သျှမ်းပြည်တောင်ပိုင်း၊ အင်းလေး‌ဒေသတွင် အင်းလေးပြည်သူ့ ကာကွယ်ရေးတပ် (PDF) အမှတ် (၁၀၀၉) တပ်ရင်းမှ ရဲဘော်နှစ်ဦးကို စစ်ကော်မရှင်တပ်က ဖမ်းဆီးခဲ့ပြီးနောက် ၎င်းတို့ကို အသုံးပြု၍ ထောက်ချောက်ဆင် မျှားခေါ်မှုပြုလုပ်ခဲ့ရာ  CDM ကျန်းမာရေး ဝန်ထမ်း ဟောင်းတစ်ဦး ဖမ်းဆီးခံရကြောင်း အင်းလေးပြည်သူ့ကာကွယ်ရေးတပ်က ပြီးခဲ့သည့် ဇွန်လ (၂၂)ရက်တွင် ထုတ်ပြန်ထားသည်။

ဖြစ်စဉ်မှာ ပြီးခဲ့သည့် ဇွန်လ (၈)ရက်နေ့တွင် အင်းလေး တော်လှန်ရေးတပ်ဖွဲ့ဝင် ရဲဘော်အငယ်ကောင်(ခ) ကျော်ဖြိုးလင်း နှင့် ရဲဘော် AD (ခ) ကောင်းစည်သူ တို့ စစ်ကော်မရှင်တပ်က ဖမ်းဆီးသွားခဲ့သည်။

ထိုသို့ ဖမ်းဆီးခံထားရသည့် ရဲဘော် နှစ်ဉီး၏ ဖုန်းများကို အသုံးပြုကာ နယ်မြေအတွင်း ဖြန့်ကြက်လှုပ်ရှားနေသည့် အခြား တော်လှန်ရေးရဲဘော်နှင့် တော်လှန်ရေးအင်အားစုများကို ဖုန်းဆက်၍ ထောက်ချောက်ဆင် မျှားခေါ်မှု ပြုလုပ်နေကြောင်း   ထုတ်ပြန်ချက်တွင် ဖော်ပြထားသည်။

အဆိုပါ ထောက်ချောက်ဆင် ဖမ်းဆီးမှုကြောင့် ပြီးခဲ့သည့် ဇွန်လ (၁၉)ရက်နေ့ ည (၇) နာရိ အချိန်တွင် CDM ကျန်းမာရေး ဝန်ထမ်း ဟောင်းတစ်ဦးသည် စက်မှုဇုန်မှ အင်းလေးဒေသအတွင်းသို့  ပြန်လာစဉ်စစ်ကော်မရှင် တပ်၏ ဖမ်းဆီးမှုကို ခံခဲ့ရကြောင်း သိရသည်။

“စစ်တပ်က ဖမ်းသွားတဲ့ ရဲဘော်တွေကို စစ်တပ်က အသုံးချတာ၊ သူတို့ကို ဖုန်းလိုက်ဆက်ခိုင်းပြီး တမင်ထောင်ချောက်ဆင်တာ၊ အခုလည်း CDM ကျန်းမာရေး ဝန်ထမ်း ဟောင်းကို ထပ်ဖမ်းသွားတယ်၊ခုထိတော့ တောင်ကြီးက (စရဖ)မှာ ထိန်းသိမ်းထားတယ်လို့သိရတယ်။”ဟု တော်လှန်ရေး တပ်ဖွဲ့ဝင် တစ်ဦးက ပြောသည်။

ထိုကြောင့် ဖမ်းဆီးခံရသော ရဲဘော်နှစ်ဦး၏ ဖုန်းနံပတ်များမှ ဆက်သွယ်လာခြင်း၊ စာပို့လာခြင်းများရှိလျှင် ပြန်လည်ဆက်သွယ်ခြင်း မပြုလုပ်ကြရန်နှင့် စစ်ကော်မရှင်တပ်၏ ထောက်ချောက်ဖြစ်နိုင်သဖြင့် ဒေသတွင်း လှုပ်ရှားနေသော တော်လှန်ရေး အဖွဲ့ဝင်များအမြန်ဆုံး ရှောင်တိမ်းကြရန် အဆိုပါ တပ်ဖွဲ့ဝင်ရဲဘော်တစ်ဉီးက အသိပေးပြောသည်။

ထို့အပြင် အင်းလေးဒေသတွင်း တော်လှန်ရေးရဲဘော်များ ဖမ်းဆီးခံရအောင် သတင်းပေးနေသူများကိုလည်း အင်းလေးပြည်သူ့ကာကွယ်ရေးတပ်ဖွဲ့က ပြင်းထန်စွာ တုန့်ပြန်အရေးယူသွားမည်ဟု သတိပေးထားသည်။

အင်းလေးပြည်သူ့ကာကွယ်ရေးတပ် အမှတ်(၁၀၀၉) တပ်ရင်းသည် အင်းလေးဒေသနှင့် ကရင်နီနယ်စပ်တွင် လှုပ်ရှားနေသည် တော်လှန်ရေးတပ်ဖွဲ့ ဖြစ်ကြောင်း သိရသည်။