သျှမ်းပြည် ကွတ်ခိုင်မြို့နယ်ရှိ တအာင်း(ပလောင်) အမျိုးသားလွတ်မြောက်ရေးတပ်မတော် TNLA တပ်စခန်းနေရာများကို ကိုးကန့်တပ်ဖွဲ့ MNDAA ဘက်မှ ဒရုန်းနှင့် လက်နက်ကြီးများ အသုံးပြုပြီး စတင်တိုက်ခိုက်ခဲ့ကြောင်း စုံစမ်းသိရသည်။

ယနေ့ (မတ်လ ၁၄ ရက်) နံနက် ၁၀ နာရီခန့်မှ စတင်ပြီး ကွတ်ခိုင်မြို့နယ်ရှိ မုံးစီး၊ နမ့်ဖတ်ကာ၊ လွိုင်ဆမ်ဆစ်၊ မန်ပြိန်းနှင့် မြို့အနီးတဝိုက်ရှိ တအာင်း(ပလောင်) အမျိုးသားလွတ်မြောက်ရေးတပ်မတော် TNLA တပ်စခန်းနေရာများကို ဒရုန်းနှင့် လက်နက်ကြီးများ အသုံးပြုပြီး ကိုးကန့်တပ်ဖွဲ့ MNDAA ဘက်မှ တပြိုင်နက် စတင်တိုက်ခိုက်ခဲ့ကြောင်း ကွတ်ခိုင်ဒေသခံများက ပြောသည်။

“အခုဖြစ်တဲ့ တိုက်ပွဲက ကွတ်ခိုင်တစ်မြို့လုံးကို ကိုးကန့်ဘက်က သိမ်းမယ့် အစီအစဉ်လို့ ကြားတယ်။ ကွတ်ခိုင်တကြော TNLA တပ်ချထားတဲ့ နေရာတွေကို MNDAA ဘက်က ဒရုန်းနဲ့ အရင် စ,ပစ်လို့ တိုက်ပွဲဖြစ်နေတယ်။ အခုလည်း နမ့်ဖတ်ကာဘက်ထိ တိုက်ပွဲဖြစ်နေပြီ” ဟု ကွတ်ခိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

သိန္နီနှင့် ကွတ်ခိုင်မြို့နယ်တွင် TNLA နှင့် MNDAA ကြား တစ်လကျော်ကြာ ဖြစ်ပွားနေသည့် နယ်မြေအငြင်းပွားမှု ပြဿနာများမှာ ပြေလည်မှု မရရှိဘဲ မြေပြင်စစ်ရေးတင်းမာမှု ဖြစ်ပွားခဲ့ရာမှ ညီနောင်မဟာမိတ် တပ်အချင်းချင်း တိုက်ခိုက်သည်အထိ စစ်ရေးပဋိပက္ခ ကြီးထွားလာသည်။

လက်ရှိတွင် ကွတ်ခိုင်မြို့တွင်း TNLA တပ်စွဲထားသည့် နေရာများကို MNDAA ဘက်မှ ဒရုန်းဖြင့် တိုက်ခိုက်ခြင်းကြောင့် အရပ်သားနေအိမ်ပေါ် ကျရောက်ပေါက်ကွဲပြီး ပြည်သူထိခိုက်ဒဏ်ရာရမှု ရှိကြောင်း ကနဦး သိရသော်လည်း ထိခိုက်ပျက်စီးမှု အသေးစိတ်ကို သျှမ်းသံတော်ဆင့်မှ ဆက်လက်စုံစမ်းနေသည်။

ထို့အပြင် ညီနောင်မဟာမိတ်(၃) ဖွဲ့ ပူးတွဲထိန်းချုပ်ထားသည့် မူဆယ်မြို့နယ်အတွင်းရှိ ကျင်ဆန်းကျော့ နယ်စပ်ကုန်သွယ်ရေးဇုန်ဘက်တွင်လည်း TNLA တပ်သားများကို MNDAA ဘက်မှ ဖမ်းဆီးချုပ်နှောင်ထားကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“ကြားတာတော့ နှစ်ဘက်ညှိနှိုင်းတာ မရတဲ့နောက်ဆုံး ကွတ်ခိုင်တစ်မြို့လုံးကို သိမ်းဖို့ ကိုးကန့်ဘက်က အရင်စတိုက်တာ။ ကျင်ဆန်းကျော့ဘက် ၁၀၅ မိုင်ဂိတ်မှာ အခွန်ကောက်တဲ့နေရာက TNLA တပ်သားတွေ အကုန်လုံးကိုလည်း ကိုးကန့်တွေ ဖမ်းချုပ်ထားတယ်” သျှမ်းပြည်မြောက်ပိုင်းမှ အဆိုပါ စစ်ရေးသတင်းရင်းမြစ်က ပြောဆိုသည်။

