သျှမ်ပြည် အ‌ရှေ့ပိုင်း တာချီလိတ်မြို့နယ်တွင် အွန်လိုင်းငွေလိမ် ကျားဖြန့်လုပ်ငန်း လုပ်ကိုင်သူ တရားမဝင် နိုင်ငံခြားသား ၁၂၆ ဦးကို ဆက်စပ်ပစ္စည်းများ နှင့် ဖမ်းဆီးရမိခဲ့ကြောင်း သိရသည်။ 

ယမန်နေ့ (ဧပြီ ၇ ရက်) နေ့လည်ပိုင်း တာချီလိတ်မြို့နယ် ပန်ကူကျေးရွာအနီးတွင် အွန်လိုင်းငွေလိမ် ကျားဖြန့်လုပ်ငန်း လုပ်ကိုင်သူ တရုတ်နိုင်ငံသား ၁၂၂ ဦး ၊ အမျိုးသမီး ၃ ဦး နှင့် လားအို နိုင်ငံသား အမျိုးသမီး ၁ ဦးတို့ကို ဖမ်းဆီးခဲ့ကြောင်း စစ်ကော်မရှင်ဘက်က သတင်းထုတ်ပြန်သည်။

“ထပ်ပြီးတော့ သတင်းရပြီး ဖမ်းမိတာနေမယ် သူတို့ထွက်သွားတာ‌တော့ တွေ့လိုက်တယ်။ ထူးဆန်းတာက ဆက်တိုက်ဖမ်းပြီး နောက်ကဘယ်လက်နက်ကိုင်လဲ ဘယ်သူကြိုးကိုင်နေလဲ ဆိုတာ မထွက်တာကတော့ ဘယ်လိုလဲမသိဘူး”ဟု တာချီလိတ်မြို့နယ် ဒေသခံ အမျိုးသမီးတစ်ဦးကပြောသည်။

ထိုစစ်ကော်မရှင်တပ် နှင့်သက်ဆိုင်ရာ ဌာနဆိုင်ရာတာဝန်ရှိသူများ ဝင်ရောက်စီးနင်းခဲ့သည့် အွန်လိုင်းငွေလိမ် ကျားဖြန့်များသည် ပန်ကူကျေးရွာ နှင့် ၂ မိုင် ခန့်တွင်တည်ရှိကြောင်း သိရသည်။

အဆိုပါ ဝင်ရောက်ဖမ်းဆီးမှုအတွင်း မီးစက်ကြီး ၁ လုံး၊ ဖုန်းမျိုးစုံ ၁၀၅ လုံး၊Systemပုံး ၉၇ လုံး၊ ALL-IN-ONE ကွန်ပျူတာ ၄၆ လုံး၊ Star Link ၁၂ လုံး၊ ဝိုင်ဖိုင် စက် ၁၂ လုံးနှင့် မော်တော်ယာဉ်မျိုးစုံ ၁၂၀ စီးတို့ကို တွေ့ရှိ ဖမ်းဆီးထိန်းသိမ်းနိုင်ခဲ့ကြောင်း စစ်ကော်မရှင် ထုတ် ပြန်ချက်တွင် ဖော်ပြထားသည်။

ထိုသို့ ဖမ်းဆီးရမိသူများကို ဉပဒေနှင့် အညီ အရေးယူဆောင်ရွက်ပြီး နောက်ကွယ်တွင် ပါဝင်ပတ်သက်သူများကိုလည်း စိစစ်ဖော်ထုတ်သွားမည်ဖြစ်ကြောင်း ထုတ်ပြန်ချက်တွင် ရေးသားထားသည်။

ပြီးခဲ့သည့် (ဧပြီ ၄ ရက်)တွင် တန့်ယန်းမြို့နယ် ကောင်းဆန်ကျေးရွာအနီးတွင် အွန်လိုင်းငွေလိမ်ကျားဖြန့် လုပ်ငန်းလုပ်ကိုင်သူတရုတ်နိုင်ငံသား အမျိုးသား ၁၀၀ ဦး၊ အမျိုးသမီးတစ်ဦး၊ မြန်မာနိုင်ငံသား အမျိုးသား ၁၂ ဦး၊ အမျိုးသမီး ၈ ဦး၊ စုစုပေါင်း ၁၂၁ ဦးတို့ ဖမ်းဆီးမိခဲ့ကြောင်း သိရသည်။

သျှမ်းပြည် မြောက်ပိုင်းတွင် လှုပ်ရှားနေသည့် အွန်လိုင်း ကျားဖြန့်လုပ်ငန်းရှိသည့် နေရာများကို စစ်ကော်မရှင်မှ ဝင်ရောက်ဖမ်းဆီးရာတွင် တရုတ်နိုင်ငံ၏ သတင်းပေးချက် အပြင် တခြားသော ကူညီမှုများပါဝင်နေကြောင်း စစ်ရေးသတင်းရင်းမြစ်တစ်ဦးက ပြောသည်။

သျှမ်းပြည်အတွင်း လှုပ်ရှားနေသည့် ကျားဖြန့် အွန်လိုင်း လုပ်ငန်းရှိသည့် နေရာများ၊ လောင်းကစား ကာစီနိုရှိသည့် နေရာများကို စစ်ကော်မရှင်တပ်နှင့် ၎င်းလက်အောက်ခံ ဌာနဆိုင်ရာ ပူးပေါင်းအဖွဲ့များက မကြာခဏ ဝင်ရောက်စီးနင်း ဖမ်းဆီးမှုများ ပြုလုပ်နေသော်လည်း လက်ရှိအချိန်ထိ ပပျောက်သွားခြင်း မရှိသေးကြောင်း သိရသည်။