သျှမ်း-ကရင်နီနယ်စပ် ဖယ်ခုံမြို့နယ် မိုးဗြဲမြို့ အနောက်ဘက်ခြမ်းရှိ ကရင်နီတော်လှန်ရေးတပ်ပေါင်းစုတို့၏ ကာကင်းများကို စစ်ကော်မရှင်တပ်မှ စစ်ကြောင်းထိုးခြင်းကြောင့် ထိတွေ့တိုက်ပွဲများ နေ့စဉ်နီးပါး ဖြစ်ပွားနေကြောင်း စုံစမ်းသိရသည်။
ဧပြီလ ဒုတိယပတ်အတွင်း မိုးဗြဲမြို့ အနောက်ဘက်ခြမ်းရှိ ကရင်နီတော်လှန်ရေး တပ်ပေါင်းစု၏ ကာကင်းများကို စစ်ကော်မရှင်တပ်နှင့် ၎င်းလက်အောက်ခံ PNO ပအိုဝ်းပြည်သူ့စစ်တို့ စစ်ကြောင်းထိုးနေခြင်းကြောင့် နေ့စဉ်နီးပါး နှစ်ဘက်ထိတွေ့မှု ရှိနေကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
“ဧပြီ ၈ ရက်နေ့ ညပိုင်းက ကာကင်းနေရာ တချို့ကို စစ်ကောင်စီတပ်တွေ စစ်ကြောင်းထိုးနေတာ ရှိတယ်။ ရက်တိုင်းလိုလို စစ်ဆင်းရေး လုပ်နေတာမျိုးပါ။ တိုက်ပွဲကြီး ပြင်းထန်တာမျိုးတော့ မဟုတ်ဘူး၊ ထိတွေ့ အဆင့်လောက်ပါ။ သူတို့က ကာကင်းတွေကို ဒရုန်းနဲ့ ဗုံးကြဲတာ ရှိတယ်။ ပြီးရင် လက်နက်ကြီးနဲ့ ရမ်းပစ်ပြီး စစ်ကြောင်းထိုးတာမျိုးတွေ လုပ်လေ့ရှိတယ်”ဟု စစ်ရေးသတင်းရင်းမြစ်တစ်ဦးက ပြောသည်။
မိုးဗြဲမြို့ကို စစ်ကော်မရှင်တပ်က ပြန်လည်ထိန်းချုပ်နိုင်ခဲ့သော်လည်း မြို့ပြင်ရှိ ကျေးရွာအချို့နှင့် စစ်ရေးအတွက် အရေးပါသည့် လမ်းပိုင်းများကို ကရင်နီတော်လှန်ရေးတပ်ပေါင်းစုတို့က ဆက်လက် ထိန်းချုပ်ထားသည်။
ထို့ကြောင့် သျှမ်း-ကရင်နီ (ကယား)နယ်စပ် ဖယ်ခုံ-မိုးဗြဲ-လွိုင်ကော် လမ်းပိုင်းကို အပြည့်အဝ ပြန်လည်ထိန်းချုပ်နိုင်ရန် စစ်ကော်မရှင်တပ်နှင့် PNO ပအိုဝ်းပြည်သူ့စစ်တို့က စစ်ကြောင်းများခွဲကာ ကြိုးပမ်းတိုက်ခိုက်နေပြီး ကရင်နီတော်လှန်ရေးတပ်ပေါင်းစုမှလည်း အကောင်းဆုံး ခုခံကာကွယ်နေကြောင်း ရှေ့တန်ရဲဘော်တစ်ဦးက ထပ်လောင်း ပြောသည်။
“စစ်ကောင်စီတွေက မိုးဗြဲထဲက မြို့အနောက်ဘက်ခြမ်းရှိတဲ့ ကျနော်တို့ကို ထိုးစစ်ဆင်နေတာ။ တောင်ပေါ်မှာရှိတဲ့ ကာကင်းတွေဆိုရင် ပတ်ဝန်းကျင်ကို သေချာ စောင့်ကြည့်နိုင်တယ်လေ၊ စစ်ရေးအတွက် အရမ်းအရေးကြီးတယ်။ ကာကင်းတစ်ခု ကျရင် အနီးအနား ကာကင်းတွေပါ ဆက်မခံနိုင်ဘူး ပြိုကွဲနိုင်တယ်။ ဒါကြောင့် အကောင်းဆုံး ခုခံကာကွယ်နေကြတာပါ”ဟု ရှေ့တန်းရဲဘော်တစ်ဦးက ပြောသည်။
အလားတူ ဖယ်ခုံမြို့နယ် အနောက်ဘက်ခြမ်းတွင်လည်း စစ်ကော်မရှင်တပ်နှင့် ကရင်နီတော်လှန်ရေး တပ်ပေါင်းစုတို့ နေ့စဉ်နီးပါး ထိတွေ့တိုက်ပွဲ ဖြစ်ပွားနေသည့်အပြင် စစ်ကော်မရှင်ဘက်မှ လက်နက်ကြီး၊ ဒရုန်းများဖြင့် ရမ်းသမ်းပစ်ခတ်မှုများလည်း ရှိနေကြောင်း သိရသည်။
ပြီးခဲ့သည့် ဖေဖော်ဝါရီလ နောက်ဆုံးပတ်တွင်လည်း မိုးဗြဲမြို့ အနောက်ဘက်ခြမ်းရှိ လွယ်ယင်းမင်္ဂလာကျေးရွာနှင့် လာမောက်ရွာ ဘက်ကို စစ်ကော်မရှင်တပ်တို့ စစ်ကြောင်းထိုးမှုများ ရှိနေခြင်းကြောင့် ပြည်သူများအနေဖြင့် ကန့်သတ်ထားသည့် နယ်မြေများအတွင်း ဖြတ်သန်း သွားလာခြင်း လုံးဝ (လုံးဝ) မပြုရန် မိုးဗြဲပြည်သူ့ကာကွယ်ရေးတပ်မှ အသိပေး ထုတ်ပြန်ခဲ့သည်။
Leave a Comments