ထိုင်းနိုင်ငံ ချွန်ဘူရီခရိုင် ဘန်ဘွန်းနယ်မြေရှိ ဆောက်လုပ်ရေးလုပ်ငန်းခွင်တစ်ခုမှ ဘတ် ၆၀၀,၀၀၀ ခန့် တန်ဖိုးရှိ လျှပ်စစ်ကေဘယ်ကြိုးအသစ်များကို လုယက်သွားခဲ့သည့် မြန်မာနိုင်ငံသား ၄ ဦးကို ထိုင်းရဲတပ်ဖွဲ့က ဖမ်းဆီးရမိခဲ့ကြောင်း Khaosod သတင်းက ဖော်ပြသည်။

အဆိုပါအဖွဲ့သည် လုယက်မှုမကျူးလွန်မီ လုံခြုံရေးဝန်ထမ်းကို ဓားဖြင့်ခြိမ်းခြောက်ကာ ကိုယ်ထိလက်ရောက် ရိုက်နှက်ခဲ့ပြီး ခြေလက်များကိုလည်း ကြိုးဖြင့်တုပ်နှောင်ထားခဲ့ကြောင်း သိရသည်။

ပြီးခဲ့သည့် ဇွန်လ ၄ ရက်နေ့ နံနက်အစောပိုင်း ၁:၂၃ နာရီမှ ၂:၂၀ နာရီအတွင်း ချွန်ဘူရီခရိုင်ရှိ ဆောက်လုပ်ရေးလုပ်ငန်းခွင်တစ်ခုသို့ အမျိုးသား ၁၀ ဦးထက်မနည်း ပါဝင်သည့် လူတစ်စု ဝင်ရောက်လာပြီး လုံခြုံရေးဝန်ထမ်းကို ကိုယ်ထိလက်ရောက် ရိုက်နှက်ကာ ခြေလက်များကို ကြိုးဖြင့်တုပ်နှောင်ခဲ့ကြောင်း သိရသည်။

CCTV မှတ်တမ်းများအရ ကျူးလွန်သူများသည် အသင့်စောင့်ဆိုင်းနေသည့် ပစ်ကပ်ထရပ်ကား နှစ်စီးပေါ်သို့ လျှပ်စစ်ကေဘယ်ကြိုးအသစ် အမြောက်အမြား တင်ဆောင်ပြီးနောက် အခင်းဖြစ်နေရာမှ မောင်းနှင်ထွက်ပြေးသွားခဲ့ကြကြောင်း သိရသည်။

ထို့နောက် ဇွန်လ ၆ ရက် ညနေ ၅ နာရီခန့်တွင် သံသယရှိယာဉ်တစ်စီးသည် Ban Surasak–Phan Sadet Nok လမ်းအနီးရှိ တစ်ပတ်ရစ်ပစ္စည်း အရောင်းဆိုင်တစ်ဆိုင်အတွင်းသို့ ဝင်ရောက်သွားသည်ကို တွေ့ရှိခဲ့သည်။

အဆိုပါနေရာသို့ ရဲတပ်ဖွဲ့က ဝင်ရောက်စစ်ဆေးရာ ယာဉ်မောင်းဖြစ်သူ အသက် ၃၄ နှစ်အရွယ် ရဲထွေးဆိုသူနှင့်အတူ ၎င်း၏ ချစ်သူအမျိုးသမီး၊ ကလေးငယ်တစ်ဦးနှင့် အခြားအမျိုးသမီးတစ်ဦးတို့ကို ဖမ်းဆီးရမိခဲ့သည်။

ရဲထွေးကို ဆက်လက်စစ်ဆေးမေးမြန်းရာမှ အခြား မြန်မာနိုင်ငံသား သံသယရှိသူ ၃ ဦးဖြစ်သည့် စိုင်းထက်အောင် (၂၇ နှစ်)၊ ဝေဂန်း (၁၈ နှစ်) နှင့် ရဲကိုလင်း (၃၄ နှစ်) တို့ကို ထပ်မံဖမ်းဆီးနိုင်ခဲ့ကြောင်း သိရသည်။

ဖမ်းဆီးရမိသူ ၄ ဦးသည် လုယက်မှုတွင် ပါဝင်ပတ်သက်ခဲ့ကြောင်း ဝန်ခံထွက်ဆိုထားသော်လည်း “မောင်” ဟုသာ သိရသေးသည့် ဂိုဏ်းခေါင်းဆောင်အပါအဝင် ကျန်ရှိနေသည့် အဖွဲ့ဝင်များမှာ လက်ရှိအချိန်ထိ လွတ်မြောက်နေဆဲဖြစ်သည်။

ဘန်ဘွန်းရဲစခန်းမှ ရဲမှူးကြီး ခရစ် မာဆွတ် (Pol. Col. Krit Masuk) ၏ ပြောကြားချက်အရ ဖမ်းဆီးခံရသူများအားလုံးသည် မြန်မာရွှေ့ပြောင်းလုပ်သားများဖြစ်ကြပြီး ၎င်းတို့အဖွဲ့သည် ယခင်က Khlong Kio၊ Nong Yai နှင့် Pluak Daeng ရဲစခန်းနယ်မြေများအတွင်း ဖြစ်ပွားခဲ့သည့် အလားတူ လျှပ်စစ်ကေဘယ်ကြိုး လုယက်မှုဖြစ်စဉ်များနှင့်လည်း ဆက်စပ်မှုရှိနိုင်ကြောင်း စုံစမ်းတွေ့ရှိထားသည်။

ထို့ကြောင့် လွတ်မြောက်နေဆဲဖြစ်သည့် ကျန်အဖွဲ့ဝင်များကို ဖမ်းဆီးနိုင်ရေးအတွက် ရဲတပ်ဖွဲ့က စုံစမ်းစစ်ဆေးမှုများကို အရှိန်မြှင့် ဆက်လက်ဆောင်ရွက်နေကြောင်း သိရသည်။

ကိုးကား – Khaosod English