သျှမ်းပြည် လားရှိုးမြို့နယ် မန်စယ်ကျေးရွာအုပ်စုတွင် ရွှေတူးဖော်မှုကို ကန့်ကွက်ခြင်းကြောင့် ကိုးကန့်တပ်ဖွဲ့ MNDAA ဖမ်းဆီးထားသည့် ဆန္ဒပြရွာသား (၅) ဦးသည် ယနေ့အချိန်ထိ ပြန်မလွှတ်သေးကြောင်း စုံစမ်းသိရသည်။

MNDAA ရွှေတူးဖော်မှုကို ကန့်ကွက်ဆန္ဒပြခဲ့သည့် မန်စယ်ရွာသား (၃၆) ဦးကို ကိုးကန့်တပ်သားများမှ ဖေဖော်ဝါရီလ (၁) ရက် ညနေပိုင်းတွင် သိန္နီမြို့ဘက်သို့ ဖမ်းဆီးခေါ်ဆောင်သွားခဲ့ပြီး ဦးဆောင်ဆန္ဒပြသူနှင့် နောက်ကွယ်မှ စည်းရုံးလှုံ့ဆော်သူများကို ရှာဖွေရန် ရိုက်နှက်စစ်ဆေး မေးမြန်းခဲ့ကြောင်း နမ့်ပေါင်ဒေသခံများထံမှ သိရသည်။

ပြီးခဲ့သည့် ဖေဖော်ဝါရီလ (၂) ရက်တွင် လားရှိုးမြို့နယ် နမ့်ပေါင်တိုက်နယ်ရှိ ကျေးရွာဥက္ကဋ္ဌနှင့် ရပ်မိရပ်ဖများမှ သိန္နီမြို့ရှိ MNDAA တာဝန်ရှိသူများထံ သွားရောက်ညှိနှိုင်းခဲ့ချိန်တွင် ဆန္ဒပြသူ (၂၇) ဦးကို ပြန်လည်လွှတ်ပေးခဲ့ပြီး (၉) ဦးကို ဆက်လက်ဖမ်းဆီး ထိန်းသိမ်းထားခဲ့သည်။

“၉ ရက်နေ့က ၄ ယောက် ပြန်လွှတ်လာတယ်၊ ကျန်တဲ့ ၅ ယောက်ကိုတော့ လောက်ကိုင်မှာ နှစ်ချုပ်အစည်းအဝေး တက်ပြီး လူကြီးတွေ ပြန်လာမှ လွှတ်ပေးမယ်လို့ ပြောတယ်။ ဘယ်နေ့လွှတ်ပေးမလဲ သေချာမသိရဘူး၊ ကိုးကန့်ဘက်က အခုထိ ဖမ်းခံထားတဲ့ ၅ ယောက်ကို ပြန်မလွှတ်သေးလို့ သူတို့ရဲ့ ကျန်းမာရေး စိတ်ပူတယ်” ဟု နမ့်ပေါင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုအတောအတွင်း ဖမ်းဆီးခံထားသည့် လားရှိုးဒေသခံများကို ပြန်လွှတ်ပေးရန် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) မှ MNDAA ဌာနချုပ်သို့ စာပေးပို့ ညှိနှိုင်းခဲ့ပြီး သျှမ်းအရပ်ဖက် အဖွဲ့အစည်းများလည်း ကြေညာချက် အသီးသီး ထုတ်ပြန်တောင်းဆိုခဲ့သည်။

ထို့နောက် ဖေဖော်ဝါရီလ (၉) ရက် ညနေ ၃ နာရီခန့်တွင် သိန္နီမြို့၌ ဖမ်းဆီးခံထားရသည့် ဆန္ဒပြသူ (၉) ဦးထဲမှ (၄) ဦးကို MNDAA ဘက်မှ ပြန်လွှတ်ပေးခဲ့သော်လည်း လက်ရှိ သတင်းရေးသားချိန်အထိ ကျန် (၅) ဦးကို သီတင်းနှစ်ပတ်ကျော်ကြာ ဆက်လက် ဖမ်းဆီးထားကြောင်း နမ့်ပေါင်ဒေသခံများထံမှ သိရသည်။

