သျှမ်းပြည်တောင်ပိုင်း၊ ပင်းတယမြို့နယ်ရှိ မဲရုံများတွင် စစ်ကော်မရှင်တပ်နှင့် ၎င်းလက်အောက်ခံ ပြည်သူ့စစ်တို့က လုံခြုံရေးယူပေးနေပြီး ပြည်သူများက မဲမထည့်လျှင် ဖမ်းခံရမည်ကို စိုးရိမ်သောကြောင့် မဲထည့်နေရကြောင်း သတင်းရရှိသည်။

ယနေ့ (ဒီဇင်ဘာလ ၂၈ ရက်) တွင် စစ်ကော်မရှင်ဘက်မှ ရွေးကောက်ပွဲ ပထမပိုင်းကို ပင်းတယမြို့နယ် အပါအဝင် သျှမ်းပြည်မှ မြို့နယ် ၁၂ ခုတွင် စတင်ကျင်းပ ပြုလုပ်နေသည်။

ပင်းတယမြို့နယ်အတွင်း မဲရုံ ၄၉ ရုံ ရှိပြီး မဲရုံတစ်ရုံစီ၌ စစ်ကော်မရှင်လက်အောက်ခံ ပြည်သူ့စစ် ၇ ဦးမှ ၉ ဦးအထိ လုံခြုံရေး ယူပေးထားပြီး ဒေသခံများက မဲမထည့်လျှင် ဖမ်းဆီးခံရမည်ကို စိုးရိမ်ပြီး ကြောက်လန့်စိတ်ဖြင့် မဲသွားထည့်နေရကြောင်း ဒေသခံများက ပြောသည်။

“မဲပေးတဲ့သူတော့ ရွာအုပ်စုတွေ ပေါင်းရင်တော့ များတယ်။ ပြည်သူတွေက ပေးချင်လို့တော့ မဟုတ်ဘူး၊ မဲမပေးရင် ဖမ်းမယ်လို့ ကြားတော့ သူတို့တွေ မဲသွားထည့်ကြရတာ။ မထည့်ရင် နောက်ဆက်တွဲတွေ ရှိလာနိုင်တော့ သွားထည့်ရတာ။ မဲရုံမှာက ပြည်သူ့စစ်တွေက လက်နက်ကိုင် စောင့်ကြည့်နေတာ”ဟု ပင်းတယမြို့နယ်တွင် ဆန္ဒမဲသွားပေးသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုသို့ မဲပေးရာတွင် မှတ်ပုံတင်များ ယူဆောင်သွားရပြီး နံနက် ၆ နာရီမှ ညနေ ၄ နာရီအတွင်း မဲထည့်ရမည်ဖြစ်ကြောင်း ၎င်းက ဆက်ပြောသည်။

ထို့အပြင် မဲစာရင်းတွင် အမည်မပါသူများကို အမည်စာရင်း ပြန်လည်တင်ခိုင်းကြောင်း၊ မဲမပေးသူများကို စာရင်းနှင့် တိုက်စစ်ကာ မှတ်ယူထားသောကြောင့် စိုးရိမ်မှုများ ရှိနေကြောင်း ဒေသခံများက ပြောသည်။

ပြီးခဲ့သည့် ဒီဇင်ဘာလ ၂၆ ရက်တွင် ပင်းတယမြို့နယ်မှ တက္ကသိုလ်ကျောင်းတက်နေသူများ၊ မသန်စွမ်းများ၊ ကျန်းမာရေးမကောင်းသူများနှင့် သက်ကြီးရွယ်အိုများကို စစ်တပ်လက်အောက်ခံ အုပ်ချုပ်ရေးမှူးနှင့် ဌာနဆိုင်ရာများက မဖြစ်မနေ ကြိုတင်မဲထည့်ကြရန် သွယ်ဝိုက်၍ ဖိအားပေးခဲ့ကြောင်း သိရသည်။