သျှမ်းပြည်မြောက်ပိုင်း နမ္မတူမြို့တွင် စစ်ရေးငြိမ်သက်ခြင်းမရှိသေးသော်လည်း လယ်ယာလုပ်ငန်းခွင်အတွင်း ပျောက်ဆုံး ပျက်စီးမှုများရှိခဲ့သဖြင့် စိုးရိမ်စိတ်များဖြင့် နေရပ်သို့အသီးသီးပြန်နေကြကြောင်းသိရသည်။
နမ္မတူမြို့နယ်ပန်လုံအုပ်စုတွင် ပြီးခဲ့သည့်အပတ်များက မြောက်ပိုင်းမဟာမိတ်တပ်ဖွဲ့နှင့် RCSS/SSA ကြား၊ အစိုးရတပ်မတော်နှင့် TNLA ၊ မြောက်ပိုင်းမဟာမိတ်တပ်ဖွဲ့တို့ကြား တိုက်ပွဲများကြောင့် ဒေသခံ ၂၀၀၀ ခန့်မှာ နမ္မတူမြို့နယ်၊ သီပေါမြို့နယ် သို့ထွက်ပြေးခိုလှုံခဲ့ရသည်။
လက်ရှိတွင် တိုက်ပွဲများငြိမ်သက်ခြင်းမရှိသေးသော်လည်း လယ်ယာမြေအတွင်း စိုက်ပျိုးထားသည့်သီးနှံများ ပျောက်ဆုံးပျက်စီးသဖြင့် အရဲစွန့်ကာ နေရပ်သို့ပြန်သွားနေကြခြင်းဖြစ်ကြောင်း၊ စစ်ဘေး စစ်ဒဏ် တိမ်းရှောင်ရစဉ် အိမ်သော့ခတ်ခြင်းမပြုရသဖြင့် ဆန်၊ ဆီ နှင့်အိမ်တွင်းပစ္စည်းများ ခိုးယူခံရသည်ဟု သီပေါအောင်မင်္ဂလာဘိုးတော်ကျောင်း တွင်စစ်ရှောင်ခိုလှုံနေသည့် ပန်လုံဒေသခံ နန်းနွံက သျှမ်းသံတော်ဆင့်အားပြောသည်။
“တိုက်ပွဲတော့မငြိမ်သေးဘူး။ မပြန်လို့မဖြစ်လို့ ပြန်သွားကြည့်ရပါမယ်။ ခြံထဲကအသီးအနှံတွေလေ အခိုးခံရတာ။ ကျမတို့ အခုထွက်ပြေးလာတဲ့အဖွဲ့တွေထဲက တချို့ဆိုအိမ်တံခါးတောင်သော့မခတ်လိုက်ရဘူးလေ။ဆိုတော့ နေအိမ်တွေထဲကို ဝင်ပြီး ဆန်တွေဘာတွေကိုအိတ်လိုက်မ သွားတာ။ ကျမတို့စစ်ဘေးရှောင်တွေအတွက် တော့ တပူပေါ် ၂ ပူဆင့်ဖြစ်နေတယ်အခု။ မတတ်နိုင်ဘူးလေ ရွာပြန်ခြံကြည့် ၁ ရက်နေနိုင်ရင် ၁ ရက်။ ၂ ရက်နေနိုင်ရင် ၂ ရက်ပေါ့။ တိုက်ပွဲထပ်ဖြစ်ရင်လည်း ထပ်ပြေးကြတာပေါ့။”- အောင်မင်္ဂလာဘိုးတော်ဘုန်းကြီးကျောင်းမှ နေရပ်သို့ပြန်သွားရန်ပြင်ဆင်နေသည့် နန်းနွံက ပြောသည်။
ဘိုးတော်ဘုန်းကြီးကျောင်းတွင်ရောက်ရှိနေသော စစ်ဘေးရှောင် ၂၇၈ ဦး စက်တင်ဘာလ ၁၀ ရက်နေ့ ယနေ့မနက်ပိုင်း နေရပ် သို့ပြန် သွားကြပြီဖြစ်ကြောင်း တာတေဘုန်းကြီးကျောင်းတွင်မူ စစ်ဘေးရှောင်များမှာမူ ပြီးခဲ့သည့် စနေနေ့က နေရပ်ပြန်သွားကြပြီဖြစ် ကြောင်း သိရသည်။
“မြေပဲနှုတ်ရမှာဖြစ်တဲ့အတွက် တရက်ပြန်နှုတ်လဲတရက်အတွက် ရတာပေါ့။ မရတာထက်စာရင်တော့ ပိုကောင်းတာဘဲလေ။ ဘယ်တတ်နိုင်မလဲဗျာ တိုက်ပွဲပြန်ဖြစ်ရင်လည်းထပ်ပြေးကြတာပေါ့။ အေးချမ်းမှပြန်မယ်ဆိုရင်တော့ ရွာပြန်နိုင်တော့မှာ မဟုတ်ဘူးလေ။ တဖက်ကလည်း စားရမယ့်ဖြည့်ရမယ့်ဗိုက်ကလည်း တိုက်ပွဲတွေပြီးမှ…လို့စောင့်နိုင်တာမှမဟုတ်တာ။ အဲ့ကြောင့် ရွာပြန်ပြီးသီးနှံတွေသိမ်းနိုင်သမျှသိမ်းယူကြမယ်။ ဒီလိုဘဲ ရွာသားအချင်းချင်း စစ်ဘေးရှောင်အချင်းချင်း ဝိုင်းဝန်းဖေးမကူညီကြတာပေါ့ ” – ဟု ပန်လုံရွာ အုပ်ချုပ်ရေးမှူးအဖွဲ့ဝင် စိုင်းလိတ် ကလည်းပြောသည်။
သျှမ်းပြည်မြောက်ပိုင်း နမ္မတူမြို့နယ် ပန်လုံအုပ်စုတွင် ပြီးခဲ့သည့် စက်တင်ဘာလ ၁ ရက်နေ့က စတင်ကာ တိုက်ပွဲအပြင်း အထန်ဖြစ် ပွါးသဖြင့် ရွာသားများ အပြေးအလွှားစစ်ဘေးရှောင်ရာတွင် ဒေသခံရွာသား ၂ ဦး သေနတ်ထိမှန်ဒဏ်ရာရကာ သီပေါဆေးရုံသို့ပို့ဆောင်ကုသခဲ့ရသည်။ ဒေသခံရွာသား ၂၀၀၀ နီးပါးမှာလည်း နေရပ်မှစွန့်ခွါကာ နမ္မတူမြို့နယ် မန်စံအုပ်စု မိန်းမုအုပ်စုရှိဘုန်းကြီးကျောင်းများသို့တိမ်းရှောင်ခဲ့သည်။ ထို့အပြင်သီပေါမြို့နယ် အောင်မင်္ဂလာဘိုးတော်ဘုန်းကြီး ကျောင်းနှင့်တာတေဘုန်းတော်ကြီးကျောင်းသို့ထွက်ပြေးခိုလှုံခဲ့ကြသည်။
