သျှမ်းပြည် တောင်ပိုင်း မောက်မယ်မြို့နယ် အတွင်း ပအိုဝ်းအမျိုးသားလွတ်မြောက်ရေးတပ်မတော် (PNLA/PNLO) နှင့် ပအိုဝ်းပြည်သူ့စစ် (PNA/PNO)တို့ တိုက်ပွဲဖြစ်ပြီးနောက် PNOက စစ်မှုထမ်း အသည်းအသန်း ထပ်မံခေါ်ယူနေကြောင်း သတင်းရရှိသည်။

အဆိုပါ PNA/PNO သည် တောင်ကြီးမြို့နယ်နှင့် ညောင်ရွှေမြို့နယ်အတွင်းနေထိုင်သူများကို အဓိက ပစ်မှတ်ထားခေါ်ယူနေသည်။

“အရင်က PNOထံမှာ စစ်သင်တန်း သွားတက်ထားတဲ့ သူတွေကို အဓိက ခေါ်နေတာ၊ ရပ်ရွာကာကွယ် ဖို့ဆိုပြီး (၇)ရက် တစ်ပတ် သင်တန်း သွားတက်ထားတဲ့ သူကို ခေါ်တာ၊ အစကနေ ပြန်ပေးစရာမလိုတော့ဘူးလေ၊ ရှေ့တန်း တန်းပို့လို့ရတာပေါ့၊ တိုက်ပွဲဖြစ်တော့ သူတို့ဖက် အထိခိုက်များတယ် လို့သိရတယ်၊အဲကြောင့် ခေါ်တာထင်တယ်။”ဟု အင်းလေး ဒေသခံ အမျိုးသားတစ်ဦးက ပြောသည်။

PNO ခေါ်ယူနေသည့် စစ်မှုထမ်းများသည် ယခင်က PNO ထံ စစ်သင်တန်းလာရောက်တက်ဖူးသည့် လူငယ်များကို ပစ်မှတ်ထားခေါ်ယူနေကြောင်း သိရသည်။

ယခင်ကာလအတွင်း ခေါ်ဆောင်သွားခံရသည့် တောင်ကြီးမြို့နယ်မှ လူငယ်များသည် ရှေ့တန်းအတွင်း သေဆုံးမှုများရှိသဖြင့် PNO ထံ စစ်မှုထမ်းရန် အတွက် လူငယ်များက စိုးရိမ်စိတ်ဖြစ်နေကြောင်း ၎င်းက ဆက်ပြောသည်။

ဆက်လက်ပြီး PNOဘက်မှ လက်ရှိ နိုင်ငံရေးမတည်ငြိမ်မှုကြောင့် အသက် ၁၈ မှ ၃၅ နှစ် လူငယ်များကို မိမိရပ်ရွာ ကာကွယ်ရန်အတွက် စစ်မှုထမ်းခေါ်ခြင်းသာဖြစ် ကြောင်း PNO မှ အရာရှိတစ်ဦးက ပြောသည်။

“စစ်မှုထမ်း ခေါ်တာတော့ မဟုတ်ဘူး၊ အသက် ၁၈ နဲ့ ၃၅ကြားလူတွေကိုတော့ လက်ရှိနိုင်ငံရေး မတည်ငြိမ်သ၍တော့ ကိုယ့်ရပ်နဲ့ လှုပ်ရှားနယ်မြေ ကာကွယ်ဖို့ အတွက် ခေါ်တာပေါ့၊ သင်တန်းက အမျိုးမျိုးရှိတယ် တစ်လ ရှိတယ် ၆ လရှိတယ်၊ ကိုယ့်ရပ်ရွာကို သူများတွေ မကျူးကျော်အောင် ကာကွယ်ဖို့ ပဲ။”ဟု အဆိုပါ PNOမှ အရာရှိတစ်ဦးက ပြောသည်။

လက်ရှိ တောင်ကြီးမြို့နယ်၊ ညောင်ရွှေမြို့နယ်နှင့် ဟိုပုံးမြို့နယ်တို့တွင် စစ်ကော်မရှင်တပ်နှင့် PNO တပ်ပူးပေါင်းကာ ပေါ်တာဆွဲဖမ်းဆီးခြင်း၊ စစ်မှုထမ်းခေါ်ဆောင်ခြင်းများ ခပ်စိတ်စိတ်ကြားလာရသည်။

စစ်ကော်မရှင်၏ ရွေးကောက်ပွဲကာလအတွင်း စစ်မှုထမ်းခေါ်ယူမှု ရပ်နားထားသော်လည်း ပြီးခဲ့သည့် ဇန်နဝါရီလအတွင်း ရွေးကောက်ပွဲ ပြီးနောက် ဖေဖော်ဝါရီလ ပထမပတ်မှ စပြီး စစ်မှုထမ်း အမှတ်စဉ် (၂၀)ကို အင်းလေးဒေသတွင် ထပ်မံခေါ်ယူနေသည်။

ပြီးခဲ့သည့် ၂၀၂၅ ခုနှစ် ဩဂုတ်လတွင်လည်း ပအိုဝ်းပြည်သူ့စစ် (PNA/PNO)တို့က အင်းလေးဒေသ စစ်မှုထမ်းကြေးအတွက် တစ်အိမ်လျှင် ငွေကျပ် ငါးသိန်းတောင်းခံပြီး မပေးနိုင်ပါက စစ်မှုထမ်းခိုင်း၍ ရှေ့တန်း ပို့ဆောင်မှုများ ရှိခဲ့သည်။