သျှမ်းပြည်မြို့တော် တောင်ကြီးမြို့တွင် စက်သုံးဆီများကို အလုအယက် ဝယ်ယူနေကြပြီး ကိုယ်စားဝယ်ယူ တန်းစီပေးလျှင် တန်းစီခအဖြစ် ငွေကျပ် သုံးသောင်းအထိ ပေါက်ဈေးရှိကြောင်း သတင်းရရှိသည်။

ပြီးခဲ့သည့် မတ်လ(၁)ရက်‌နေ့မှ စပြီး ထိုင်းနိုင်ငံမှ စက်သုံးဆီတင်ပို့မှုကို ရပ်ဆိုင်းလိုက်ပြီးနောက် တောင်ကြီးမြို့အပါအဝင် မြန်မာနိုင်ငံတစ်ဝှမ်းတွင် စက်သုံးဆီများ အလုအယက် ဝယ်ယူနေကြပြီး အချိန်မပေးနိုင်သူများက အငှားတန်းစီခ တစ်ရက်လျှင် ငွေကျပ် သုံးသောင်းပေးပြီး စောင့်ခိုင်းနေကြောင်း တောင်ကြီးဒေသခံ အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

“တစ်ခါတစ်ခါ ဆီတန်းစီရင် နေ့တစ်ဝက်လောက် ကုန်တယ်၊ တစ်ချို့ဆို တစ်နေ့ကုန်တယ်။ ဒါတောင် မရလိုက်တဲ့သူ ရှိသေးတယ်၊ အဲလောက်ကြာတော့ ဘယ်သူမှ အချိန်မပေးနိုင်ဘူး။ ဒါကြောင့် လူငှားတန်းစီခိုင်းရတယ်၊ တစ်ရက် သုံးသောင်းကျပ် ပေးရတယ်။ ရင်းနှီးတဲ့သူဆို တစ်သောင်းပေးပြီး စောင့်ခိုင်းရတယ်”ဟု တောင်ကြီးဒေသခံ အမျိုးသမီးတစ်ဦးက ‌ပြောသည်။

ထို့အပြင် စက်သုံးဆီများကို ရေသန့်ဗူး တစ်လီတာဗူးများဖြင့် စုဆောင်းကာ အွန်လိုင်းလူမှုကွန်ရက်ပေါ်တွင် တစ်လီတာလျှင် ငါးထောင်ကျပ်အထက်နှင့် ရောင်းဝယ်နေကြသူများလည်း ရှိကြောင်း ၎င်းက ဆက်ပြောသည်။

ထိုသို့ စက်သုံးဆီများ ပြတ်လပ်နေချိန် လျှပ်စစ်ဖြင့် မောင်းနှင်ရသော မော်တော်ယာဉ်နှင့် ကားများ ပိုမိုရောင်းချနေရပြီး ဒေသခံ အများစု သွားလာရေး ခက်ခဲနေကြောင်း မြို့ခံများထံမှ သိရသည်။

“ဆီတွေပြတ်တော့ လျှပ်စစ်ကား၊ ဆိုင်ကယ်တွေ ပိုအရောင်းထွက်တာပေါ့၊ ဆီဆိုင်တွေဆို ဒီအချိန် အခွင့်ကောင်းယူ ဈေးတင်ရောင်းပြီး အကျိုးအမြတ်တွေ အများကြီးရနေတာ၊ ကုန်ဈေးနှုန်းဆိုလည်း နှစ်ဆလောက် တက်ကုန်ပြီ၊ လုပ်စားရတာ အဆင်မပြေတော့ဘူး”ဟု မြို့ခံ အမျိုးသားတစ်ဦးက ပြောသည်။

သျှမ်းပြည် မြို့နယ်အချို့တွင် စက်သုံးဆီများ နေ့စဉ်အလုအယက် ဝယ်ယူသိုလှောင်ထားမှုကြောင့် ဆီဈေးနှုန်းများ နှစ်ဆ မြင့်တက်လာပြီး ဆီပြတ်လပ်မှုများ စတင်ကြုံတွေ့လာရသည်။

လက်ရှိ တောင်ကြီးမြို့တွင် စက်သုံးဆီ တစ်လီတာလျှင် ငွေကျပ် ၃၆၀၀ မှ ၄၀၀၀ အထိ မြင့်တက်နေသည်။

အလားတူ ရွာငံမြို့နယ်တွင်လည်း စက်သုံးဆီ တစ်လီတာလျှင် ငွေကျပ် (၈၀၀၀) အထိ မြင့်တက်နေပြီး ဆိုင်ကယ်တစ်စီးလျှင် ငွေကျပ် ငါးထောင်ဖိုးသာ ရောင်းချပေးတော့ကြောင်း သိရသည်။

အရှေ့အလယ်ပိုင်း အီရန် စစ်ပွဲ အခြေအနေကြောင့် ထိုင်းနိုင်ငံမှ ပြီးခဲ့သည့် မတ်လ ၁ ရက်တွင် ပြည်ပသို့ စက်သုံးဆီ တင်ပို့ရောင်းချမှုကို ဆိုင်းငံ့ပြီးနောက်ပိုင်း စက်သုံးဆီ ပြတ်လပ်မှုပြဿနာ ဖြစ်လာခြင်း ဖြစ်သည်။