သျှမ်းပြည် လားရှိုးမြို့တွင် စစ်ကောင်စီနှင့် TNLA နှစ်ဘက်ကိုယ်စားလှယ်များ ထပ်မံတွေ့ဆုံပြီး မိုးကုတ်မြို့၊ မိုးမိတ်မြို့တို့မှ တပ်ဆုတ်မည့် အစီအစဉ်ကို ဆွေးနွေးခဲ့ကြောင်း စုံစမ်းသိရသည်။

နိုဝင်ဘာလ ၁၂ ရက်တွင် လားရှိုးမြို့ပေါ်၌ တအာင်း(ပလောင်) အမျိုးသားလွတ်မြောက်ရေး တပ်မတော် TNLA နှင့် စစ်ကောင်စီ ကိုယ်စားလှယ်များ ထပ်မံတွေ့ဆုံခဲ့ပြီး မိုးကုတ်မြို့၊ မိုးမိတ်မြို့တို့မှ တပ်ဆုတ်မည့် အစီအစဉ်များ ဆွေးနွေးခဲ့ကြောင်း စစ်ရေးသတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။

“ပြီးခဲ့တဲ့ ၁၂ ရက်နေ့က လားရှိုးမှာ TNLA နဲ့ စစ်တပ် တွေ့ကြတယ်။ မိုးကုတ်နဲ့ မိုးမိတ်ကနေ တပ်ဆုတ်မယ့်အကြောင်းလည်း ဆွေးနွေးတဲ့အထဲ ပါတယ်။ ဒီလကုန်မှာ TNLA မြို့ကနေ ဘယ်လိုထွက်မလဲ၊ စစ်တပ်က ဘယ်လိုဝင်လာမလဲ ဆိုတာတော့ အသေးစိတ် မသိရဘူး”ဟု စစ်ရေးသတင်းရင်းမြစ်က ပြောသည်။

အောက်တိုဘာလ ၂၇-၂၈ ရက်နေ့များတွင် တရုတ်နိုင်ငံ၏ ကြားဝင်စေ့စပ်မှုကြောင့် TNLA နှင့် စစ်ကောင်စီ ကိုယ်စားလှယ်တို့ တရုတ်နိုင်ငံ ကူမင်းမြို့၌ (၉) ကြိမ်မြောက် တွေ့ဆုံဆွေးနွေးခဲ့ပြီး အပစ်အခတ်ရပ်စဲရေး လက်မှတ်ထိုးခဲ့သည်။

သဘောတူ သတ်မှတ်ထားသည့် ကာလတွင် မိုးကုတ်နှင့် မိုးမိတ်မြို့နယ်များမှ TNLA တပ်ဆုတ်ခွာပေးမည် ဖြစ်ကြောင်း TNLA သတင်းနှင့် ပြန်ကြားရေးဌာနမှ အောက်တိုဘာလ ၂၉ ရက်နေ့တွင် တရားဝင် ထုတ်ပြန်ထားသည်။

ထို့နောက် TNLA နှင့် စစ်ကောင်စီတို့ လားရှိုးမြို့၌ ထပ်မံတွေ့ဆုံပြီး မိုးကုတ်နှင့် မိုးမိတ်မြို့နယ်များမှ TNLA တပ်ဆုတ်ခွာရေး ထပ်မံဆွေးနွေးခဲ့ခြင်း ဖြစ်သည်။

အခြားတစ်ဘက်တွင် မိုးကုတ်မြို့သိမ်းတိုက်ပွဲတွင် အတူပါဝင် တိုက်ခိုက်ခဲ့ကြသည့် တော်လှန်ရေးအင်အားစု PDF တပ်ဖွဲ့များကို TNLA ဘက်မှ နိုဝင်ဘာလ (၁၆) ရက်၌ ခေါ်ယူတွေ့ဆုံခဲ့ပြီး စစ်ကောင်စီတပ် ပြန်လည်ဝင်ရောက်လာပါက သေနတ်ပစ်ဖောက်ခြင်း၊ တိုက်ခိုက်ခြင်း မပြုလုပ်ရန် ပြောဆိုခဲ့ကြောင်း သတင်းထွက်ပေါ်နေသည်။

