သျှမ်းပြည် ညောင်ရွှေမြို့နယ် အင်းလေးဒေသသည် ရေးဘေးသင့်ဒဏ်နှင့် ငလျင်ဒဏ်ကြား စစ်ကော်မရှင်က လုံခြုံရေး အပြည့်ဖြင့် ဖောင်တော်ဉီး ဘုရားပွဲကို ကျင်းပနေကြောင်း သတင်းရရှိသည်။
ဖောင်တော်ဉီး ဘုရားပွဲကို ယနေ့ (စက်တင်ဘာ ၂၂)ရက်မှ စပြီး နိုဝင်ဘာ ၉ရက်တွင် စစ်ကော်မရှင် က ဦးဆောင် ကျင်းပနေသည်။
“ လုံခြုံရေးတော့ အပြည့်ရှိတယ်။ စစ်သားတွေလည်းစောင့်နေတယ်။ ခရီးသွားတွေတော့ မရှိသေးပေမယ့် ဒေသခံတွေနဲ့ စည်နေတာ။” အင်းလေးဒေသခံ လူငယ်တစ်ဉီးက သျှမ်းသံတော်ဆင့်ကိုပြောသည်။
ဖောင်တော်ဦးဘုရားကို အင်းတိန် စံကျောင်း၊ ဟဲယာရွာမ၊ ငါးဖယ်ချောင်း၊ ကြေးစား၊ ပွဲစားကုန်း၊ လင်းကင်း၊ ညောင်ရွှေ၊ နန်းသဲ၊ မိုင်းသောက်၊ သလဲဦး၊ ကေလာ၊ ဇရပ်ကြီး၊ အလိုတော်ပေါက်၊ နန်းပန်တောင်ကျောင်း၊ မကျည်းဆိပ်၊ မိုင်းပျိုး၊ ကျိုင်းခန့်၊ နောင်တော၊ အင်းပေါ်ခုံ၊ ရေဆာစသည့် ၂၁ ဌာနကို ကြွချီမှာဖြစ်ကြောင်းသိရသည်။
အင်းလေးဒေသသည် ပြီးခဲ့သည့် ၂၀၂၄ ခုနှစ်တွင် ရေဘေး နှင့် ယခု ၂၀၂၅ မတ်လတွင် ငလျင်ဘေးတို့ကို အကြီးကျယ်ခံစားခဲ့ရသည့်ဒေသဖြစ်ပြီ ယနေ့ထိတောင်ပြည်သူများက နလန်မထူနိုင်သေးခင် စစ်ကော်မရှင် နှင့် ပအိုဝ်းပြည်သူ့စစ် PNO တို့က ဦးဆောင်ပြီး ဖောင်တော်ဦးဘုရားပွဲကို ကျင်းပကြောင်း သိရသည်။
ထိုဖောင်တော်ဦးပွဲကို ကျင်းပနိုင်ရန် အတွက် ရေဘေးသင့် ၊ ငလျင်ဘေးသင့်ဒဏ်ခံရသည့် အင်းလေးဒေသတွင် နေထိုင်သည့်သူများကို တစ်အိမ်လျှင် ကျပ်ငွေ ၁ သောင်းကောက်ယူပြီ ကျင်းပခဲ့ကြောင်း သျှမ်းသံတော်ဆင့် သတင်းစာမျက်နှာတွင် သြဂုတ် ၁၈ရက်တွင် သတင်း ဖော်ပြခဲ့ဖူးသည်။
တဖက်တွင်လည်း ငလျင်ဘေးသင့်ဒဏ်၊ ရေကြီးမှုဒဏ်ကို အရင်ဖြေရှင်းပေးပြီးမှသာ ဖောင်တော်ဉီး ဘုရားပွဲကို ကျင်းပသင့်ကြောင်းလည်း ဒေသခံများကပြောသည်။
အင်းလေးဒေသမှ သက်ဆိုင်ရာ အာဏာပိုင်များသည် ပြည်သူများ၏ နေအိမ်နှင့် အင်းလေးကန် ရေဘေးသင့်မှုနှင့် ငလျင်ဘေးဒဏ်ကို ကူညီဆောင်ရွက်မှု အားနည်းနေပြီး ဖောင်တော်ဉီးဘုရားကျင်းပနိုင်ရေးနှင့် ငလျင်ကြောင့် ပျက်စီးသွားသည့် ဖောင်တော်ဉီး ဘုရားစောင်းကိုသာ အဓိကပြင်ဆင်ပြီး ပွဲတော်ကိုသာ ဦးစားပေးနေကြောင်း အင်းလေး ဒေသခံ လူငယ်တစ်ဉီးကပြောသည်။
“ ကျနော်တို့အင်းလေးမှာက ရေဘေး ၊ ငလျင်ဘေးကော ကြုံထားရတယ်လေ။ နေအိမ်တွေအများပျက်စီးထားတယ်။ အခုထိ ပျက်သွားတဲ့အိမ်တွေ ဆောက်လို့မပြီးသေးတာလည်းရှိတယ်။ အခုလို ပွဲလုပ်မဲ့နေရာမှာ ပြန်လည်ထူထောင်ရေး ၊ ပြုပြင်ရေးတွေလုပ်တာတော့ပိုထိရောက်တာပေါ့ ။ အခုကပြုပြင်ရေးတွေ မလုပ်နေတာတော့မဟုတ်ဘူး။ လုပ်နေပေမဲ့ ထိရောက်မှုက အရမ်းမရှိသေးဘူးလို့ထင်တယ်။” ဟု ၎င်း ဒေသခံ အမျိုးသားက ပြောသည်။
စစ်တပ်အာဏာသိမ်းပြီး ၅ နှစ်တာ ကာလအတွင်း ဖောင်တော်ဦးဘုရားပွဲတော်ကို ၂၀၂၃ ခုနှစ်တွင် တစ်ကြိမ်သာလျှင် ကျင်းပခဲ့ကြောင်းနှင့် ထိုကျင်းပမည့်အချိန်၌ ဘုန်းကြီးကျောင်းတွင် လာရောက်ခိုလှုံနေသည့် စစ်ရှောင်များကို အတင်းအဓမ္မ နေရာဖယ်ခိုင်းမှုများ လုပ်ဆောင်ခဲ့သည်။
အင်းလေးဒေသအတွင်း ငလျင်ဒဏ်ကြောင့် ရွာပေါင်း ၃၀ ဝန်းကျင်ခန့်၊ နေအိမ် ၃၅၀၀ ထက်မနည်း ပျက်စီးခဲ့ရပြီး ရွာတိုင်းနီးပါး သောက်ရေ သုံးရေ အခက်အခဲများ ကြုံတွေ့နေရကြောင်း သိရသည်၊
Leave a Comments