းမဟာမိတ်တပ်ဖွဲ့ FPNCC ၏ ကြားဝင်ကူညီပေးမှုကြောင့် နမ့်ခမ်းဒေသခံလူငယ်ကိုယ်စားလှယ် ၄ ဦးနှင့် TNLA ကိုယ်စားလှယ်တို့ ပန်ခမ်း မြို့တွင်တွေ့ဆုံခွင့်ရရှိကာ နန်းမိုဟွမ်အား အမြန်ဆုံးပြန်လည်လွှတ်ပေးမည်ဖြစ်ကြောင်း ကြေငြာချက်တစောင်ထုတ်ပြန်ခဲ့သည်။
နို၀င်ဘာလ ၁၅ ရက်နေ့တွင်မူ မြောက်ပိုင်းမဟာမိတ်တပ်ဖွဲ့ဝင် SSPP/SSA ကိုယ်စားလှယ်များက နန်းမိုဟွမ်အား TNLA ထံမှ သွားရောက် ခေါ်ဆောင်လာခဲ့ပြီး ယနေ့မနက်တွင် မိသားစုထံပြန်လည်အပ်နှံပေးခဲ့ကြောင်းသိရပါသည်။
