ထိုင်းနိုင်ငံရောက် မြန်မာနိုင်ငံသားများ အုပ်စုဖွဲ့ခိုက်ရန်ဖြစ်ပွားမှုများ ဆက်တိုက်ဖြစ်ပေါ်လာပြီးနောက် ထိုင်းနိုင်ငံ၏ ဥပဒေနှင့် စည်းမျဉ်းများ၊ စည်းကမ်းများအပါအဝင် မြန်မာနိုင်ငံသားများ လိုက်နာနိုင်ရန် အမျိုးသားညီညွတ်ရေးအစိုးရ (NUG) က အချက် ၄ ချက်ကို ဇန်နဝါရီလ ၁၄ ရက်တွင် ထုတ်ပြန်အသိပေး လိုက်သည်။

အဆိုပါထုတ်ပြန်ချက်ထဲတွင် ထိုင်းနိုင်ငံရောက် မြန်မာနိုင်ငံသားများအနေဖြင့် ထိုင်းနိုင်ငံ၏ ဥပဒေနှင့် စည်းမျဉ်းများ၊ ယဉ်ကျေးမှု ဓလေ့ထုံးတမ်း၊ ဒေသန္တရာစည်းကမ်းများကို လေးစားလိုက်နာရန် တိုက်တွန်းထားသည်။

ထို့အပြင် ထိုင်းနိုင်ငံ၏ နိုင်ငံရေးနှင့် အုပ်ချုပ်ရေး ကိစ္စရပ်များတွင် ပါဝင်ပတ်သက်ခြင်း မပြုကြရန်နှင့် အိမ်ရှင်လူမှု အသိုင်းအဝိုင်း၏ တန်းဖိုးထားမှု၊ ယဉ်ကျေးမှုများကို လေးစားကာ သဟဇာတဖြစ်အောင် နေထိုင်ကြရန်လည်း NUG နိုင်ငံခြားရေးဝန်းကြီးဌာနက တိုက်တွန်းထားသည်။

ပြီးခဲ့သည့် ဇန်နဝါရီလ ၁၃ ရက် ညပိုင်းက ထိုင်းနိုင်ငံ ချွန်ပူရီခရိုင် ဖန်ထောင်မြို့နယ်ရှိ ကွန်ဒိုရှေ့တွင် မြန်မာအလုပ်သမား ၁၀၀ နီးပါး လက်နက်ကိုယ်စီဖြင့် အုပ်စုဖွဲ့ရိုက်နှက်မှုဖြစ်ပွားခဲ့ပြီး ဒဏ်ရာရရှိသူများ ရှိခဲ့သည်။

အလားတူ ဇန်နဝါရီလ ၁၁ ရက်နေ့ကလည်း စမွတ်ပရာကန်ခရိုင်တွင် မြန်မာအလုပ်သမားများက ထိုင်းနိုင်ငံသား အစားအသောက်ပို့ဆောင်သူ တစ်ဦးကို ဝိုင်းဝန်းရိုက်နှိက်ခဲ့သည့် ဖြစ်စဉ်လည်း ဖြစ်ပွားခဲ့သည်။

ထိုဖြစ်စဉ်ဖြစ်ပွားပြီးနောက်ပိုင်း ယနေ့ ဇန်နဝါရီလ ၁၅ ရက်တွင် ထိုင်း-မြန်မာနယ်စပ် မဲဆောက်မြို့ရှိ မြန်မာစားသောက်ဆိုင်များကို ထိုင်းအာဏာပိုင်များက ရှောင်တခင် ဝင်ရောက်စစ်ဆေးနေကြောင်း သိရသည်။