လာမည့် နိုဝင်ဘာလ ၃၀ ရက်တွင် မိုးကုတ်မြို့ထဲသို့ စစ်ကောင်စီတပ်နှင့် TNLA တပ်တို့ အတူဝင်ရောက်လာမည်ဟု ဒေသခံများက ပြောဆိုနေသော်လည်း TNLA ပြောရေးဆိုခွင့်ရှိသူ လွေးယေဦး ထံ မေးမြန်းအတည်ပြုနိုင်ရန် သျှမ်းသံတော်ဆင့်မှ ဆက်သွယ်ခဲ့ရာတွင် ယခင်က လက်ခံဖြေကြားခဲ့သည့် ဖုန်းနံပါတ်မှာ ဖြုတ်ချထားသည်။

“အဲ့လို ခေါ်လာလို့ မရဘူးလေ၊ ခေါ်လာရင် TNLA နဲ့ တော်လှန်ရေးတပ်ကြား မဟာမိတ် ပျက်ပြီး ရန်သူဖြစ်သွားမှာ။ အပစ်ရပ်ပြီလို့ သူတို့ (TNLA) ကြေညာကတည်းက ရုံးတွေကော အိမ်တွေထဲကော နေ့တိုင်း ပစ္စည်းသယ်ထုတ်နေတာ။ အခုလည်း မိုးကုတ်မြို့ထဲမှာ ပြည်သူ တော်တော်များများ ရှောင်သွားကြပြီ”ဟု မိုးကုတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် စစ်ကောင်စီနှင့် TNLA တပ်အကြား ဆက်ဆံရေးရုံးတစ်ခု ဖွင့်လှစ်ထားပြီး မိုးကုတ်မြို့နှင့် မိုးမိတ်မြို့မှ TNLA တပ်ဆုတ်ပြီးနောက် စစ်ကောင်စီ ပြန်လည်ဝင်ရောက်မည့် အစီအစဉ်များ လုပ်ဆောင်နေကြောင်း စစ်ရေးသတင်းရင်းမြစ်ထံမှ သိရသည်။

မိုးကုတ်မြို့ထဲသို့ စစ်ကောင်စီတပ် ပြန်လည်ဝင်ရောက်မည့် အစီအစဉ်နှင့် ပတ်သက်ပြီး TNLA ဘက်မှ ပြည်သူများနှင့် တော်လှန်ရေးအင်အားစု PDF တပ်ဖွဲ့များထံ ပွင့်လင်းမြင်သာစွာ အသိပေးခြင်း မရှိဘဲ စစ်ကောင်စီတပ် ဝင်ရောက်လာပါက နောင်ချို၊ ကျောက်မဲနှင့် သီပေါမြို့ကဲ့သို့ နေအိမ်ချိတ်ပိတ်ခံရပြီး ဖမ်းဆီးခံရမည်ကို စိုးရိမ်နေရကြောင်း ဒေသခံများက ပြောသည်။

ပြီးခဲ့သည့် နိုဝင်ဘာလ ၆ ရက် ညပိုင်းတွင် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) တပ်ဆုတ်ခွာမည်ဟု ကြေညာထားသည့် မိုးကုတ်မြို့တွင် တော်လှန်ရေးအင်အားစုများ၊ ဒေသခံပြည်သူများမှ စစ်အာဏာရှင်စနစ် ဆန့်ကျင်ရေးနှင့် စစ်ကောင်စီဘက်မှ မြို့ထဲသို့ ပြန်လည်ဝင်ရောက်လာမည်ကို လုံးဝ လက်မခံရေး အတွက် သံပုံးတီး ဆန္ဒပြခဲ့ကြသည်။

မိုးကုတ်မြို့သိမ်း တိုက်ပွဲအတွင်း TNLA နှင့်အတူ ပါဝင်ခဲ့ကြသည့် ပြည်သူ့ကာကွယ်ရေးတပ်မတော် မန္တလေး- PDF ၊ မိုးကုတ်ဗျူဟာ၊ မိုးကုတ်နှင့် ပြင်ဦးလွင်မြို့နယ် ပြည်သူ့ကာကွယ်ရေးအဖွဲ့ (ပကဖ) တို့က ထိန်းချုပ်နယ်မြေကို ကာကွယ်ရန် မိတ်ဖက်တော်လှန်ရေး အင်အားစုများနှင့် လက်တွဲ၍ အစွမ်းကုန် ခုခံကာကွယ်သွားမည် ဖြစ်ကြောင်း အောက်တိုဘာ (၃၀) ရက်တွင် ကြေညာထားသည်။