သျှမ်းပြည် ဖယ်ခုံမြို့နယ် အနောက်ဘက်ခြမ်းတွင် စက်သုံးဆီ အခက်အခဲများကြောင့် စစ်ရှောင်များအတွက် ရေရရှိရန်အခက်အခဲများရှိနေကြောင်း စုံစမ်းသိရသည်။
ဖယ်ခုံမြို့နယ် အတွင်းနေထိုင်သော စစ်ရှောင်များသည် သောက်သုံးရေရရှိရန်အတွက် တနာရီခွဲ ကားဖြင့် သွားရောက်ယူဆောင်ရသည်။
ထို့ကြောင့် လက်ရှိ စက်သုံဆီများ ပြတ်လပ်မှု၊ စျေးနှုန်းမြင့်တက်မှုကြောင့် စစ်ရှောင်များအသုံးပြုသည့် သောက်သုံးရေကို သွားရောက်သယ်ယူရန် ခက်ခဲမှုဖြစ်နေကြောင်း စစ်ရှောင်များကို ကူညီပေးနေသည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ဆီတွေက သိပ်မရှိတော့ အရင်လိုစစ်ရှောင်တွေကို ရေကူညီသယ်ပေးဖို့က သိပ်အဆင်မပြေဘူးဗျ။ ကျတော်တို့ ရေလှူနေတာကိုလည်းရပ်နားထားရတယ်။မဖြစ်မနေ ရေအရမ်းလိုအပ်နေတဲ့ နေရာလောက်ပဲ လိုက်ကူညီပေးနိုင်တော့မှာပါ။”ဟု စစ်ဘေးရှောင်ကူညီနေသည့် အမျိုးသားတစ်ဦးက ပြောသည်။
လက်ရှိ ဖယ်ခုံမြို့နယ် အနောက်ဘက်ခြမ်းတွင် နေထိုင်နေသော စစ်ရှောင် ဉီးရေ (၆)ထောင်ကျော် ရှိကြောင်း သိရသည်။
လက်ရှိ ဖယ်ခုံမြို့နယ် အနောက်ဘက်ခြမ်းတွင် စက်သုံးဆီဓာတ်ဆီ တစ်ဂါလန်လျှင် ကျပ် နှစ်သောင်းခွဲ ဝန်းကျင် အထိရှိနေသည့်အပြင် စက်သုံးဆီရရန်လည်း ခက်ခဲကာ ဒီဇယ်များလည်း ပြတ်လပ်နေကြောင်း စစ်ရေးသတင်းအရင်းမြစ်တစ်ဦးက ပြောသည်။
“ ဒီမှာက ဒီဇယ် တစ်ဂါလန် ကို နှစ်သောင်းခွဲ လောက်ဖြစ်နေပြီ။ ဒါပေမယ့် ဆီက ရှိကိုမရှိတာ။ အခက်အခဲကတော့ အများကြီးပါပဲ။ စားဖို့ နောက်သောက်သုံးရေတွေသယ်ဖို့ တော်တော်ခက်သွားပြီ”ဟု ၎င်းက ဆိုသည်။
ဖယ်ခုံမြို့နယ် အနောက်ဘက်ခြမ်းတွင် ရောက်ရှိနေသည့် စစ်ဘေးရှောင် (၆)ထောင်သည် ၂၀၂၅ခုနစ် နိုဝင်ဘာလ၌ စစ်ကောင်စီနှင့် ပအိုဝ်းပြည်သူ့စစ် (PNO )တို့ ပူးပေါင်းပြီး ကရင်နီတော်လှန်ရေးတပ်ပေါင်းစုတို့ တိုက်ပွဲဖြစ်ပွားမှုကြောင့် ထွက်ပြေးလာသည့် စစ်ရှောင်များဖြစ်သည်။
Leave a Comments