သျှမ်းပြည်နှင့် မန္တလေးနယ်စပ် TNLA ဆုတ်ခွာမည်ဟုဆိုထားသည့် မိုးကုတ်မြို့တွင် တော်လှန်ရေးအင်အားစုများနှင့် ဒေသခံပြည်သူများမှ စစ်အာဏာရှင်ဆန့်ကျင်ရေး သံပုံးတီးဆန္ဒပြမှုများ ပြုလုပ်ခဲ့ကြောင်း စုံစမ်းသိရသည်။

ယမန်နေ့ (နိုဝင်ဘာလ ၆ ရက်) ည ၈ နာရီမှ စတင်ကာ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) တပ်ဆုတ်ခွာမည်ဟု ကြေညာထားသည့် မိုးကုတ်မြို့တွင် တော်လှန်ရေးအင်အားစုများ၊ ဒေသခံပြည်သူများမှ စစ်အာဏာရှင်စနစ် ဆန့်ကျင်ရေးနှင့် စစ်ကောင်စီဘက်မှ မြို့ထဲသို့ ပြန်လည်ဝင်ရောက်လာမည်ကို လုံးဝ လက်မခံရေး အတွက် သံပုံးတီး ဆန္ဒပြခဲ့ကြောင်း ဒေသခံများက ပြောသည်။

“မနေ့ကတော့ မိုးကုတ်မှာ စကစကို သပိတ်မှောက် ဆန္ဒပြတယ်၊ သီချင်းတွေလည်း ဖွင့်တယ်။ ၁၀ မိနစ်လောက်ပေါ့။ တော်လှန်ရေးဘက်ကရော၊ ဒေသခံ ပြည်သူတွေကရော တစ်မြို့လုံးနီးပါး ပဲ။ အဓိက တော့ စကစကို မိုးကုတ်၊ မိုးမိတ်ကို ပေးလိုက်တာမို့၊ ဒီမြို့တွေကို စကစ မပေးဖို့ သပိတ်မှောက် ဆန္ဒပြတာပေါ့” – ဟု မိုးကုတ်ဒေသခံ အမျိုးသားတစ်ဦးက ပြောသည်။

မိုးကုတ်ပြည်သူများသည် စစ်အာဏာရှင်စနစ်ကို အလိုမရှိကြောင်း၊ အကြမ်းဖက်စစ်အုပ်စုက မိုးကုတ်မြို့ ထဲသို့ ပြန်လည်ဝင်ရောက်လာမည်ကို လုံးဝလက်မခံနိုင်ကြောင်း ယခု လူထုလှုပ်ရှား မှုမှတစ်ဆင့် ဖော်ထုတ်ပြသခဲ့ခြင်းဖြစ်သည်ဟု အထွေထွေသပိတ် ပေါင်းစပ်ညှိနှိုင်းရေးအင်အားစု (GSCB) မှ ထုတ်ပြန်ထားသည်။

မိုးကုတ်မြို့ကို “၁၀၂၇ စစ်ဆင်ရေး” ဒုတိယပိုင်းအဖြစ် ယမန်နှစ် ၂၀၂၄ ဇူလိုင်လအတွင်း TNLA နှင့် PDF ပူးပေါင်းတပ်များက တိုက်ခိုက်ထိန်းချုပ်နိုင်ခဲ့ပြီး အုပ်ချုပ်ရေးယန္တရားကို TNLA ဘက်မှ ဦးဆောင် လည်ပတ်ခဲ့သည်။

သို့သော် အောက်တိုဘာလ ၂၇-၂၈ ရက်နေ့များတွင် တရုတ်နိုင်ငံ၏ ကြားဝင်စေ့စပ်မှုကြောင့် TNLA နှင့် စစ်ကောင်စီ ကိုယ်စားလှယ်တို့ တရုတ်နိုင်ငံ ကူမင်းမြို့၌ (၉) ကြိမ်မြောက် တွေ့ဆုံဆွေးနွေးခဲ့ပြီး အပစ်အခတ်ရပ်စဲရေး လက်မှတ်ထိုးခဲ့သည်။

သဘောတူ သတ်မှတ်ထားသည့် ကာလတွင် မိုးကုတ်နှင့် မိုးမိတ်မြို့နယ်များမှ TNLA တပ်ဆုတ်ခွာပေးမည် ဖြစ်ကြောင်း TNLA သတင်းနှင့် ပြန်ကြားရေးဌာနမှ အောက်တိုဘာလ ၂၉ ရက်နေ့တွင် တရားဝင် ထုတ်ပြန် ထားသည်။

ထို့နောက်တွင် မိုးကုတ်မြို့သိမ်း တိုက်ပွဲအတွင်း TNLA နှင့်အတူ ပါဝင်ခဲ့ကြသည့် ပြည်သူ့ကာကွယ်ရေးတပ်မတော် မန္တလေး- PDF ၊ မိုးကုတ်ဗျူဟာ၊ မိုးကုတ်နှင့် ပြင်ဦးလွင်မြို့နယ် ပြည်သူ့ကာကွယ်ရေးအဖွဲ့ (ပကဖ) တို့က ထိန်းချုပ်နယ်မြေကို ကာကွယ်ရန် မိတ်ဖက်တော်လှန်ရေး အင်အားစုများနှင့် လက်တွဲ၍ အစွမ်းကုန် ခုခံကာကွယ်သွားမည် ဖြစ်ကြောင်း ကြေညာခဲ့သည်။

“အခု မြို့ကနေ ဆုတ်ခွာသွားတဲ့သူတွေလည်းရှိတယ်။ စကစဘက်က မိုးကုတ်နဲ့ မိုးမိတ်ကို စစ်ကြောင်း ထိုးလာရင်တော့ တိုက်ပွဲကတော့ ဖြစ်မှာပဲ” – ဟု မိုးကုတ်ဒေသခံ ၎င်းအမျိုးသားက ဆက်ပြောသည်။

TNLA အနေဖြင့် မိုးကုတ်မြို့မှ နိုဝင်ဘာလ ၂၀ ရက်နောက်ဆုံးထား တပ်ဆုတ်ခွာရမည်ဟု သတင်းထွက်ပေါ်နေပြီး၊ လက်ရှိအချိန်ထိ စစ်ကောင်စီတပ်ဘက်မှ မိုးကုတ်မြို့ထဲ မည်သို့ ဝင်ရောက်လာမည်ကို မသိရသေးဘဲ လုံခြုံရေးစိုးရိမ်မှုကြောင့် ဒေသခံအချို့ ထွက်ပြေးတိမ်းရှောင်နေကြောင်း သိရသည်။