သျှမ်းပြည် ကျောက်မဲမြို့နယ်တွင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ မြေပြင် စစ်ရေးတင်းမာနေကြောင်း စုံစမ်းသိရသည်။

ဇန်နဝါရီလ ၁၇ ရက်မှ ညနေပိုင်းမှ စတင်ပြီး ကျောက်မဲမြို့နယ်အတွင်း တော့ဆန်ကျေးရွာအုပ်စုရှိ SSPP တပ်စခန်း အနီးသို့ TNLA ဘက်မှ စစ်အင်အား ၃၀ ခန့်ဖြင့် ချဉ်းကပ်ဝင်ရောက်လာခြင်းကြောင့် နှစ်ဘက်စစ်ရေးတင်းမာနေပြီး တိုက်ပွဲဖြစ်ပွားမည်ကို စိုးရိမ်နေရကြောင်း ဒေသခံများက ပြောသည်။

“SSPP စခန်းရှိတဲ့ဘက်ကို အနီးကပ် နေရာယူထားတာ ၂ နေရာ ရှိတယ်။ တစ်နေရာက တော့ဆန် အနောက်ဘက်က စေတီတောင်ကုန်းရယ်၊ နောက်တစ်နေရာက တော့ဆန်ရွာမ မြောက်ဘက်က ကောင်းမူးခမ်း စေတီတောင်ကုန်းရယ် နှစ်နေရာ။ TNLA ဘက်က ရှေ့ဆက်တိုးရင်တော့ ထိတွေ့တိုက်ပွဲ ဖြစ်နိုင်တယ်” ဟု ကျောက်မဲမြို့နယ်မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ် တော့ဆန်ကျေးရွာအုပ်စုရှိ SSPP တပ်စခန်းအနီးသို့ ပြီးခဲ့သည့် ဇန်နဝါရီလ ၁၆ ရက်၊ ၁၇ ရက်နှင့် ၂၁ ရက်တို့တွင် TNLA ဘက်မှ သုံးကြိမ်တိုင်တိုင် အနီးကပ် ချဉ်းကပ်ဝင်ရောက်လာခဲ့ပြီး နောက်ပိုင်းတွင် တောင်အောက်သို့ ပြန်လည် ဆုတ်ခွာသွားခဲ့ကြောင်း စစ်ရေးသတင်းရင်းမြစ်က ဆက်ပြောသည်။

သို့သော်လည်း လက်ရှိအချိန်ထိ နှစ်ဘက်တပ်ဖွဲ့ စစ်ရေးတင်းမာနေခြင်းကြောင့် ရွာသားများမှာ တိုက်ပွဲဖြစ်ပွားမည်ကို စိုးရိမ်ထိတ်လန့်နေရကြောင်း ဒေသခံများထံမှ သိရသည်။

“ဒီနေ့ထိတော့ TNLA ဘက်က နောက်မဆုတ်သေးဘူး၊ တောင်ခြေနားမှာ ရှိသေတုန်းပဲ။ အဲ့တာကြောင့်လည်း တော့ဆန်ရွာသားတွေက တိုက်ပွဲဖြစ်မှာ စိုးရိမ်နေကြတာ၊ တချို့လည်း ထွက်ပြေးဖို့ အထုပ်အပိုး ပြင်နေကြတယ်” ဟု ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ်အတွင်း SSPP နှင့် TNLA နှစ်ဘက်စစ်ရေးတင်းမာနေသည့် ကိစ္စနှင့် ပတ်သက်၍ အတည်ပြု မေးမြန်းနိုင်ရန် SSPP ပြောရေးဆိုခွင့်ရှိသူထံ သျှမ်းသံတော်ဆင့်မှ ဆက်သွယ်ခဲ့သော်လည်း အဆက်အသွယ် မရရှိခဲ့ပါ။

တော့ဆန်ကျေးရွာသည် စစ်ကော်မရှင် ပြန်လည်ထိန်းချုပ်ထားသည့် ကျောက်မဲမြို့နှင့် မိုင် ၄၀ ကျော် ကွာဝေးပြီး TNLA ထိန်းချုပ်ထားသည့် မိုင်းလုံမြို့နှင့် မိုင်းငေါ့မြို့ကြားတွင် တည်ရှိသည်။

ယမန်နှစ် ၂၀၂၅ အောက်တိုဘာလတွင် ကျောက်မဲမြို့ကို စစ်ကော်မရှင်တပ် ပြန်လည်ထိန်းချုပ်ခဲ့ပြီးနောက် တော့ဆန်ကျေးရွာသို့ လေကြောင်းဖြင့် ဗုံး(၂)လုံး ကြဲချတိုက်ခိုက်ခဲ့ရာ SSPP/SSA တပ်စခန်းအနီး ဗုံးတစ်လုံး ကျရောက်ပေါက်ကွဲခဲ့ပြီး အခြားဗုံးတစ်လုံးမှာ ကျေးရွာထဲ ပေါက်ကွဲခဲ့ခြင်းကြောင့် ကလေးတစ်ဦး ထိခိုက်ဒဏ်ရာ ရရှိခဲ့သည်။