သျှမ်းပြည် မိုင်းရှူးမြို့နယ်၊ ကျေးသီးမြို့နယ်၊ မိုင်းရယ်မြို့နယ်တို့တွင် စက်သုံးဆီ စတင်ပြတ်လပ်လာပြီး အချို့ဆိုင်များအကန့်သတ်ဖြင့်ရောင်းကာ ဓာတ်ဆီတစ်လီတာလျှင် ၅၀၀၀ ကျပ် အထိရှိနေကြောင်း သတင်းရရှိသည်။
ယနေ့ (မတ်လ ၄ ရက်) မိုင်းရှူးမြို့နယ်၊ ကျေးသီးမြို့နယ် နှင့် ရှမ်းပြည် တိုးတက်ရေးပါတီ၊ ရှမ်းပြည် တပ်မတော် SSPP/SSA ဌာနချုပ်ရှိရာ ဝမ်ဟိုင်းဒေသတွင် စက်သုံးဆီ ပြတ်လပ်မှုများ စတင် ကြုံတွေ့နေရသည့်အပြင် ဓာတ်ဆီတစ်လီတာလျှင် ၅၀၀၀ ကျပ် အထိရှိနေကြောင်း မိုင်းရှူးမြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“ဝမ်ဟိုင်းထဲမှာတော့ မရှိတော့ဘူး။ တချို့ဆိုင်တွေကလည်း ပိတ်ထားတယ်။ ဖုန်းလိုင်းမရတဲ့ရွာတွေမှာ သွားထည့်ရတာ။ ဒီမိုင်းရှူးဘက်နဲ့ ဝမ်ဟိုင်းဘက်တွေမှာတော့ ဓာတ်ဆီတစ်လီတာကို ၅၀၀၀ ကျပ် လောက် ပေးဝယ်နေရပြီ။ မနေ့က သွားဝယ်တာ ၁ လီတာပဲရလာတာ။”ဟု မိုင်းရှူးမြို့နယ်ဒေသခံ အမျိုးသားတစ်ဦး ပြောသည်။
အလားတူ မိုင်းရယ်မြို့နယ်တွင်လည်း စက်သုံးဆီဆိုင်များ အချိန်အကန့်သတ်ဖြင့် ရောင်းချနေသည့်အပြင် ဓာတ်ဆီများကိုလည်း အကန့်သတ်ဖြင့်ရောင်းချနေကြောင်း မိုင်ရယ်မြို့နယ်ဒေသခံ အမျိုးသားတစ်ဦးက ထပ်မံလောင်းပြောသည်။
“မိုင်းရယ်ဘက်မှာလည်း ဒီဇယ်တွေ ဝယ်လို့မရဘူး။ ပြီးတော့ ဓာတ်ဆီ တစ်လီတာကို ၅၀၀၀ ကျပ်ထိရှိတယ်။ ကားတွေဆိုင်ကယ်တွေကိုလည်း အကန့်အသတ်နဲ့ ထည့်ပေးတာ။ ကားဆို ၁ သိန်းထိပဲရတယ်။ ပိတ်ထားတဲ့ ဆီဆိုင်တွေကတော့များတယ်။”ဟု မိုင်းရယ်မြို့နယ်ဒေသခံ အမျိုးသားတစ်ဦးက ပြောသည်။
ယခင်တွင် စက်သုံးဆီ ဓာတ်ဆီတစ်လီတာလျှင် ၂၅၀၀ ကျပ် ဝန်းကျင်သာရှိပြီး လက်ရှိတွင် ဆီပြတ်လပ်မှုများကြောင့်တစ်လီတာလျှင် ၅၀၀၀ ကျပ် အထိရှိနေကြောင်း သိရသည်။
အရှေ့အလယ်ပိုင်း စစ်ပွဲအခြေနေကြောင့် ထိုင်းနိုင်ငံမှ ပြီးခဲ့သည့် (မတ်လ ၁ ရက်) တွင် ပြည်ပသို့ စက်သုံးဆီ တင်ပို့ရောင်းချမှုကို ဆိုင်းငံ့ပြီးနောက် သျှမ်းပြည်နယ်အတွင်းရှိ စက်သုံးဆီ စတင်ပြတ်လပ်မှု ကြုံတွေ့လာရကြောင်း သိရသည်။
Leave a Comments