သျှမ်းပြည် လားရှိုးမြို့တွင် စစ်ကော်မရှင်တပ်မှ ပထမအကြိမ် စစ်မှုထမ်းတပ်သားသစ် ခေါ်ယူရန် ရပ်ကွက်အတွင်း လူဦးရေစာရင်း ပြန်လည်ကောက်ယူနေကြောင်း စုံစမ်းသိရသည်။

စစ်ကော်မရှင် ပြန်လည်ထိန်းချုပ်ထားသည့် လားရှိုးမြို့ပေါ် ရပ်ကွက်များကို ယခု ဇန်နဝါရီ ၂၁ရက်မှစတင်ပြီး အုပ်ချုပ်ရေးမှူးများမှ နေအိမ်များတွင် လူဦးရေစာရင်း ဝင်ရောက်စစ်ဆေးပြီး စာရင်းကောက်ယူနေခြင်းကြောင့် စစ်မှုထမ်းခေါ်ယူမည်ကို စိုးရိမ်နေရကြောင်း လားရှိုးဒေသခံများက ပြောသည်။

“စစ်မဖြစ်ခင်တုန်းက စစ်မှုထမ်းခေါ်ဖို့ တစ်ခါ ကြားသေးတယ်လေ။ အိမ်မှာ သား ၂ ယောက်နဲ့ သမီး ၁ ယောက်ရှိတာ စာရင်းယူသွားတယ်၊ အဲ့တုန်းက ၁၀၂၇ အစပဲ ရှိသေးတယ်။ အိမ်ထောင်မကျသေးရင် စစ်မှုထမ်းသွားရမယ်၊ မိန်းကလေးလည်း ခေါ်မယ်ဆိုပြီး ကြားထဲမှာ ငြိမ်သွားတယ်။ အခုလည်း ရပ်ကွက်လူကြီးတွေကိုယ်တိုင် ရပ်ကွက်ထဲ ထပ်ဆင်းနေပြီဆိုတော့ အဲ့တာ စိုးရိမ်နေရတာ” ဟု လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“၁၀၂၇ စစ်ဆင်ရေး” အစပိုင်း ၂၀၂၄ ခုနှစ်တွင် လားရှိုးမြို့ပေါ်ရှိ စစ်ကော်မရှင်လက်အောက်ခံ ရပ်ကွက်အုပ်ချုပ်ရေးမှူးများမှ စစ်မှုထမ်းခေါ်ယူရန် ရပ်ကွက်အလိုက် လူငယ်များကို မဲနှိုက်ခိုင်းခဲ့သော်လည်း မြို့သိမ်းတိုက်ပွဲများ ဖြစ်ပွားခဲ့ခြင်းကြောင့် ရပ်ဆိုင်းခဲ့ရကြောင်း ဒေသခံများထံမှ သိရသည်။

တရုတ်၏ ဖိအားပေးမှုကြောင့် ယမန်နှစ် ၂၀၂၅ ဧပြီလ ၂၂ ရက်တွင် လားရှိုးမြို့ပေါ်မှ MNDAA တပ်များ ဆုတ်ခွာပေးခဲ့ရသော်လည်း လားရှိုးမြို့နှင့် ၄ မိုင်အကွာအဝေးတွင် ဆက်လက်တပ်စွဲထားပြီး မြို့ပေါ်ရပ်ကွက် (၁၂) ခုကို စစ်ကော်မရှင်တပ်မှ ပြန်လည်အုပ်ချုပ်ခဲ့သည်။

အလားတူ ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့နယ် နမ့်ပေါင်တိုက်နယ်အတွင်းရှိ ကျေးရွာများတွင်လည်း MNDAA ဘက်မှ တပ်သားသစ် (၄၀) ယောက် စုဆောင်းပေးရန် ကျေးရွာအုပ်ချုပ်ရေးမှူးများကို အစည်းအဝေး ‌ခေါ်ယူကာ တောင်းဆိုထားကြောင်း နမ့်ပေါင်ဒေသခံများက ပြောသည်။

