သျှမ်းပြည်တွင် စက်သုံးဆီပြတ်လပ်မှု နှင့် စက်သုံးဆီ ဈေးမြင့်တက်လာမှုကြောင့် ကားခ ဈေးနှုန်း မြင့်တက်လာကြောင်း စုံစမ်းသိရသည်။

ယခင်က တာချီလိတ်မြို့ မှ မိုင်းရှူးမြို့သို့ တစ်ဦးလျှင် ငွေကျပ် နှစ်သိန်း သာပေးရပြီး လက်ရှိတွင် တစ်ဉီးလျှင် ကျပ်ငွေ နှစ်သိန်းခွဲအထိ ဈေးနှုန်းမြင့်တက်လာကြောင်းကို တာချီလိတ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကားခတွေကတော့ ဈေးတက်တယ်။ဆီဈေးတွေ တက်နေတာနဲ့ ကားခတွေကဈေးတက်တာ။အရင်က နှစ်သိန်းဆိုပေမဲ့ အခုက နှစ်သိန်းခွဲလောက်ရှိတယ်။ဆီတွေပြတ် ဈေးတွေတက်လာတဲ့ အချိန်မှ ဈေးတင်သွားတာပါ။”ဟု တာချီလိတ်မြို့ ဒေသခံ အမျိုးသားတစ်ဦးက ပြောသည်။

ထိုင်းနိုင်ငံသည် ပြီးခဲ့သည့် မတ်လ ၁ ရက် မှစပြီး ပြည်ပသို့ စက်သုံးဆီတင်ပို့ရောင်းချမှုကို ဆိုင်းငံ့ ပြီးနောက် မြန်မာ – ထိုင်းနယ်ဖြစ်သည့် တာချီလိတ်မြို့တွင် စက်သုံးဆီပြတ်လပ်မှု၊ ဈေးနှုန်းမြင့်တက်လာမှုတို့ ကြုံတွေ့ခဲ့ရသည်။

ယခင်တွင် စက်သုံးဆီ ဓာတ်ဆီတစ်လီတာလျှင် ၂၅၀၀ ကျပ် ဝန်းကျင်သာရှိပြီး လက်ရှိတွင် ဆီပြတ်လပ်မှုများကြောင့်တစ်လီတာလျှင် ၃၀၀၀ ကျပ်သာ ရောင်းချပြီး ဆိုင်ကယ်တစ်စီးလျှင် ဘတ် ၅၀ ဖိုးသာ ထားကြောင်းနှင့် အချိန်အကန့်အသတ်ဖြင့်သာရောင်းချဖွင့်လှစ်ကြောင်း တာချီလိတ်ဒေသခံများကပြောသည်။

ထိုစက်သုံးဈေးနှုန်း မြင့်တက်မှုကြောင့် ကုန်ဈေးနှုန်းမြင့်တက်လာမည်ကိုလည်း ဒေသခံများက စိုးရိမ်နေကြောင်း တာချီလိတ်မြို့ ဒေသခံများက ပြောသည်။

အလားတူ သျှမ်းပြည် အချို့မြို့နယ်များတွင် စက်သုံးဆီ စတင်ပြတ်လပ်နေပြီး အချို့ဆိုင်များတွင် အကန့်သတ်ဖြင့်ရောင်းချနေရကြောင်း သိရသည်။