သျှမ်းပြည်တောင်ပိုင်း ညောင်ရွှေမြို့နယ်၊ အင်းလေးဒေသရှိ စစ်ကောင်စီလက်အောက်ခံ ပအိုဝ်းပြည်သူ့စစ် (PNO/PNA) က ဒေသခံများကို တစ်လလျှင် ငွေကျပ် ငါးသိန်း တောင်းခံနေပြီး မပေးနိုင်ပါက စစ်မှုထမ်းခိုင်း၍ ရှေ့တန်းသို့ ပို့ဆောင်နေကြောင်း သတင်းရရှိသည်။

ဩဂုတ်လ ပထမပတ်မှစ၍ ယနေ့ (နိုဝင်ဘာလ ၈ ရက်) အထိ အင်းလေးဒေသတွင် စစ်ရှောင်နေသော ဘုရားတောင်၊ ရေပူ၊ တောင်ပို့ကွဲကျေးရွာများမှ ဒေသခံများ ၎င်းတို့နေရပ်သို့ ပြန်လာပြီးနောက် စစ်ကောင်စီလက်အောက်ခံ ပအိုဝ်းပြည်သူ့စစ် PNO က လူတစ်ယောက် အတွက် တစ်လလျှင် ငွေကျပ် ငါးသိန်း ကောက်ခံနေပြီး ထိုသို့ မပေးနိုင်ပါက PNO ပြည်သူ့စစ်ဝတ်စုံ ဝတ်ခိုင်းပြီး ရှေ့တန်းသို့ ပို့ဆောင်နေကြောင်း သိရသည်။

“တစ်လကို ငါးသိန်း ထည့်နေတာ ၃ လ ရှိနေပါပြီ။ တစ်လ ငါးသိန်း ဝင်ငွေက မရှိဘူး၊ ရသမျှစုပြီး သူတို့ကိုပဲ ထည့်နေရတယ်။ မဟုတ်ရင် ရှေ့တန်းရောက်ကုန်တာ၊ ရှေ့တန်းသွားပြီး ပြန်လာတဲ့သူလို့လည်း မကြားဖူးဘူး” – ဟု အင်းလေးဒေသခံ အမျိုးသားတစ်ဦးက ပြောသည်။

ထို့အပြင် အင်းလေးဒေသတွင် PNO တပ်စွဲထားပြီး ပြည်သူများကို ထမင်းထုတ် ပို့ခိုင်းခြင်း၊ ပြည်သူပိုင် စက်လှေများကို ချောဆွဲယူဆောင်ခြင်း တို့ကိုလည်း လုပ်ဆောင်နေကြောင်း ၎င်းက ဆက်ပြောသည်။

“ကျနော်တို့ PNO က သူတို့ကို စစ်မှုထမ်းမခေါ်ဘူး၊ သူတို့အသိစိတ်နဲ့ သူတို့ ဝင်ကြတာ။ သူတို့က ကိုယ့်ဒေသကို ကာကွယ်ဖို့ အသိစိတ်နဲ့ ဝင်ကြတာ။ ပိုက်ဆံတွေ ဘာတွေလည်း ဘာမှ မကောက်ဘူး” – ဟု PNO ၏ သတင်းနှင့် ပြန်ကြားရေးဌာနမှ ဗိုလ်မှူး ခွန်ဆန်းအောင်က ပြောသည်။

သို့သော် စက်တင်ဘာလ ၂ ရက်နေ့က ညောင်ရွှေမြို့နယ်၊ မကျီးဆိပ်ကျေးရွာမှ အသက် ၄၂ နှစ်အရွယ် ကိုအောင်မျိုးဝင်းသည် ပိန္နဲကုန်းကျေးရွာသို့ သွားရောက်စဉ် PNO ပြည်သူ့စစ်တပ်ဖွဲ့ဝင်များ၏ ဖမ်းဆီးခြင်းခံခဲ့ရသည်။

၎င်းနောက် မိသားစုဝင်များကို ငွေကျပ် သိန်း ၁၀၀ ဖြင့် ပြန်လည်ရွေးခိုင်းခဲ့ရာ၊ မိသားစုက သွားရောက် ခေါ်ယူစဉ် ပြင်းထန်ဒဏ်ရာများ ရရှိထားပြီး ဆေးရုံရောက်ချိန်တွင် သေဆုံးခဲ့ကြောင်း သတင်းများ၌ ဖော်ပြထားသည်။