ထိုင်းနိုင်ငံ ချင်းမိုင်မြို့ရှိ ဆောင်းရာသီပွဲတော်အတွင်း ဆူပူသောင်းကျန်းရန် ပြင်ဆင်နေသည့် အရက်ဖြူ ဂိုဏ်းခေါင်းဆောင်ကို ချင်းမိုင်ခရိုင် လမ်းပန်း (Lampang) မြို့တွင် ဖမ်းဆီးရမိခဲ့ကြောင်း Chiang Mai News သတင်းက ဖော်ပြသည်။

ယမန်နေ့ (ဇန်နဝါရီလ ၂၆) ရက်တွင် အမှတ် ၅ နယ်မြေဒေသ၊ ရဲဗိုလ်ချုပ်ကြီး Krittapon Yisakorn က ပြည်သူများ၏ အသက်အိုးအိမ်စည်းစိမ် လုံခြုံစေရေးအတွက် နယ်မြေအတွင်းရှိ ဂိုဏ်းစတားများ၏ နေအိမ်များကို စီးနင်းရန်နှင့် လူမိုက်ဂိုဏ်းများကို ဖြိုခွင်းရန် ညွှန်ကြားခဲ့ကြောင်း သိရသည်။

အဆိုပါစီမံချက်ဖြင့် ယမန်နေ့ နေ့လယ် ၁ နာရီတွင် လမ်းပန်းမြို့ Hang Chat ရဲစခန်းမှ တာဝန်ရှိသူများက ဂိုဏ်းခေါင်းဆောင်ဟု ယူဆရသူ အသက် ၂၄ နှစ်အရွယ် မြန်မာနိုင်ငံသား “မောင်ဖူ”ကို လမ်းပန်းမြို့ရှိ အဆောက်အဦး ဆောက်လုပ်ရေးခွင်တစ်ခုတွင် ဖမ်းဆီးရမိခဲ့ကြောင်း Chiang Mai News က ရေးသားဖော်ပြထားသည်။

ဖောင်ဖူသည် ချင်းမိုင်မြို့ Doi Saket တွင် နေထိုင်သော်လည်း လမ်းပန်းမြို့ရှိ အလုပ်သမားတန်းလျားတွင် သွားရောက်ပုန်းအောင်းနေခြင်း ဖြစ်ကြောင်း ဆိုသည်။

၎င်းသည် ပြီးခဲ့သော ဇန်နဝါရီလ ၂၃ ရက်က ချင်းမိုင်မြို့ရှိ ဆောင်းရာသီပွဲတော်တွင် သူငယ်ချင်းများနှင့်အတူ သွားရောက်ခဲ့ကြောင်း၊ ဓားကိုင်ဆောင်မှုဖြင့် ရဲတပ်ဖွဲ့မှ လိုက်လံဖမ်းဆီးခဲ့သဖြင့် လမ်းပန်းမြို့သို့ အလုပ်ပြန်ဆင်းရန် ရောက်ရှိလာခြင်းဖြစ်ကြောင်း ထွက်ဆိုခဲ့သည်။

ပြီးခဲ့သည့် ဇန်နဝါရီလ ၂၃ ရက် ညပိုင်းက ချင်းမိုင်မြို့ရှိ ဆောင်းရာသီပွဲတော်အတွင်း ဆူပူသောင်းကျန်းရန် ပြင်ဆင်နေသည့် အရက်ဖြူဂိုဏ်းအဖွဲ့ဝင် လူငယ် ၂၀ ခန့်ကို လက်နက်များနှင့်အတူ ထိုင်းအာဏာပိုင်များက ဖမ်းဆီးရမိခဲ့ခြင်း ဖြစ်သည်။

ဖမ်းဆီးရမိသော လူငယ်များသည် ထိုင်းရောက် ရွှေ့ပြောင်းအလုပ်သမားများဖြစ်ကြသည့် သျှမ်းလူငယ်များ (ထိုင်းလူမျိုးအခေါ် တိုင်းယိုင်) ဖြစ်ကြောင်း Chiang Mai News သတင်းတွင် ရေးသားဖော်ပြထားသည်။

အဆိုပါဖမ်းဆီးမှုအတွင်း ပေါက်ကွဲစေတတ်သော ပစ္စည်း၊ ဓား၊ လက်သီးကွင်း၊ လေးခွနှင့်အတူ အထောက်အထားမရှိသော လူငယ် ၂ ဦးကိုလည်း ဖမ်းဆီးရမိခဲ့ကြောင်း သိရသည်။

လက်ရှိတွင် ဖမ်းဆီးရမိသော လူငယ် ၉ ဦးကို အမူဖွင့်အရေးယူခဲ့ပြီး ကျန် ၁၃ ဦးကို နောင်တွင် ပြစ်မှုထပ်မံမကျူးလွန်စေရန် ကိုယ်ရေးရာဇာဝင်မှတ်တမ်း ပြုစုထားကြောင်းသိရသည်။