ထိုင်းနိုင်ငံရှိ သျှမ်းလူငယ်ဂိုဏ်း၏ လုပ်ရက်များကြောင့် ထိုင်းနိုင်ငံရောက် သျှမ်းလူမျိုးများသည် အသက်မွေးဝမ်းကြောင်းလုပ်ငန်းများ ထိခိုက်နစ်နာသည့်အပြင် ထိုင်းလူမျိုးတို့၏ အထင်မှားခြင်း၊ အထင်သေးခြင်းခံခဲ့ရသည့်အတွက် ဥပဒေကိုလိုက်နာရန် RCSS က ယနေ့တွင် ထုတ်ပြန်တိုက်တွန်းလိုက်သည်။

ပြည်တွင်းနိုင်ငံရေး၊ စစ်ရေး အခြေအနေ၊ စားဝတ်နေရေးနှင့် အသက်မွေးဝမ်းကြောင်း အခက်အခဲကြောင့် သျှမ်းလူမျိုးအများအပြားသည် ထိုင်းနိုင်ငံအတွင်းသို့ ရွေ့ပြောင်းဝင်ရောက်ခိုလှုံပြီး အသက်မွေးဝမ်းကြောင်း လုပ်ငန်များ လုပ်ကိုင်လာခဲ့သည်မှာ နှစ်ပေါင်းများစွာ ကြာမြင့်ခဲ့ပြီ ဖြစ်သည်။

ထိုင်းနိုင်ငံရှိ သျှမ်းလူမျိုးအများစုသည် ဥပဒေကို လိုက်နာခဲ့ကြေသော်လည်း သျှမ်းလူငယ်ဂိုဏ်းများက ဥပဒေကို ချိုးဖောက်ခဲ့ခြင်းကြောင့် သျှမ်းလူမျိုးများ၏ နေထိုင်လုပ်ကိုင် စားသောက်မှုများ ထိခိုက်နာနာစေသည့်အပြင် ထိုင်းလူမျိုးတို့၏ အထင်မှားခြင်း၊ အထင်သေးခြင်းတို့ကိုလည်း ခံခဲ့ရကြောင်း RCSS က ဆိုထားသည်။

ထို့ပြင် ထိုင်းနိုင်ငံအချို့မြို့ကြီးများတွင် ထိုင်းနိုင်ငံဖွား သျှမ်းလူငယ်အချို့၏ ဂိုဏ်း၊ အစုအဖွဲ့ တည်ထောင်ပြီး အချင်းချင်း ရိုက်နှက်ခြင်း၊ ခိုက်ရန်ဖြစ်ပွားခြင်း စသည့် အပြုအမူများအား သျှမ်းပြည်ပြန်လည်ထူထောင်ရေး ကောင်စီ (RCSS) မှ ပြတ်သားစွာ ဆန့်ကျင်ကြောင်း ထုတ်ပြန်ထားသည်။

ထိုကြောင့် ထိုင်းနိုင်ငံရောက် သျှမ်းလူမျိုးတို့၏ အကျိုးစီးပွားကို ရည်မှန်း၍ ထိုင်းဘုရင်မင်းမြတ်ကို ဦးညွှတ်ရိုသေ လေးစားသမှုပြုခြင်း၊ ထိုင်းလူမျိုးများနှင့် ဟန်ချက်ညီစွာ နေထိုင်တတ်ခြင်း၊ ထိုင်းနိုင်ငံ၏ ဥပဒေများ လိုက်နာခြင်းတို့ကို ဆောင်ရွက်ကြပါရန် RCSS မှ ထိုင်းရောက် သျှမ်းလူမျိုးများကို တိုက်တွန်းထားသည်။

ပြီးခဲ့သည့် စက်တင်ဘာလ ၁၆ ရက်နေက ထိုင်းနိုင်ငံ ချင်းမိုင်မြို့တွင် သျှမ်းလူငယ်ဂိုဏ်းအဖွဲ့သည် အသက် (၁၄) နှစ်အရွယ် မိန်းကလေးတစ်ဦး အပါအဝင် လူငယ် (၃) ဦးကို ဓားဖြင့်ဝင်ရောက် တိုက်ခိုက်ခဲ့ကြောင်း သိရသည်။

အလားတူ သြဂုတ် ၂၉ ရက်တွင်လည်း ချင်းမိုင်မြို့ ကက်လုံဈေးအနီးတွင် မြန်မာနိုင်ငံသား သျှမ်းလူငယ် ၆ ဦးသည် ထိုင်းတက္ကသိုလ် ကျောင်းသားလူငယ်များကို ဓားဖြင့်လိုက်ခုတ်ခဲ့သဖြင့် ၅ ဦးကို ထိုင်းရဲတပ်ဖွဲ့က ဖမ်းဆီးရမိခဲ့ကြောင်း သိရသည်။