သျှမ်းပြည် ကွတ်ခိုင်မြို့ ဈေးအနီး ဆောက်လုပ်ရေးဝင်းရှိ ကိုးကန့်တပ် MNDAA ရုံးကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA ဘက်မှ ဝင်ရောက်စီးနင်းခဲ့ခြင်းကြောင့် နှစ်ဘက်စစ်ရေးတင်းမာနေကြောင်း စုံစမ်းသိရသည်။

ယမန်နေ့ (ဖေဖော်ဝါရီလ ၁၃ ရက်) ည ၉ နာရီကျော်မှ စတင်ပြီး ကွတ်ခိုင်မြို့ပေါ် ပြည်ထောင်စုလမ်းမကြီးတလျှောက် ကိုးကန့်တပ်ဖွဲ့ MNDAA တပ်ဆင်ထားသည့် ဆိုလာပြားနှင့် စောင့်ကြည့်ရေးကင်မရာ CCTV များကို TNLA တပ်သားများ ဖြုတ်သိမ်းခဲ့ကြောင်း ဒေသခံများထံမှ သိရသည်။

ထို့နောက် ကွတ်ခိုင်မြို့ပေါ်ရှိ MNDAA အုပ်ချုပ်ရေးရုံးများကို TNLA ဘက်မှ အင်အားသုံး ဝင်ရောက်စီးနင်းခဲ့ကာ MNDAA အလံနှင့် ညစောင့်တပ်သားများကိုပါ ယူဆောင်ဖမ်းဆီးသွားခဲ့ပြီး ဈေးအနီး ဆောက်လုပ်ရေးဝင်းတွင် တပ်စွဲထားသည့် MNDAA ရုံးနေရာတွင်လည်း ရုန်းရင်းဆန်ခတ်ဖြစ်၍ သေနတ်ပစ်ဖောက်မှု ဖြစ်ပွားခဲ့ကြောင်း ဖြစ်စဉ်သိရှိသူ ကွတ်ခိုင်ဒေသခံတစ်ဦးက သျှမ်းသံတော်ဆင့်ကို ပြောသည်။

“မနေ့ည အခြေအနေကတော့ TNLA တပ်ဖွဲ့တွေက ဝတ်စုံအပြည့်နဲ့ CCTV တွေ ဆိုလာတွေကို ဖြုတ်နေကြတယ်။ သူတို့ အထဲမှာ ဘာဖြစ်ကြလဲ ဆိုတာတော့ မသိဘူးပေါ့နော်။ ပြီးရင် ကိုးကန့်ရဲ့ အုပ်ချုပ်ရေးရုံးတွေကို အရင်တုန်းက KIO ရုံးတွေကို စီးနင်းသလိုမျိုးပဲ လိုက်စီးနင်းတယ်။ ပြီးရင် အဲ့မှာရှိနေတဲ့ စောင့်နေတဲ့ တပ်သားတွေကို TNLA က ခေါ်သွားကြတယ်။ ရုန်းရင်းဆန်ခတ် ဖြစ်တယ်ပေါ့နော်၊ ကိုးကန့်တွေရဲ့ အလံတွေကိုလည်း ယူသွားကြတယ်”ဟု ကွတ်ခိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ TNLA နှင့် MNDAA နှစ်ဘက်တပ်သားများ သွေးထွက်ဒဏ်ရာရသည်အထိ ရိုက်နှက်ခဲ့ကြပြီး ရုန်းရင်းဆန်ခတ်ဖြစ်နေစဉ် သေနတ်သံ ထွက်ပေါ်လာခဲ့ခြင်းကြောင့် ဒေသခံများမှာ ညီနောင်မဟာမိတ် အချင်းချင်းကြား တိုက်ပွဲဖြစ်ပွားမည်ကို စိုးရိမ်နေကြောင်း သိရသည်။

