သျှမ်းပြည်မြောက်ပိုင်း မူဆယ်မြို့တွင် ဆိုလာပြားဖြင့် ဘတ္ထရီ အားသွင်းရာမှ အပူလွန်ကဲပြီး ပေါက်ကွဲခဲ့ခြင်းကြောင့် နေအိမ်မီးလောင်မှု ဖြစ်ပွားခဲ့ကြောင်း စုံစမ်းသိရသည်။

ယမန်နေ့ (နိုဝင်ဘာလ ၁၁ ရက်) ညနေ ၆ နာရီခန့်တွင် မူဆယ်မြို့ ဟိုမွန်ရပ်ကွက်၊ သိန်းသန်းချီ အဝေးပြေးကားကြီးဝင်းနှင့် ခိုင်ဇာနန်းတော် ဟိုတယ် အနီးပတ်ဝန်းကျင်ရှိ နေအိမ်တစ်လုံးတွင် ဆိုလာပြားဖြင့် ဘတ္ထရီ အားသွင်းရာမှ အပူလွန်ကဲပြီး ပေါက်ကွဲမှုကြောင့် မီးလောင်မှု ဖြစ်ပွားခဲ့ကြောင်း မူဆယ်ဒေသခံများက ပြောသည်။

“မီးလောင်တဲ့ နေရာမှာ အိမ်ငှားတွေ နေကြတာ။ အဲ့အိမ်မှာ ၂ ခန်းက အိမ်ငှားတွေနေတာ၊ နောက် ၂ ခန်းက ပစ္စည်းထားတဲ့ ဂိုထောင် လုပ်ထားတာ။ အခုက အိမ်ခန်းငှားတဲ့ဘက်က စလောင်လာ၊ သူတို့က နေ့လယ် ၂ နာရီလောက်က ကျယ်ဂေါင်ဘက် သွားခဲ့တာ ဘယ်သူမှ မကျန်ဘူး။ ဆိုလာမီးကနေ စလောင်တယ်လို့ ပြောကြတယ်၊ ဆိုလာပြား ပေါက်ကွဲထားတာ တွေ့တယ်”ဟု မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ နေအိမ်မီးလောင်ကျွမ်းမှုကြောင့် အိမ်တွင်းပစ္စည်းများ မီးလောင်ပျက်စီးခဲ့ပြီး မီးသတ်တပ်ဖွဲ့မှ အချိန်မီ မီးငြိမ်းသတ်နိုင်ခဲ့သော်လည်း ဆုံးရှုံးမှုတန်ဖိုး များနိုင်ကြောင်း ဒေသခံများက ပြောဆိုသည်။

အလားတူ စက်တင်ဘာလ (၆) ရက်ကလည်း မူဆယ်မြို့ ဟိုမွန်ရပ်ကွက်၊ စစ်ကော်မရှင် လက်အောက်ခံ အကောက်ခွန်ဦးစီးဌာနရုံးရှိ အရာရှိလိုင်းခန်း (၆) ခန်း မီးလောင်ပျက်စီးခဲ့ပြီး မီးလောင်ရသည့် အကြောင်းရင်းကို သတင်းဖုံးဖိခဲ့ကြောင်း ဖြစ်စဉ်သိရှိသူများက ပြောသည်။

စစ်တပ် အာဏာသိမ်းပြီးနောက်ပိုင်း လျှပ်စစ်မီးများ ပုံမှန်မရရှိတော့သည့်အတွက် လက်ရှိတွင် ပြည်သူများက ဖယောင်းတိုင်မီး၊ နေရောင်ခြည်စွမ်းအင်သုံး ဆိုလာနှင့် ဘတ်ထရီတို့ကို အားကိုး၍ အသုံးပြုနေရပြီး သျှမ်းပြည်အတွင်း ဆိုလာပြားဘက်ထရီမှတဆင့် မကြာခဏ မီးလောင်ကျွမ်းမှု ဖြစ်ပွားလေ့ရှိသည်။

ထို့ကြောင့် ပြည်သူများအနေဖြင့် မီးလောင်မှု မဖြစ်ပွားစေရန် ဖယောင်းတိုင်မီး၊ ဆိုလာပြားနှင့် ဘတ်ထရီ တို့ကို သတိထား အသုံးပြုကြရန် မီးသတ်တပ်ဖွဲ့က တိုက်တွန်းထားသည်။