သျှမ်းပြည် ကွတ်ခိုင်မြို့နယ်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA အကြား စစ်ရေးတင်းမာမှု ဆက်ရှိနေပြီး ပစ်ခတ်မှု ထပ်မံဖြစ်ပွားခဲ့ကြောင်း စုံစမ်းသိရသည်။

TNLA နှင့် MNDAA ပူးတွဲထိန်းချုပ်ထားသည့် ကွတ်ခိုင်မြို့နယ်တွင် နှစ်ဘက်တပ်ဖွဲ့ကြား မဟာမိတ်အချင်းချင်း စစ်ရေးတင်းမာမှု ဆက်ရှိနေပြီး မတ်လ (၂) ရက်တွင် နမ့်ဟူးလုံကျေးရွာနှင့် လွယ်ဆိုင်ရွာကြားတွင် ပစ်ခတ်မှု ထပ်မံဖြစ်ပွားခဲ့ကြောင်း ကွတ်ခိုင်ဒေသခံများက ပြောသည်။

“နမ့်ဟူးလုံနဲ့ လွယ်ဆိုင်ရွာနားလို့ ကြားတယ်၊ မဟာမိတ် အချင်းချင်း ဘာကြောင့် ထပ်ပစ်နေကြလဲ မသိဘူး။ ဒီတစ်ခါတော့ ကိုးကန့်ဘက်က သေနတ်အရင် စ,ဖောက်တယ်လို့ ပြောတယ်” ဟု ကွတ်ခိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဖေဖော်ဝါရီလ (၁၃) ရက်မှ စတင်ပြီး ကွတ်ခိုင်မြို့ရှိ ကိုးကန့်တပ် MNDAA အုပ်ချုပ်ရေးရုံးများကို TNLA ဘက်မှ ဝင်ရောက်စီးနင်းခဲ့ပြီးနောက် ညီနောင်မဟာမိတ်တပ် အချင်းချင်းကြား စစ်ရေးတင်းမာမှုများ စတင်ခဲ့သည်။

ကွတ်ခိုင်နှင့် သိန္နီမြို့နယ်အတွင်း TNLA နှင့် MNDAA ကြား သုံးပတ်ကျော်ကြာ ဖြစ်ပွားနေသည့် ပဋိပက္ခများကြောင့် မြေပြင်စစ်ရေးတင်းမာမှု ဖြစ်ပွားနေပြီး အပြန်အလှန် ရိုက်နှက်မှုကြောင့် နှစ်ဘက်တပ်ဖွဲ့ဝင်များ ထိခိုက်ဒဏ်ရာရခြင်း၊ မဟာမိတ်တပ်ဖွဲ့ဝင် အချင်းချင်း ဖမ်းဆီးထိန်းသိမ်းခြင်းများ ဖြစ်ပွားနေသည်။

ထိုအတောအတွင်း TNLA နှင့် MNDAA နှစ်ဘက်တာဝန်ရှိသူများမှ လောက်ကိုင်မြို့နှင့် ‘ဝ’ဒေသ ပန်ဆန်းမြို့တို့တွင် တွေ့ဆုံဆွေးနွေးခဲ့ပြီး တစုံတရာ ရလဒ်မထွက်ဘဲ ပြီးဆုံးခဲ့ကြောင်း စစ်ရေးသတင်းရင်းမြစ်ထံမှ သိရသော်လည်း သက်ဆိုင်ရာ နှစ်ဘက်တပ်ဖွဲ့မှ သတင်းထုတ်ပြန်ခြင်း မရှိပေ။

TNLA နှင့် MNDAA နှစ်ဘက်တပ်ဖွဲ့ကြား အငြင်းပွားမှု နောက်ဆက်တွဲအနေဖြင့် မြေပြင်ရှိ ပြည်သူလူထုများကို ပစ်မှတ်ထား ရိုက်နှက်ဖမ်းဆီးခြင်း၊ ဖြတ်သန်းသွားလာခွင့် ကန့်သတ်ခြင်း၊ ကုန်စီးဆင်းမှု ပိတ်ဆို့တားဆီးခြင်း ပြုလုပ်ပြီး လူမျိုးရေးပဋိပက္ခ အသွင်ဆောင်သည့် ပြဿနာဖန်တီးနေသည့် အပြုအမူများ ဖြစ်ပွားနေခြင်းကြောင့် ပြည်သူလူထုများ ကြားညှပ်ပြီး ဓားစာခံအဖြစ် ခါးစည်းခံနေရကြောင်း တအာင်း(ပလောင်) အရပ်ဖက်အဖွဲ့အစည်းများ ကွန်ရက်မှ ဖေဖော်ဝါရီလ ၂၄ ရက်တွင် စုပေါင်းထုတ်ပြန်ခဲ့သည်။

TNLA နှင့် MNDAA မဟာမိတ်တပ်ဖွဲ့ချင်း ဖြစ်ပွားနေသည့် ပြဿနာများကို ပြည်သူလူထုအပေါ် ပုံချခြင်းများ မပြုလုပ်ရန် တောင်းဆိုပြီး နှစ်ဘက်တပ်ဖွဲ့ကြား အငြင်းပွားမှုများကို ဆွေးနွေးညှိနှိုင်းမှု လမ်းစဉ်ဖြင့် အမြန်ဆုံး ပြေလည်မှုရရှိနိုင်ရေး ဖြေရှင်းကြရန် တအာင်း(ပလောင်) အရပ်ဖက်အဖွဲ့အစည်းများကွန်ရက်-TCSN မှ တိုက်တွန်းထားသည်။