သျှမ်းပြည်အရှေ့ပိုင်း မိုင်းလားမြို့တွင် NDAA တပ်ဖွဲ့မှ ဦးဆောင်၍ သျှမ်းနှစ်သစ်ကူးပွဲတော် ကျင်းပလျက်ရှိပြီး SSPP ကိုယ်စားလှယ်များလည်း တက်ရောက်ခဲ့ကြောင်း သတင်းသိရသည်။

နိုဝင်ဘာလ (၁၆) ရက်မှ (၂၀) ရက်အထိ မိုင်းလားမြို့တွင် အမျိုးသားဒီမိုကရက်တစ် မဟာမိတ်တပ်မတော် ခေါ် မိုင်းလားတပ်ဖွဲ့ NDAA ဦးဆောင်၍ သျှမ်းသက္ကရာဇ် (၂၁၂၀) ပြည့်နှစ် သျှမ်းနှစ်သစ်ကူးကြိုဆိုပွဲကို အကြီးအကျယ် ကျင်းပလျက်ရှိသည်။

အဆိုပါ သျှမ်းနှစ်သစ်ကူးပွဲတော်သို့ မိုင်းလားတပ်ဖွဲ့ NDAA ၏ ဖိတ်ကြားချက်အရ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) အတွင်းရေးမှူး-၂ ဖြစ်သူ ဗိုလ်မှူးကြီး စိုင်းဆု ဦးဆောင်သည့် ကိုယ်စားလှယ်အဖွဲ့များလည်း တက်ရောက်အားပေးခဲ့ကြောင်း SSPP Info မှ ယနေ့ (နိုဝင်ဘာ ၁၉ ရက်) တွင် ဓာတ်ပုံနှင့်တကွ သတင်းထုတ်ပြန်သည်။

နတ်တော်လဆန်း (၁) ရက်တွင် ကျရောက်မည့် သျှမ်းသက္ကရာဇ် (၂၁၂၀) ပြည့်နှစ် သျှမ်းနှစ်သစ်ကူးနေ့ အထိမ်းအမှတ်အဖြစ် သျှမ်းပြည်တဝှမ်းလုံးတွင် ရိုးရာမပျက် နှစ်သစ်ကြိုဆိုပွဲများ ကျင်းပပြုလုပ်လျက်ရှိသည်။

အလားတူ စစ်ရေး ပဋိပက္ခများ ဖြစ်ပွားခဲ့ပြီး စစ်ဘေးတိမ်းရှောင်ခဲ့ရသည့် နောင်ချို၊ ကျောက်မဲ၊ သီပေါ၊ လားရှိုးနှင့် နမ္မတူမြို့နယ်များတွင် သျှမ်းနှစ်သစ်ကူးကြိုဆိုပွဲကို ကျယ်ကျယ်ပြန့်ပြန့် မကျင်းပနိုင်သော်လည်း နှစ်သစ်စောင့်ကြို ဆုမွန်ကောင်းတောင်းခြင်းများ အကျဉ်းရုံး ကျင်းပပြုလုပ်မည်ဟု သိရသည်။