“ဈေးရှေ့နားမှာ ဆောက်လုပ်ရေး ဝင်းနားမှာရှိတဲ့ ကိုးကန့်ရုံးမှာ သူတို့ (TNLA) စီးနင်းတယ်။ စီးနင်းပြီးမှ သေနတ်သံတွေ ကြားတယ်ပေါ့နော်။ သေနတ်သံကြားတော့ စိုးရိမ်တာပေါ့၊ ဘာဖြစ်လို့လဲဆိုတော့ သေနတ်သံကြားတော့ တိုက်များ တိုက်ကြပြီလား ဆိုတဲ့ဟာမျိုး စိုးရိမ်တယ်။ နှစ်ဘက်အသံ ဟုတ် မဟုတ်တော့ မသိဘူး၊ သေနတ်သံတော့ မိုးပေါ်ထောင်ပစ်တာလား မသိဘူး ကြားတယ်။ တချို့ တင်ထားတဲ့ ဗီဒီယိုတွေ ကြည့်ရတာတော့ တပ်သားတွေ ရိုက်နှက်ခံရတယ်” ဟု ကွတ်ခိုင်ဒေသခံ အဆိုပါ အမျိုးသားက သျှမ်းသံတော်ဆင့်ကို ပြောသည်။

ယမန်နေ့ညတွင် TNLA ဘက်မှ ကွတ်ခိုင်မြို့ပေါ် စစ်အင်အား ရာနှင့်ချီ ကင်းလှည့်ခဲ့ပြီး MNDAA ဘက်မှလည်း တာမိုးညဲဘက်မှ ကွတ်ခိုင်ဘက် စစ်အင်အား ဖြည့်တင်းခဲ့ခြင်းကြောင့် ဒေသခံများမှာ လုံခြုံရေး စိုးရိမ်ထိတ်လန့်ခဲ့ရပြီး ယနေ့ (ဖေဖော်ဝါရီလ ၁၄ ရက်) နံနက်ပိုင်းတွင် ကွတ်ခိုင်မြို့ပေါ်၌ ပုံမှန်အခြေအနေ သွားလာလှုပ်ရှားနေကြောင်း သိရသည်။

တရုတ်နှစ်သစ်ကူးကာလ ရောက်ရှိနေစဉ် ကွတ်ခိုင်မြို့ရှိ ကိုးကန့်တပ် MNDAA အုပ်ချုပ်ရေးရုံးများကို TNLA ဘက်မှ ဝင်ရောက်စီးနင်းခဲ့သည့် ဖြစ်စဉ်အပေါ် နှစ်ဘက်တပ်ဖွဲ့ မည်သို့ ဖြေရှင်းမည်ကို မသိရသေးဘဲ သက်ဆိုင်ရာ ပြောရေးဆိုခွင့်ရှိသူများထံ သျှမ်းသံတော်ဆင့်မှ ကြိုးစားဆက်သွယ်ခဲ့သော်လည်း အဆက်အသွယ် မရရှိခဲ့ပါ။

“TNLA ဘက်က ကင်းလှည့်သလိုမျိုး လှည့်သွားတာလေ၊ ပြီးရင် အင်အားက ရာကြီးပိုင်းဆိုတော့ စစ်ဆင်ရေးတစ်ခု သွားသလိုမျိုး သွားနေတော့ စိုးရိမ်တာပေါ့။ ဘယ်လို ဖြစ်လာမလဲ ဆိုတာတော့ မပြောတတ်ဘူးလေ။ တရုတ်နှစ်သစ်ကူး အချိန်အခါ သမယမှာ MNDAA ရုံး စီးနင်းခံရတာတော့ အခုချက်ချင်းတော့ သူတို့လည်း ဘယ်လိုလုပ်ကြမလဲ ဆိုတာတော့ မသိဘူး၊ သူတို့အချင်းချင်းက မဟာမိတ်တွေဆိုတော့” ဟု ကွတ်ခိုင်ဒေသခံ အမျိုးသမီးတစ်ဦးက ထပ်လောင်းပြောသည်။

ညီနောင်မဟာမိတ်တပ်များ ဖြစ်ကြသည့် TNLA နှင့် MNDAA တို့သည် “၁၀၂၇ စစ်ဆင်ရေး”နောက်ပိုင်း ကွတ်ခိုင်မြို့ကို ပြည်ထောင်စုလမ်းမကြီး တစ်ဘက်တစ်ခြမ်းစီ ပူးတွဲအုပ်ချုပ်နေပြီး အချင်းချင်းကြား နယ်မြေခွဲဝေမှု ပြဿနာများ မကြာခဏ ဖြစ်ပွားနေကြောင်း ဒေသခံများထံမှ သိရသည်။