သျှမ်းပြည် ကျောက်မဲမြို့နယ်တွင် တောင်ယာတဲထဲ စပါးပြန်ယူသည့် စစ်ဘေးရှောင်နှစ်ဦး မြေမြှုပ်မိုင်း နင်းမိပြီး မိန်းကလေးတစ်ဦး ပွဲချင်းပြီ သေဆုံးကာ အမျိုးသားတစ်ဦး ဒဏ်ရာရရှိခဲ့ကြောင်း စုံစမ်းသိရသည်။
အောက်တိုဘာလ ၂၅ ရက် နေ့လယ် ၁ နာရီကျော်တွင် ကျောက်မဲ-မိုင်းငေါ့ လမ်းမကြီးဘေးရှိ နမ့်မန်းရွာတွင် တောင်ယာတဲထဲ စပါးပြန်ယူသည့် စစ်ဘေးရှောင် (၂) ဦး မြေမြှုပ်မိုင်း နင်းမိခဲ့ပြီး အသက် (၁၅) နှစ်အရွယ် မိန်းကလေးတစ်ဦး ပွဲချင်းပြီး သေဆုံးကာ ၎င်းကို သွားကယ်သည့် အသက် (၅၀) ကျော်အရွယ် အမျိုးသားတစ်ဦးလည်း လက်တွင် ထိခိုက်ဒဏ်ရာ ရရှိခဲ့ကြောင်း ကျောက်မဲဒေသခံများက ပြောသည်။
“၁၁ မိုင်ဘက် ပစ္စည်းပြန်ယူရင်း မိုင်းနင်းမိတာ။ ဦးလေးက တောင်ယာတဲမှာ စပါးသွားယူတဲ့ချိန် ကောင်မလေးကလည်း ဆိုင်ကယ်နဲ့ လာတာ၊ မိုင်းထောင်ထားတဲ့ ကြိုးနဲ့ ထိမိပြီး ပေါက်ကွဲလို့ ကောင်မလေးက လမ်းပေါ် လဲကျသွားတာ။ သူ့ကို သွားကယ်ဖို့ လုပ်တဲ့ချိန် နောက်တစ်လုံး ထပ်ကွဲတာ။ ကောင်မလေးက ခေါင်းထိပြီး ဆုံးသွားတာ၊ ဦးလေးက လက်မှာထိတာ”ဟု ဖြစ်စဉ်သိရှိသူ ကျောက်မဲဒေသခံ အမျိုးသားတစ်ဦးက ပြောသည်။
နမ့်မန်းကျေးရွာသည် စစ်ကော်မရှင်တပ် ပြန်လည်ထိန်းချုပ်ထားသည့် ကျောက်မဲမြို့နှင့် TNLA ထိန်းချုပ်ထားသည့် မိုင်းငေါ့မြို့ကြားတွင် တည်ရှိပြီး ကျောက်မဲမြို့နှင့် ၁၃ မိုင်ခန့် ကွာဝေးကာ စစ်ရှောင်နှစ်ဦး စပါးပြန်ယူရင်း မိုင်းနင်းမိခြင်းကြောင့် တောင်ယာစပါးရိတ်ရန် စိုးရိမ်ထိတ်လန့်နေကြကြောင်း စစ်ဘေးရှောင်များထံမှ သိရသည်။
အလားတူ အောက်တိုဘာလ ၂၄ ရက်တွင် TNLA ထိန်းချုပ်ထားသည့် မိုင်းလုံမြို့အနီးရှိ ကော်ပေါင်ကျေးရွာကို စစ်ကော်မရှင်တပ်က လေကြောင်းဖြင့် ပေါင် (၅၀၀) ဗုံးတစ်လုံး ကြဲချတိုက်ခိုက်ခဲ့ရာ သက်တော် (၇၀) ရှိ ကျောင်းထိုင်ဆရာတော် ပျံလွန်သွားခဲ့ပြီး ကိုရင် (၅) ပါးနှင့် အရပ်သား (၂) ယောက် ထိမှန်ဒဏ်ရာ ရရှိခဲ့ကြောင်း TNLA ဘက်မှ ထုတ်ပြန်ထားသည်။
ပြီးခဲ့သည့် အောက်တိုဘာလ ၁၈ ရက်တွင်လည်း ကျောက်မဲ-မိုင်းငေါ့လမ်းပေါ်ရှိ နမ့်မန်း ဘုန်းကြီးကျောင်းကို စစ်ကော်မရှင်တပ်က လေကြောင်းဖြင့် ပေါင် (၅၀၀) ဗုံး ကြဲချတိုက်ခိုက်ခဲ့ခြင်းကြောင့် သံဃာတော် (၂) ပါး ထိခိုက်ဒဏ်ရာရခဲ့ကြောင်း ဒေသခံများက ပြောသည်။
ထို့အပြင် အောက်တိုဘာ (၈) ရက်တွင်လည်း နမ့်မန်းတံတားအနီးကို စစ်ကော်မရှင်တပ်က လေကြောင်းဖြင့် ပေါင် (၂၅၀) ဗုံးနှစ်လုံး တိုက်ခိုက်ခဲ့ခြင်းကြောင့် တံတား ထိခိုက်ပျက်စီးသွားကြောင်း ဒေသခံများထံမှ သိရသည်။
Leave a Comments