စစ်အာဏာသိမ်းပြီး ၅နှစ်တာ ကာလအတွင်း ညောင်ရွှေမြို့နယ် အင်းလေးဒေသတွင် မူးယစ်ဆေးဝါး သုံးစွဲသူ သိသိသာသာများလာကြောင်း ဒေသခံများပြောပြချက်အရသိရသည်။
အင်းလေးဒေသအတွင်း မူးယစ်ဆေးဝါးကို ပေါ်ပေါ်ထင်ထင် ရောင်းချနေကြပြီး၊ သုံးစွဲသူများတွင် အသက်မပြည့်သေးသည့်သူများနှင့်အမျိုးသမီးများလည်း ပါဝင်နေကြောင်း ကိုယ်တိုင်မြင်တွေ့ရသည့် အင်းလေးဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
ထိုမူးယစ်ဆေးသုံးစွဲ ရောင်းချသူများကိုလည်း သက်ဆိုင်ရာ အာဏာပိုင်များက ဟန်ပြဖမ်းဆီးမှုသာပြုလုပ်နေသည်။
” မူးယစ်ဆေးတွေက ပေါ်ပေါ်ထင်ထင်ရောင်းချ၊သုံးနေတာ၊ ဖမ်းရင်လည်း ဟန်ပြဖမ်းတယ်။ ပြီးရင် ပိုက်ဆံပေးလိုက်ရင် ပြန်လွှတ်လာတာပဲ။ အရမ်းကို များလာတယ်” ဟု အသက် ၄၀ အရွယ်ရှိ အမျိုးသားတစ်ဉီးက ဆိုသည်။
အင်းလေးဒေသအတွင်း မူးယစ်ဆေးဝါးသုံးစွဲသူများလာသဖြင့် မကြုံစဖူး ခိုးဆိုးလုယက်မှုများလည်းကြုံနေရသည်။
ထို့အပြင် လက်ရှိတွင် ကုန်စျေးနှုန်းများမြင့်တက်လာသော်လည်း မူးယစ်ဆေးပြားစျေးနှုန်းသည် တပြားလျှင် ကျပ်ငွေ တစ်ထောင်သာရှိကြောင်း သိရသည်။
” ကုန်စျေးနှုန်းတွေက မြင့်ပေမယ့် မူးယစ်ဆေးက တပြားမှ တစ်ထောင်ကျပ်ပဲရှိတာ။ အခုက ကြက်ဉတစ်လုံးတောင် ၅၀၀ကျပ်ဖြစ်နေပြီလေ။ လွယ်လွယ်လည်းရတော့ ပိုသုံးကြတာပေါ့” ဟု ၎င်းကဆိုသည်။
ပြီးခဲ့သည့် အောက်တိုဘာလ မှစ၍ မူးယစ်ဆေးဝါးရောင်းချ သူများကို စစ်ကော်မရှင်က ဖမ်းဆီးမှုလုပ်ဆောင်ခဲ့ပြီး အလားတူ PNOဘက်မှလည်း မူးယစ်ဆေးဝါးသုံးစွဲသူများကို ဖမ်းဆီးအရေးယူမှုများ လုပ်ဆောင်မည်ဖြစ်ကြောင်း PNOမှ သတင်းနှင့်ပြန်ကြားရေး တာဝန်ခံတစ်ဦးက ပြောသည်။
“အင်းလေးထဲမှာ မှမဟုတ်ဘူး နေရာ တော်တော်များများမှာ မူးယစ်ဆေး သုံးစွဲသူ ပိုများလာတယ်။ ဒါကို ကျနော်တို့လည်း သုံးစွဲသူ လျော့နည်းအောင် အရေးယူတာမျိုး လုပ်ဆောင်မယ်၊သုံးစွဲတဲ့သူ တွေ့ရင်တော့ ဖမ်းဆီးတာတို့ အရေးယူတာမျိုးလုပ်မယ်။”ဟု အဆိုပါ သတင်းနှင့်ပြန်ကြားရေး ခွန်ဆန်းအောင်က ပြောသည်။
အောက်တိုဘာလ ၁၃ ရက်တွင် ညောင်ရွှေမြို့နယ် အင်းလေးဒေသ နန်းပန်ကျေးရွာအုပ်စု အတွင်းရှိ မူးယစ်ဆေးဝါး ရောင်းချသည့်နေရာကို စစ်ကော်မရှင် လက်အောက်ခံ ရဲတပ်ဖွဲ့က ရှောင်တခင် သွားရောက်စစ်ဆေးခဲ့ပြီး မူးယစ်ဆေးသုံးစွဲသူနှင့် ရောင်းဝယ်ဖောက်ကားသူ စုစုပေါင်း ၁၁ ဉီး ဖမ်းဆီးရမိခဲ့သည်။
ထိုထဲတွင် မူးယစ်ဆေးသုံးစွဲသူ ၁၀ ဉီးကို ညောင်ရွှေမြို့နယ် နန်းပန်ရဲစခန်းတွင် ဖမ်းဆီးချုပ်နှောင်ထားပြီး ကျန်မူးယစ်ဆေးရောင်းချသူ တစ်ဉီးကို ကျပ်ငွေ သိန်း ၈၀ ဖြင့် ပြန်လွှတ်ပေးခဲ့ကြောင်း ဖြစ်စဉ်သိရှိသူများက ပြောသည်။
Leave a Comments