သျှမ်းပြည်တောင်ပိုင်း၊ ရွာငံမြို့နယ် ကျောက်တောကျေးရွာတွင် စစ်ဘေးရှောင်စခန်းပေါ် တောင်ပြိုကျပြီး တစ်နှစ်ခွဲအရွယ် ကလေးအပါအဝင် စစ်ဘေးရှောင် (၁၀)ဦး နစ်မြုပ်သေဆုံး ခဲ့ကြောင်း သတင်းရရှိသည်။
ပြီးခဲ့သည့် စက်တင်ဘာလ ၂၄ ရက်တွင် ရွာငံမြို့နယ်ထဲ မိုးအဆက်မပြတ် ရွာသွန်းခဲ့ခြင်းကြောင့် တောင်ကျရေနှင့်အတူ ရွှံ့နွံ၊ ကျောက်တုံး၊ သစ်တုံးများ မျှောပါလာပြီး ကျောက်တောရွာရှိ စစ်ဘေးရှောင်စခန်းပေါ်သို့ ကျရောက်ကာ စစ်ရှောင်(၁၀)ဦး နစ်မြုပ်သွားခဲ့သည်။
ထိုထဲမှ အသက် ၂၂ နှစ်အရွယ် အမျိုးသားတစ်ဦး၏ ရုပ်အလောင်း တစ်လောင်းသာ ရှာဖွေတွေ့ရှိထားပြီး (၉) ဦး ပျောက်ဆုံးနေဆဲဖြစ်ကြောင်း ဓနုပြည်နယ်အမျိုးသားကာကွယ်ရေးတပ်ဦး (DSNDA) မှ ယနေ့ (စက်တင်ဘာ ၂၆ ရက်) တွင် ထုတ်ပြန်သည်။
“ရွာငံမှာက ခုတလော မိုးအရမ်းများတယ်။ စစ်ရှောင်နေရင်း သူတို့ပေါ်ကို မြေပြိုကျပြီး ဆယ်ဦးလုံး ပိသွားတာ။ တစ်ဦးတော့ တွေ့ပြီ၊ ကျန်တဲ့ ၉ ဦးကိုတော့ ရှာနေတုန်းပဲ”ဟု DSNDA တပ်ဖွဲ့၏ သတင်းနှင့်ပြန်ကြားရေးတာဝန်ခံ ကိုကျားပျံက သျှမ်းသံတော်ဆင့်ကို ပြောသည်။
ပျောက်ဆုံးနေသည့် စစ်ရှောင်များထဲတွင် အမျိုးသမီး (၅) ဦး၊ အသက် ၁ နှစ်ခွဲအရွယ် ကလေးငယ် (၁) ဦး၊ အမျိုးသား (၄) ဦး၊ စုစုပေါင်း စစ်ဘေးရှောင် (၉) ဦးတို့ ဖြစ်ကြောင်း DSNDA ထုတ်ပြန်ချက်တွင် ဖော်ပြထားသည်။
ပြီးခဲ့သည့် ဩဂုတ်လ ၁၈ ရက်တွင် စစ်ကော်မရှင်တပ်က ကျောက်တောကျေးရွာနှင့် ညောင်ပင်သာကျေးရွာဘက်သို့ လေကြောင်းဖြင့် ဗုံးကြဲကာ မြေပြင်မှလည်း စစ်ကြောင်းထိုး ဝင်ရောက်ခဲ့သည့်အပြင် နေအိမ်များကို မီးရှို့ဖျက်ဆီးခဲ့သောကြောင့် ဒေသခံများမှာ တောတောင်ထဲသို့ စစ်ဘေးတိမ်းရှောင်ခဲ့ရသည်။
ကျောက်တောကျေးရွာတွင် အိမ်ခြေ (၈၆) အိမ်ရှိပြီး ညောင်ပင်သာကျေးရွာတွင် (၄၆)အိမ်ရှိကာ နှစ်ရွာပေါင်း စစ်ဘေးရှောင် ၆၀၀ ဦးခန့် ထွက်ပြေးတိမ်းရှောင်နေရသည်ဟု သိရသည်။
“စစ်တပ်ကလည်း လမ်းတွေပိတ်ပြီး တောက်လျှောက် စစ်ကြောင်းထိုးနေပါတယ်။ စစ်ရှောင်တွေကလည်း တောတောင်ထဲမှာ ဖြစ်သလို အသက်ရှင်ရုံ စားသောက်နေကြရပါတယ်။ သူတို့အတွက် ကျန်းမာရေး စောင့်ရှောက်မှုတွေလည်း လိုအပ်လျှက်ရှိပါတယ်”ဟု DSNDA ၏ သတင်းနှင့် ပြန်ကြားရေး တာဝန်ခံ ကိုကျားပျံက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် စက်တင်ဘာလ ၂၃ ရက်နေ့တွင် စစ်ကော်မရှင်တပ်က ရွာငံမြို့နယ် မြောက်ဘက် တောတောင်ဘက်သို့ စစ်ကြောင်းထိုးရာတွင် လှိုဏ်ဂူထဲတွင် ပုန်းအောင်းနေသော ကျောက်တောကျေးရွာမှ စစ်ရှောင်မိသားစု နှစ်စုကို ဖမ်းဆီးခေါ်ဆောင်သွားပြီး ယနေ့အထိ အဆက်အသွယ် ပြန်မရတော့ကြောင်း သိရသည်။
“စစ်ရှောင်မိသားစု နှစ်စုကို စစ်ကော်မရှင်က စစ်ကြောင်းထိုးရင်း လှိုဏ်ဂူထဲမှာ တွေ့လို့ ဖမ်းသွားတယ်။ ခုထိတော့ ဘယ်မှာ ဖမ်းထားလည်း ဆိုတာ သတင်းအစအန မရသေးဘူး” ဟု DSNDA ၏ သတင်းနှင့် ပြန်ကြားရေး တာဝန်ခံ ကိုကျားပျံ က ပြောသည်။
အလားတူ ဩဂုတ်လ ၂၄ ရက်နေ့တွင် စစ်ကော်မရှင်တပ်က ကျောက်တောကျေးရွာသို့ စစ်ကြောင်းထိုးလာစဉ် ကျန်ရှိနေသည့် နေအိမ်များကို မီးရှို့၍ ဒေသခံများ၏ ကျွဲ၊ နွား၊ ကြက် စသည်တို့ကို သတ်စားသွားကြောင်း သိရသည်။
ယခုလက်ရှိ ရွာငံတွင် စစ်ကော်မရှင်တပ်က မကြာခဏ စစ်ကြောင်းထိုးမှု ပြုလုပ်နေပြီး ဒေသခံများကို လူသားဒိုင်းအဖြစ် ဖမ်းဆီးမှုများလည်း ရှိနေကြောင်း သိရသည်။
Leave a Comments