သျှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသတွင် ငလျင်ဘေး၊ ရေဘေးသင့်နေသည့်ကြားမှ ဖောင်တော်ဦးဘုရားပွဲကို စစ်ကော်မရှင်နှင့် PNOပြည်သူ့စစ်တို့ ဦးစီးပြီး ကျင်းပသွားမည်ဟု သတင်းရရှိသည်။

လာမည့် စက်တင်ဘာလ ၂၂ ရက်မှစပြီး အောက်တိုဘာလ ၉ ရက်အထိ အင်းလေး ဒေသတွင် ဖောင်တော်ဦး ဘုရားပွဲကို ၁၈ ရက်ကြာ ကျင်းပ ပြုလုပ်သွားမည်ဟု သိရသည်။

ငလျင်ဘေးနှင့် ရေဘေးဒဏ် နလန်မထူနိုင်သေးသည့်ကြား အင်းလေး ဖောင်တော်ဦးဘုရားပွဲကို စစ်ကော်မရှင်နှင့် PNOပြည်သူ့စစ်များက ဦးစီးပြီး ငလျင်ဘေးသင့်ဒဏ်နှင့် ရေဘေးသင့်ဒဏ်ခံနေရသည့် ပြည်သူများကြား ပိုက်ဆံကောက်ယူနေကြောင်း အသက် ၂၀ကျော်အရွယ်ရှိ အမျိုးသမီးက သျှမ်းသံတော်ဆင့်ကိုပြောသည်။

“ဟိုနေ့ကတော့ ၁ သောင်းထည့်လိုက်ရတယ် ခုရွာမှာ အကောက်ခံအရမ်းများနေတယ် ကျောင်းအုပ်ကြီးကကောက်လိုက် စစ်မှူထမ်းကကောက်လိုက်၊ ဘုန်းကြီးကျောင်းကကောက်လိုက်စိတ်ပျက်စရာကြီး။ ရေကလည်း တက်လိုက်ပဲ ကိုယ့်အိမ်မမြုပ်အောင်တောင် ဆုတောင်းနေရတာ။” ဟု ၎င်း အမျိုးသမီးတစ်ဦးက ပြောသည်။

ထို့အပြင် ငလျင်လှုပ်ဒဏ်ကြောင့် ပျက်စီးသွားသည့် ဘုန်းကြီးကျောင်းများကိုလည်း ပြင်ဆင်ရမည်ဖြစ်ပြီး ဆွဲလှေများကိုလည်း ပြင်ရမည်ဖြစ်သောကြောင့် အနည်းဆုံး ကျပ်သိန်း ၅၀ ကုန်ကျနိုင်ကြောင်း ၎င်းက ဆက်ပြောသည်။

စစ်တပ်အာဏာသိမ်းပြီးး ၅ နှစ်တာ ကာလအတွင်း ဖောင်တော်ဦးဘုရားပွဲတော်ကို ၂၀၂၃ ခုနှစ်တွင် တစ်ကြိမ်သာလျှင် ကျင်းပခဲ့ကြောင်းနှင့် ထိုကျင်းပမည့်အချိန်၌ ဘုန်းကြီးကျောင်းတွင် လာရောက်ခိုလှုံနေသည့် စစ်ရှောင်များကို အတင်းအဓမ္မ နေရာဖယ်ခိုင်းမှုများ လုပ်ဆောင်နေကြောင်း အသက် ၃၀ ဝန်းကျင် အင်းလေးလူငယ် အမျိုးသားတစ်ဦးက ပြောသည်။

“စစ်တပ် အာဏာသိမ်းပြီးတဲ့နောက်မှာ တစ်ကြိမ်ပဲကျင်းပဖူးသေးတယ်။ဒေသခံတွေက စီးပွားရေး အဆင်မပြေဘူး။ ကျွေးမွေးစရိတ်တွေ လည်း ထည့်ရအုံးမှာ။ စစ်လှေပြင်ဖို့ အတွက်လည်း ထည့်ရအုံးမှာ။ ဘုရားပွဲကလည်း ၅ နှစ်အတွင်းမှာ တစ်ကြိမ်ပဲ ကျင်းပဖူးသေးတာ။ တစ်ချို့ကတော့ ပျော်ကြမှာပေါ့။ တစ်ချို့ကျတော့ ရေဘေးရော ငလျင်ဘေးရော ဒုက္ခပေါင်းစုံ ကြုံနေရတော့ မပျော်နေကြဘူး။” ဟု အဆိုပါ အမျိုးသား ကပြောသည်။

ဆက်လက်ပြီး ဘုန်းကြီးကျောင်းတွင် လာရောက်စစ်ရှောင်နေသူများကိုလည်း ဘုရားပွဲ ကျင်းပမည်ဆိုသောကြောင့် နေရပ်အတင်း ပြန်ခိုင်းနေမှုများလည်း ရှိနေကြောင်း နှင့် စစ်ကော်မရှင် မိသားစုများ ဘုရားပွဲလာရောက်လျှင်လည်း နေထိုင် စားသောက်ရန်အတွက်လည်း ပြင်ဆင်ထားရကြောင်း ၎င်းက ဆက်ပြောသည်။

စစ်ကော်မရှင်နှင့် PNOပြည်သူ့စစ်တို့က ဘုရားပွဲအတွင်း လုံခြုံရေးယူပေးသွားမည် ဖြစ်ပြီး ဒေသခံများကိုလည်း ဘုရားပွဲအတွက် ပူးပေါင်းပါဝင်ပေးရန် တိုက်တွန်းထားကြောင်း သိရသည်။

ပြီးခဲ့သည့် ဩဂုတ်လ ၁၄ ရက်နေ့တွင်လည်း အင်းလေးဒေသ၌ မိုးသန်းထန်စွာ ရွာသွန်းမှုကြောင့် ရေထပ်မံမြင့်တက်လာပြီး ဒေသခံများ ဘေးလွတ်ရာသို့ ပြောင်းရွှေ့နေထိုင် နေရကြောင်းသိရသည်။

အင်းလေးကန် ရေကြီးမှုသည် အနီရောင်အဆင့်မှ ခရမ်းရောင် အဆင့်ထိ မြင့်မားနိုင်သဖြင့် ဒေသခံများ သတိပြုကာ အန္တရာယ်မှ ရှောင်ရှားနိုင်ရန် ကြိုတင်သတိပေးမှုများ ရှိနေကြောင်း သိရသည်။