မတ်လဆန်းပိုင်းတွင် ကွတ်ခိုင်မြို့နယ်ရှိ နမ့်ဟူးလုံကျေးရွာနှင့် လွယ်ဆိုင်ရွာကြားတွင် TNLA နှင့် MNDAA ကြား ပစ်ခတ်မှု ထပ်မံဖြစ်ပွားခဲ့ပြီး မဟာမိတ်တပ်အချင်းချင်း အပြိုင်အဆိုင် စစ်အင်အား ဖြည့်တင်းမှုများ လုပ်ဆောင်ခဲ့ကြောင်း ဒေသခံများက ပြောသည်။

ထို့နောက်တွင် မတ်လ ဒုတိယပတ်မှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ရှိ အေးရှားဝေါလ်တိုးဂိတ်တွင် ကွတ်ခိုင်မြို့ဘက် သွားရောက်မည့် စားသောက်ကုန်၊ ဖရဲသီးနှင့် နာနတ်သီးကဲ့သို့ ကုန်စိမ်းသယ်ဆောင်သည့် ကုန်တင်ကားများကို ဖြတ်သန်းသွားလာခွင့် ပိတ်ပင်လိုက်ပြီး ခရီးသည်တင်ယာဉ်များမှာ အချိန်ကြာမြင့်စွာ စောင့်ဆိုင်းခဲ့ရကြောင်း သိရသည်။

TNLA နှင့် MNDAA ပူးတွဲထိန်းချုပ်ထားသည့် ကွတ်ခိုင်မြို့နယ်အတွင်း နယ်မြေအငြင်းပွားမှု ပြဿနာကို ကူညီဖြေရှင်းပေးရန် ‘ဝ’တပ်ဖွဲ့ UWSA ဦးဆောင်သည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ FPNCC ထံသို့ TNLA ဘက်မှ ဖေဖော်ဝါရီလအတွင်း စာပေးပို့ တောင်းဆိုခဲ့သော်လည်း တစုံတရာ အကြောင်းပြန်ကြားမှု မရှိကြောင်း သိရသည်။

“အခြေအနေ ကြည့်ရတာတော့ ‘ဝ’တပ်ကလည်း TNLA နဲ့ ပတ်သက်ပြီး လိုက်မလုပ်ပေးချင်သလို ဖြစ်နေတယ်။ TNLA ဘက်ကလည်း FPNCC ကို ကူဖြေရှင်းပေးဖို့ စာပို့တဲ့အပြင် ဘောင်ကျော်ပြီးတော့ တရုတ်ဆီကိုလည်း လှမ်းပြောတယ် ကြားတယ်။ အဲ့တော့ ‘ဝ’ကလည်း မျက်နှာပျက်သလို ဖြစ်တော့ သိပ်အရေးမလုပ်ဘူး” ဟု အဆိုပါ စစ်ရေးသတင်းရင်းမြစ်က ထပ်လောင်းပြောသည်။

တရုတ်နှစ်သစ်ကူးမတိုင်မီ ဖေဖော်ဝါရီ (၁၃) ရက်တွင် ကွတ်ခိုင်မြို့ရှိ ကိုးကန့်တပ် MNDAA အုပ်ချုပ်ရေးရုံးများကို TNLA ဘက်မှ ဝင်ရောက်စီးနင်းခဲ့ပြီးနောက် ညီနောင်မဟာမိတ်တပ် အချင်းချင်းကြား အပြန်အလှန် ဖမ်းဆီးရိုက်နှက်မှုကြောင့် နှစ်ဘက်တပ်ဖွဲ့ဝင်များ ထိခိုက်ဒဏ်ရာရခြင်း၊ တပ်ဖွဲ့ဝင်ချင်း ဖမ်းဆီးထိန်းသိမ်းခြင်း၊ ဖြတ်သန်းသွားလာခွင့် ကန့်သတ်ခြင်းနှင့် ကုန်စီးဆင်းမှု ပိတ်ဆို့တားဆီးခြင်းများ ပြုလုပ်ခဲ့သည်။

ထို့ကြောင့် TNLA နှင့် MNDAA မဟာမိတ်တပ်ဖွဲ့ချင်း ဖြစ်ပွားနေသည့် ပြဿနာများကို ပြည်သူလူထုအပေါ် ပုံချခြင်းများ မပြုလုပ်ရန် တောင်းဆိုပြီး နှစ်ဘက်တပ်ဖွဲ့ကြား အငြင်းပွားမှုများကို ဆွေးနွေးညှိနှိုင်းမှု လမ်းစဉ်ဖြင့် အမြန်ဆုံး ပြေလည်မှုရရှိနိုင်ရေး ဖြေရှင်းကြရန် တအာင်း(ပလောင်) အရပ်ဖက်အဖွဲ့အစည်းများကွန်ရက်-TCSN မှ ဖေဖော်ဝါရီလ (၂၄) ရက်တွင် တိုက်တွန်းတောင်းဆိုထားသည်။