သျှမ်းပြည် အရှေ့ပိုင်း တာချီလိတ်မြို့နယ်အတွင်း စက်သုံးဆီ တစ်လီတာလျှင် ဘတ် (၂၀၀) ထိရှိလာပြီး အလုအယက်ဝယ်ယူနေကြကြောင်း သတင်းရရှိသည်။

ထိုင်းနိုင်ငံမှ စက်သုံးဆီတင်ပို့ရောင်းချမှုကို ယနေ့(မတ် ၂)ရက် မနက်ပိုင်းတွင် ရပ်ဆိုင်းလိုက်ကြောင်း သတင်းထွက်လာပြီးနောက် သျှမ်းပြည် အရှေ့ပိုင်းရှိ စက်သုံးဆီဆိုင်များ၌ ဆီများကို အလုအယက် ဝယ်ယူနေကြပြီး၊ အကန့်အသတ်ဖြင့် ရောင်းချနေကြောင်း တာချီလိတ်ဒေသခံ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“တာချီလိတ်မှာတော့ စက်သုံးဆီတွေ အလုယက်ပြေးဝယ်နေကြတာ။ အခုဆီတွေမရှိလို့ ရှုပ်နေကြတာ။ အပြင်မှာတော့ ရေသန့်ဗူး တစ်လီတာ ဘတ် ၂၀၀ ရှိတယ်” ဟု ၎င်းအမျိုးသမီး တစ်ဉီးက ပြောသည်။

လက်ရှိအခြေအနေအရ တာချီလိတ်မြို့တွင်း စက်သုံးဆီများကို တန်းစီဝယ်နေရသည့်အဆင့်ဖြစ်ပြီး၊ စက်သုံးဆီ ပြတ်လပ်မှုကြား ရေသန့်ဗူး၊ အချိုရည်ဗူး တစ်လီလျှင် ထိုင်းဘတ်ငွေ ၂၀၀(မြန်မာကျပ်ငွေ တစ်သောင်းခွဲ အထက်)ဖြင့် ရောင်းချနေကြောင်း တာချီလိတ်ဒေသခံများက ပြောသည်။

“ဆီတွေ ပြတ်တော့ တချို့တွေက စီးပွားရေး စတာပဲ။ရေသန့်ဗူးတစ်ဗူးကို ၂၀၀ ဘတ်နဲ့ ရောင်းနေကြတယ်။တစ်ရက် တစ်ရက် မရိုးရဘူး။”ဟု တာချီလိတ်မြို့ ဒေသခံ အမျိုးသမီးတစ်ဦးက ပြောသည်။

အရှေ့အလယ်ပိုင်း စစ်ပွဲအခြေနေကြောင့် ထိုင်းနိုင်ငံမှ ပြီးခဲ့သည့် (မတ်လ ၁ ရက်)တွင် ပြည်ပသို့ စက်သုံးဆီ တင်ပို့ရောင်းချမှုကို ဆိုင်းငံ့ပြီးနောက် မြန်မာ – ထိုင်းနယ်စပ် သျှမ်းပြည် အရှေ့ပိုင်းတွင် စက်သုံးဆီ အလုအယက် ဝယ်ယူနေကြကြောင်းဖြစ်သည်။

ထို့ပြင် ထိုင်းနိုင်ငံအနေဖြင့် စက်သုံးဆီ လီတာ သန်း (၇၆၆၀)ရှိပြီး ၎င်းပမာဏသည် ထိုင်းနိုင်ငံအတွက် ရက်ပေါင်း ၆၀ စာ လုံလောက်ကြောင်း သိရသည်။

ထို့ကြောင့် ထိုင်းနိုင်ငံသည် ၎င်းတို့ ပြည်ပမှတင်သွင်းထားသော စက်သုံးဆီများကို မြန်မာ၊ လာအို နှင့် ကမ္ဘောဒီးယားနိုင်ငံများသို့ ပြန်လည်တင်ပို့ပေးနေပြီး၊ သျှမ်းပြည် အရှေ့ပိုင်းတွင်လည်း ထိုင်းနိုင်ငံ နှင့် လာအိုနိုင်ငံမှ ဝင်လာသည့် စက်သုံးဆီကို အဓီကမှီခိုအသုံးပြုနေရကြောာင်း သိရသည်။