သျှမ်းပြည်မြောက်ပိုင်း ‘ဝ’ပြည် သွေးစည်းညီညွတ်ရေး တပ်မတော် (UWSA) ထိန်းချုပ်ထားသည့် ဟိုပန်မြို့တွင် ကျားဖြန့်လုပ်ငန်း လုပ်ကိုင်သူ (၁၀၀)ကျော်ကို UWSA မှ ဝင်ရောက်ဖမ်းဆီးထားကြောင်း စုံစမ်းသိရသည်။
ပြီးခဲ့သည့် (ဖေဖော်ဝါရီ ၂၀ ရက်) ညသန်းခေါင် လူအိပ်မောကျသည့်အချိန် ဟိုပန်မြို့အတွင်း မိန်းပန်း(ရှမ်း) ရပ်ကွက်ရှိ ကျားဖြန့်လုပ်ငန်းတစ်ခုကို UWSA မှ ဝင်ရောက်ဖမ်းဆီးခဲ့ရာ ငွေလိမ်လုပ်ကိုင်သူ (၁၀၀)ကျော် ဖမ်းဆီးခံလိုက်ရကြောင်း ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ပြီးခဲ့တဲ့ ၂၀ ရက်တုန်းက ဝင်ဖမ်းတာ၊ ဟိုပန်မြို့ထဲက မိန်းပန်းရပ်ကွက် သျှမ်းတွေအနေများတဲ့ ရပ်ကွက်လည်း ပြောလို့ရတယ်။ အဲ့မှာ ကျားဖြန့်လုပ်ကိုင်သူ ရှိတယ်၊ သူတို့ ညသန်းခေါင်ယံမှာ အဖွဲ့လိုက် ဝင်ဖမ်းသွားကြတာ။ ခုတော့ UWSA က ဖမ်းထားတယ်။ တရုတ်လူမျိုးလည်း ပါတယ်၊ အဲ့တရုတ်တွေကိုတော့ ပြန်ပို့ပေးမယ်လို့ ပြောကြတယ်။ ခုတော့ ဘာမှ ပြန်မကြားရသေးဘူး”ဟု ၎င်းက ပြောသည်။
UWSA မှ ဝင်ရောက်ဖမ်းဆီးထားသည့် ကျားဖြန့်လုပ်ကိုင်သူ (၁၀၀)ကျော် ထဲတွင် သျှမ်းတိုင်းရင်းသား အများစုဖြစ်ကြောင်း သိရသည်။
ပြီးခဲ့သည့် ဒီဇင်ဘာလ (၂) ရက်နေ့ တန့်ယန်းမြို့နယ် နောင်ဟီးကျေးရွာတွင် ကျားဖြန့်လုပ်ကိုင်သူ အယောက် (၅၀)ဝန်းကျင်ကို စစ်ကောင်စီလက်အောက်ခံ ရဲတပ်ဖွဲ့နှင့် UWSA တို့က ပူးပေါင်းဖမ်းဆီးခဲ့ရာ တရုတ်နိုင်ငံသားများကို တရုတ်နိုင်ငံသို့ လွှဲပြောင်းခဲ့သော်လည်း မြန်မာနိုင်ငံသား အယောက် (၃၀)ခန့်ကို ပိုက်ဆံကောက်ယူပြီး ပြန်လွှတ်ပေးခဲ့ကြောင်း ဒေသခံ အမျိုးသမီးတစ်ဦးက ပြောသည်။
ယခု ဟိုပန်မြို့တွင် UWSA မှ ဖမ်းဆီးရမိခဲ့သည့် ကျားဖြန့်လုပ်ကိုင်သူ အယောက် (၁၀၀)ကျော်ထဲတွင် တန့်ယန်း စစ်ကောင်စီတပ်မှ ပိုက်ဆံကောက်ပြီး ပြန်လွတ်မြောက်လာသူ အများအပြား ပါဝင်နေကြောင်း ၎င်းက ပြောသည်။
“ကျားဖြန့်ကတော့ ဆက်ရှိနေအုန်းမှာပဲ၊ သူတို့က တရုတ်လူမျိုး မဟုတ်ရင်တောင် မြန်မာနိုင်ငံသားတွေက ဆက်လုပ်နေမှာပဲ။ ရဲတွေ ဖမ်းမိရင်လည်း မြန်မာနိုင်ငံသားဆို ပိုက်ဆံယူပြီး ပြန်လွှတ်ပေးတယ်လေ။ ပြီးရင် သူတို့ပဲ နေရာပြောင်းပြီး ပြန်လုပ်တယ်။ တိုင်းရင်းသူတွေလည်း များတယ်လို့ သိရတယ်၊ အတိအကျတော့ မပြောတတ်သေးဘူး”ဟု ၎င်းက ပြောသည်။
ထို့အပြင် ပြီးခဲ့သည့် ဖေဖော်ဝါရီလ (၅) ရက်မှ (၉) ရက်အတွင်း မိုင်းရယ်မြို့နယ် မိုင်းဟဒေသရှိ မုံးဟ-မုံးဟင်းပြည်သူ့စစ် နယ်မြေတွင် ဖွင့်လှစ်လုပ်ကိုင်နေသည့် အွန်လိုင်းကျားဖြန့် ငွေလိမ်ဂိုဏ်းများကို စစ်ကောင်စီတပ်မှ ဝင်ရောက်ဖမ်းဆီးခဲ့ရာ ဗီယက်နမ်နှင့် တရုတ်နိုင်ငံသား အပါအဝင် (၁၀၀) ကျော် ဖမ်းဆီးရမိခဲ့ကြောင်း သိရသည်။
စစ်ရေးပဋိပက္ခ ဖြစ်ပွားချိန် အလုပ်အကိုင်ရှားပါးမှုကို အခွင့်ကောင်းယူကာ ဒေသခံလူငယ်များကို ကျားဖြန့်လုပ်ကိုင်ရန် တရုတ်ယွမ်ငွေ (၁) သောင်းကျော် (မြန်မာကျပ်ငွေ ကာလပေါက်ဈေး သိန်း ၉၀ ခန့်) အထိ မက်လုံးပေး မြှူဆွယ်ကာ အလုပ်ခေါ်ယူနေသကဲ့သို့ ထမင်းဟင်းချက်ပေးမည့်သူမှ စ၍ ခေါ်ယူခဲ့ကြောင်း သိရသည်။
Leave a Comments