“နမ့်ပေါင်မှာ ကိုးကန့်ဘက်က ရပ်ကွက် (၈) ခု ပြန်လာဖွဲ့ပေးထားတော့ တစ်ရပ်ကွက်ကို ၅ ယောက်စီ တောင်းထားတယ်။ ပြောတာတော့ ပြည်သူ့စစ် လုပ်ပြီး ရွာစောင့်ဖို့ပဲ။ ဒါပေမယ့် စစ်သင်တန်းလည်း တက်ရမယ်၊ စစ်ဝတ်စုံနဲ့ သေနတ်လည်း ထုတ်ပေးမယ်၊ လစာလည်း ပေးမယ် ရွာမှာပဲ ပြန်နေရမယ်လို့တော့ ပြောတာပေါ့။ ဒီတစ်ခေါက် လူထပ်ရှာပေးရရင် သုံးကြိမ်မြောက် ရှိပြီ” ဟု နမ့်ပေါင်ကျေးရွာအုပ်စုမှ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် လားရှိုးမြို့နှင့် မိုင်းရယ်မြို့ကြား MNDAA ထိန်းချုပ်ထားသည့် မန်ပျဉ်၊ မန်စယ်၊ နားနန်း၊ မိုင်းပိုင်၊ ကွန်သျှိုး၊ ကုံးမုံ စသည့် ကျေးရွာအုပ်စုများတွင် အတင်းအကြပ် တပ်သားသစ် စုဆောင်းနေပြီး အချို့ကျေးရွာများမှာ လူရှာမရခြင်းကြောင့် သံလွင်စံပြကျေးရွာရှိ MNDAA တပ်စခန်းသို့ သွားရောက်တောင်းပန်ထားရကြောင်း ဒေသခံများက ပြောဆိုသည်။

“ကိုးကန့်ထိန်းချုပ်တဲ့ နေရာတိုင်းလိုလို စစ်သားကောက်နေတယ်။ မန်ပျဉ်အုပ်စုဘက်လည်း ၁၀ ယောက် တောင်းထားတာ၊ ပေးစရာလူမရှိလို့ ရွာလူကြီးနဲ့ ရပ်မိရပ်ဖတွေက သံလွင်ရွာမှာ ကိုးကန့်ကို သွားတောင်းပန်ထားရတယ်။ သူတို့ဘက်ကလည်း အထက်ကို ပြန်ပြောကြည့်မယ်လို့ပဲ အကြောင်းပြန်ထားတယ်။ မိုင်းပိုင်အုပ်စုဘက်လည်း ၃ ရွာပေါင်း ၅ ယောက် အဲ့လို တောင်းနေတာ” ဟု နမ့်ပေါင်ဒေသခံ အဆိုပါ အမျိုးသားက ထပ်လောင်းပြောသည်။

ကိုးကန့်တပ်ဖွဲ့ MNDAA သည် လားရှိုးမြို့ပေါ် ရပ်ကွက် (၁၂) ခုကို တရုတ်ဖိအားကြောင့် စစ်ကော်မရှင်တပ်ထံ ယမန်နှစ် ၂၀၂၅ ဧပြီလအတွင်း ပြန်လည်အပ်နှံခဲ့ပြီးနောက် လားရှိုးမြို့ပြင်ရှိ ကျေးရွာအားလုံးနီးပါးတွင် တပ်သားသစ် အတင်းအကြပ် စုဆောင်းနေကြောင်း ဒေသခံများက ပြောသည်။

ထိုသို့ လားရှိုးမြို့နယ်တွင် စစ်ကော်မရှင်တပ်နှင့် ကိုးကန့်တပ်တို့ အပြိုင်အဆိုင် တပ်သားသစ် စုဆောင်းနေသည့်ကြားက MNDAA ဖမ်းဆီးထားသည့် စစ်ကော်မရှင်တပ်ဖွဲ့ဝင် ၅၀၀ ဦးနှင့် အကျဉ်းသား ၅ ဦးတို့ကို လွတ်ငြိမ်းချမ်းသာခွင့်ပေးခဲ့ကြောင်း MNDAA သတင်းများ ဖော်ပြနေသည့် ကိုးကန့်သတင်းကွန်ရက်မှ ယမန်နေ့ (ဇန်နဝါရီ ၂၅ ရက်)တွင် သတင်းထုတ်ပြန်ခဲ့သည်။