သျှမ်းပြည် ‘ဝ’တပ်ဖွဲ့ UWSA ထိန်းချုပ်ဒေသရှိ ခရစ်ယာန်ဘာသာရေး ဝတ်ပြုကျောင်းများ ပိတ်သိမ်းခံရပြီး အစွန်းရောက် ဘာသာရေးစည်းရုံးလှုံ့ဆော်မှု ရှိနေကြောင်း စုံစမ်းသိရသည်။

လတ်တလောတွင် နာမည်ကြီးနေသည့် ခရစ်ယာန်ဘာသာရေးအမည်ခံ “ယေရှုတရုတ်မ”ဆိုသည့် ဂိုဏ်းအဖွဲ့ကြောင့် ‘ဝ’ပြည် သွေးစည်းညီညွတ်ရေးပါတီ UWSA ထိန်းချုပ်ဒေသ ပန်ဆန်း၊ မိုင်းပေါက်၊ နားဝီးနှင့် ၁၇၁ တောင်ပိုင်းစစ်ဒေသ မိုင်းဆတ်ခရိုင်ရှိ ခရစ်ယာန်ဘာသာရေး ဝတ်ပြုကျောင်းများ အားလုံးနီးပါးကို ပိတ်သိမ်းထားခိုင်းကြောင်း ဒေသခံများက ပြောသည်။

“အဓိကတော့ သင်္ကြန်နောက်ပိုင်း နာမည်ကြီးလာတဲ့ ယေရှုတရုတ်မ အဖွဲ့တွေကနေ အခုလို အခြေအနေအထိ ဖြစ်လာတာ။ တရုတ်ဘက်က လာတဲ့အဖွဲ့က ရောဂါဖြစ်ရင်တောင် ဆေးမကုနဲ့၊ သူတို့ဆီသွားရင် ပျောက်တယ်လို့ စည်းရုံးတော့ အဲ့ကနေ လူတွေက တဖြည်းဖြည်း သွားကြတာ။ အခုက ယေရှုလို့ ပြောတော့ ခရစ်ယာန်ဆိုပြီး ဖြစ်သွားတာ၊ တကယ်တမ်းက ဘာသာရေးနဲ့ မဆိုင်ဘဲ အစွန်းရောက် အရေခြုံတွေ ဖြစ်နေတာ”ဟု ဟိုပန်မြို့နယ်မှ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

UWSA ထိန်းချုပ်ဒေသရှိ ခရစ်ယာန်ဘာသာရေး ဝတ်ပြုကျောင်းများ ပိတ်သိမ်းမှုနှင့် ပတ်သက်ပြီး ဘုရားကျောင်းအချို့ ယာယီပိတ်သိမ်းထားမှု မှန်ကန်ကြောင်း၊ ‌အစွန်းရောက်သည့်ဘာသာရေးနှင့် ကင်းရှင်းမှုရှိမည် ဆိုပါက ပြန်လည်ဖွင့်ပေးမည်ဖြစ်ကြောင်း ‘ဝ’ပြင်ပဆက်ဆံရေးတာဝန်ခံ ဦးညီရန်းက ၎င်းဖေစ့်ဘုတ်လူမှုကွန်ယက်တွင် ရေးသားထားသည်။

“တဖက်နိုင်ငံ၏ သတိပေးလာမှုနှင့် ‘ဝ’ပြည်၌ အစွန်းရောက်သည့် ဘာသာရေး စည်းရုံးလှုံ့ဆော်သူအချို့ စိမ့်ဝင်နေကြောင်း။ ဖျားနာလျှင် ဆေးသောက်/အလုပ် လုပ်စရာမလို၊ ဘုရားမှ ကောင်းစေမည် ဆိုပြီး မှားယွင်းသည့် သွန်သင်မှုမျိုးရှိနေကြောင်း” အချက် ၄ ချက်ဖြင့် ဦးညီရမ်းမှ ရှင်းလင်းဖြေကြားထားသည်။

UWSA ထိန်းချုပ်ထားသည့် ‘ဝ’ဒေသအတွင်း၌ စည်းကမ်းရှိသည့် ဘာသာရေးလွတ်လပ်ခွင့် ဥပဒေပြု ပြဋ္ဌာန်းထားရှိသော်လည်း ပြင်ပမှ တရားမဝင် ဝင်ရောက်ပြီး ဟောပြောစည်းရုံးခြင်းကို ခွင့်မပြုထားကြောင်း ဆိုသည်။

“ဒီမှာက ပညာရေးအားနည်းတော့ တစ်ခုခုနဲ့ ဆွဲဆောင်လိုက်ရင် အလွယ်ပါသွားကြတာ များတယ်၊ လူတွေကလည်း ခက်ခဲနေတော့ အားကိုးစရာ ရှာတဲ့ သဘောလေ။ ယေရှုတရုတ်မအဖွဲ့ကို ‘ဝ’စစ်သားတွေ လိုက်ရှာဖမ်းတော့လည်း ဒီက ဒေသခံတွေပဲ အများစု ဖြစ်နေတာ။ အဖွဲ့အစည်းက သေချာ မကိုင်တွယ်ရင်တော့ မီးခိုးကြွက်လျှောက် ဖြစ်ပြီး ဘုရားကျောင်းနဲ့ ခရစ်ယာန်ဘာသာဝင်တွေပဲ ထိခိုက်နစ်နာမှာ” ဟု ဟိုပန်မြို့နယ်မှ အဆိုပါ ဒေသခံ အမျိုးသမီးက ဆက်ပြောသည်။

လက်ရှိတွင် ပန်ဆန်းမြို့နယ်ရှိ ခရစ်ယာန်ဘာသာရေး ဝတ်ပြုကျောင်း အားလုံးနီးပါးကို UWSA တာဝန်ရှိသူများ ပိတ်သိမ်းထားခိုင်းပြီး ဘုရားကျောင်း (၄၀) ခန့် ယာယီပိတ်သိမ်းခိုင်းကာ ဓမ္မဆရာတစ်ဦးနှင့် အမျိုးသမီးတစ်ဦးတို့ ဖမ်းဆီးခံထားရကြောင်း ‘ဝ’သတင်းကွန်ရက် Wa News Land မီဒီယာ ဖော်ပြချက်အရ သိရသည်။

ပြီးခဲ့သည့် ၂၀၁၈-၂၀၁၉ ဝန်းကျင်ကလည်း ‘ဝ’ဒေသတွင် ခရစ်ယာန်ဘုရားကျောင်း ပိတ်သိမ်းခြင်း၊ ကိုးကွယ်ယုံကြည်မှု တားမြစ်ခံရခြင်း၊ ခရစ်ယာန်ဓမ္မဆရာများကို ဖမ်းဆီးပြီး နယ်နှင်ဒဏ်ပေးခြင်း စသည့် ဖြစ်စဉ်များကြောင့် ခရစ်ယာန်ဘာသာရေး သက်ဝင်ယုံကြည်သူများအကြား စိုးရိမ်မကင်း ဖြစ်နေကြောင်း ဒေသခံများထံမှ သိရသည်။