လက်ရှိအခြေအနေတွင် မန်စယ်ရွာသား (၅) ဦးကို MNDAA ဘက်မှ ဆက်လက် ဖမ်းဆီးထားခြင်းကြောင့် ၎င်းတို့၏ အသက်အန္တရာယ်နှင့် ကျန်းမာရေး စိုးရိမ်ရပြီး ဒေသအကျိုးစီးပွား အလို့ငှာ ဆန္ဒဖော်ထုတ်ကြသည်ကို နှောင့်ယှက်ဟန့်တားရုံမက အဓမ္မ ရိုက်နှက် ဖမ်းဆီးချုပ်နှောင်ခြင်းကို လုံးဝ လက်မခံနိုင်ကြောင်း သျှမ်းလူငယ်ကွန်ဂရက် အပါအဝင် သျှမ်းလူငယ်အဖွဲ့အစည်း (၁၁) ဖွဲ့မှ ဖေဖော်ဝါရီလ (၁၄) ရက်တွင် ထုတ်ပြန်ထားသည်။

သျှမ်းပြည်သားချင်း ငြိမ်းချမ်းစွာ အတူယှဉ်တွဲ နေထိုင်နိုင်ရေးကို မျှော်တွေး၍ ဖမ်းဆီးချုပ်နှောင် ခံထားရသော မန်စယ်ရွာသား (၅) ဦးကို ချွင်းချက်မရှိ ပြန်လွှတ်ပေးရန်၊ ၎င်းတို့ ထိခိုက်မှု တစုံတရာ ဖြစ်ခဲ့လျှင်သော်လည်းကောင်း၊ မဖြစ်သင့်သော နောက်ဆက်တွဲ လူမျိုးရေး ပဋိပက္ခများ ဆက်ဖြစ်လာမည်ကို စိုးရိမ်မိကြောင်း အဆိုပါထုတ်ပြန်ချက်တွင် တောင်းဆိုထားသည်။

“အဓိကတော့ စစ်အာဏာရှင် တော်လှန်တယ်လို့ ပြောတဲ့ အဖွဲ့က ပြည်သူကို ဖမ်းဆီး ရိုက်နှက်တယ်ဆိုတာ မဖြစ်သင့်တဲ့ ကိစ္စလေ။ ကိုးကန့်တွေက သူတို့အလုပ် သူတို့လုပ်တယ်ဆိုပေမယ့် ကိုယ့်သျှမ်းတပ်က ပြည်သူကို ကာကွယ်တာ မလုပ်ဘဲ မျက်စိမှိတ် နားပိတ်နေတာ။ ပြည်သူတွေ ထိခိုက်ခံစားနေရတာ ကိုယ်ချင်းစာဖို့ ကိုယ့်သျှမ်းတပ်ကို တောင်းဆိုချင်တယ်” ဟု လားရှိုးဒေသခံ အမျိုးသားတစ်ဦး သျှမ်းသံတော်ဆင့်ကို ပြောသည်။

အခြားတစ်ဖက်တွင် ကိုးကန့်တပ်ဖွဲ့ MNDAA ထိပ်ပိုင်းကိုယ်စားလှယ်များသည် ဖေဖော်ဝါရီလ (၁၃) ရက်တွင် SSPP/SSA ဌာနချုပ်သို့ နှစ်သစ်ကူးအထိမ်းအမှတ် လာရောက်လည်ပတ်ခဲ့ပြီး နှစ်ဘက်တပ်ဖွဲ့ ကိုယ်စားလှယ်များ တွေ့ဆုံဆွေးနွေးခဲ့ကြောင်း သိရသော်လည်း သိန္နီမြို့တွင် ဖမ်းဆီးခံထားရသည့် ရွာသား(၅) ဦးကိစ္စကို ထည့်သွင်းပြောကြားခြင်း ရှိ၊ မရှိ မသိရပေ။

အလားတူ ဖေဖော်ဝါရီလ (၁၃) ရက်တွင် ကျင်းပပြုလုပ်ခဲ့သည့် SSPP/SSA ဥက္ကဋ္ဌ ဗိုလ်ချုပ်ကြီး ပန်ဖ ၏ တတိယသား မင်္ဂလာလက်ထပ်ပွဲ အခမ်းအနားသို့ မြောက်ပိုင်းမဟာမိတ်တပ်ဖွဲ့ဝင်များ ဖြစ်ကြသည့် ‘ဝ’တပ်ဖွဲ့ UWSA ၊ ကိုးကန့်တပ်ဖွဲ့ MNDAA နှင့် မိုင်းလားတပ်ဖွဲ့ NDAA ကိုယ်စားလှယ်များ တက်ရောက်ခဲ့ကြောင်း SSPP Info မှ ထုတ်ပြန်သည့် ဓာတ်ပုံမှတ်တမ်းများတွင် တွေ့ရသည်။