သျှမ်းပြည် သိန္နီမြို့ရှိ အေးရှားဝေါလ်တိုးဂိတ်တွင် ကိုးကန့်တပ်ဖွဲ့ MNDAA မှ ကွတ်ခိုင်မြို့ဘက် သွားရောက်မည့် ကုန်တင်ကားများကို ဖြတ်သန်းသွားလာခွင့် ပိတ်ထားကြောင်း စုံစမ်းသိရသည်။

သိန္နီနှင့် ကွတ်ခိုင်မြို့နယ်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA ကြား တစ်လနီးပါးကြာ ဖြစ်ပွားနေသည့် ပဋိပက္ခများ ပြေလည်မှု မရရှိသေးဘဲ မြေပြင်စစ်ရေးတင်းမာမှု ဆက်လက်ဖြစ်ပွားနေပြီး မတ်လ (၂) ရက်တွင် နမ့်ဟူးလုံကျေးရွာနှင့် လွယ်ဆိုင်ရွာကြားတွင် ပစ်ခတ်မှု ထပ်မံဖြစ်ပွားခဲ့သည်။

ထို့နောက်တွင် မတ်လ ဒုတိယပတ်မှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ရှိ အေးရှားဝေါလ်တိုးဂိတ်တွင် ကွတ်ခိုင်မြို့ဘက် သွားရောက်မည့် ကုန်တင်ကားများကို ဖြတ်သန်းသွားလာခွင့် ပိတ်ပင်လိုက်ပြီး ခရီးသည်တင်ယာဉ်များလည်း အချိန်ကြာမြင့်စွာ စောင့်ဆိုင်းနေရကြောင်း သိန္နီဒေသခံများက ပြောသည်။

“အခုကတော့ ပိတ်ထားတုန်းပဲ၊ ကုန်ကားတော့ အသွားအလာ မရသေးဘူ။ အိမ်စီးကားနဲ့ ပစ္စည်းမတင်တဲ့ ကားအလွတ်တွေပဲ သွားလို့ရတယ်။ လမ်းပိတ်ထားတာ ဒီနေ့နဲ့ဆိုရင် ၄ ရက် ရှိနေပြီ။ ကုန်ပါရင် လုံးဝကို ပေးမဖြတ်တာ၊ တချို့ဆိုရင် သိန္နီမှာ ကုန်ပြန်လာချပြီးမှ ခါလီပြန်ထွက်သွားရတာ။ အခုတော့ လမ်းကွေ့တိုင်းမှာ ကားတန်းရှည်ကြီး စောင့်နေတာ” ဟု သိန္နီဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် မူဆယ်နှင့် ကွတ်ခိုင်မြို့ဘက်မှ အဆင်းကားများကိုသာ သိန္နီတိုးဂိတ်တွင် MNDAA ဖြတ်သန်းခွင့် ပြုထားခြင်းကြောင့် လားရှိုးနှင့် သိန္နီမြို့နယ်မှ ထွက်ရှိသည့် ဖရဲသီးတင် ကားများမှာ တရုတ်နိုင်ငံသို့ အချိန်မီ မတင်ပို့နိုင်တော့ဘဲ လမ်းတွင် စွန့်ပစ်ရမည့် အခြေအနေ ရောက်နေကြောင်း ကားသမားများထံမှ သိရသည်။

“လမ်းပိတ်တာ ၄ ရက် ရှိပြီဆိုတော့ ဖရဲသီးနဲ့ ကွမ်းရွက်တွေလည်း ပုပ်နေလောက်ပြီ။ လောလောဆယ် သိန္နီမှာ တခြားကုန်တွေကတော့ ဈေးပုံမှန် ရှိသေးတယ်၊ ဓာတ်ဆီပဲ ဈေးတက်တာ။ ကွတ်ခိုင်နဲ့ နမ့်ခမ်းဘက်ကတော့ နည်းနည်းခက်ခဲမယ်။ ပြည်သူကတော့ တိုက်ပွဲထပ်ဖြစ်မှာ စိုးရိမ်တာပေါ့၊ ဒီလိုပဲ အကြာကြီး လမ်းပိတ်ထားမှာ ကြောက်တယ်လေ” ဟု လားရှိုး-မူဆယ် ခရီးစဉ် ပြေးဆွဲနေသည့် ယာဉ်မောင်းတစ်ဦးက သျှမ်းသံတော်ဆင့်ကို ပြောသည်။

တရုတ်နှစ်သစ်ကူးမတိုင်မီ ဖေဖော်ဝါရီ (၁၃) ရက်တွင် ကွတ်ခိုင်မြို့ရှိ ကိုးကန့်တပ် MNDAA အုပ်ချုပ်ရေးရုံးများကို TNLA ဘက်မှ ဝင်ရောက်စီးနင်းခဲ့ပြီးနောက် လားရှိုး-သိန္နီကြားရှိ ရေပူစစ်ဆေးရေးဂိတ်နှင့် သိန္နီ-ကွတ်ခိုင်ကြားရှိ အေးရှားဝေါလ်တိုးဂိတ်တို့တွင် MNDAA ဘက်မှ ခရီးသည်ယာဉ်များပေါ် လက်နက်ခဲယမ်းများ တင်ဆောင်မှု ရှိ၊ မရှိ စစ်ဆေးတင်းကြပ်ခဲ့ကြောင်း ခရီးသွားများထံမှ သိရသည်။

လက်ရှိတွင် TNLA နှင့် MNDAA ပူးတွဲထိန်းချုပ်ထားသည့် ကွတ်ခိုင်မြို့နယ်တွင် နှစ်ဘက်တပ်ဖွဲ့ကြား မြေပြင်စစ်ရေးတင်းမာမှု ဆက်လက်ဖြစ်ပွားနေပြီး မဟာမိတ်တပ်အချင်းချင်း အပြိုင်အဆိုင် စစ်အင်အား ဖြည့်တင်းမှုများ လုပ်ဆောင်နေကြောင်း ဒေသခံများက ပြောသည်။

အဆိုပါ နယ်မြေအငြင်းပွားမှု ပြဿနာကို ကူညီဖြေရှင်းပေးရန် ‘ဝ’တပ်ဖွဲ့ UWSA ဦးဆောင်သည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ FPNCC ထံသို့ TNLA ဘက်မှ ဖေဖော်ဝါရီလအတွင်း စာပေးပို့ တောင်းဆိုခဲ့သည်။

ထိုအတောအတွင်း TNLA နှင့် MNDAA နှစ်ဘက်တာဝန်ရှိသူများမှ နှစ်ကြိမ်တိုင်တိုင် တွေ့ဆုံဆွေးနွေးခဲ့သော်လည်း သဘောတူညီမှု တစုံတရာ မရရှိခဲ့ကြောင်း စစ်ရေးသတင်းရင်းမြစ်ထံမှ သိရသည်။