သျှမ်းပြည်တောင်ပိုင်း တောင်ကြီးမြို့နယ်အတွင်း ကရင်နီပြည်ဘက်မှ လာရောက်စစ်ရှောင်သူများကို စစ်ကော်မရှင်တပ်က နေရပ်ပြန်ရန် အတင်းဖိအားပေးနေပြီး၊ မပြန်လာလျှင် အိမ်ခြံမြေများ သိမ်ဆည်း မည်ဟု ခြိမ်းခြောက်ပြောဆိုနေကြောင်း သတင်းရရှိသည်။
ပြီးခဲ့သည့် ၂၀၂၃ခုနှစ် နိုဝင်ဘာလ ၁၁ ရက်တွင် စစ်ကော်မရှင်နှင့် ကရင်နီအမျိုးသား ကာကွယ်ရေး တပ် KNDFတို့ တိုက်ပွဲပြင်းထန်စွာ ဖြစ်ပွားခဲ့ကြပြီး ကရင်နီပြည်မှ စစ်ရှောင်များ ထောင်ချီ ထွက်ပြေးခဲ့ရသည်။
ထိုမိုးဗြဲ၊ ဖယ်ခုံနှင့် ဒီမောဆို့ဘက်ခြမ်းမှ စစ်ရှောင်များသည့် တောင်ကြီးမြို့နယ်အတွင်း လာရောက်ခိုလှုံနေရသည်။
ထို စစ်ရှောင်များကို စစ်ကော်မရှင်တပ်က နေရပ်ပြန်လာရန် ဖိအားပေးနေပြီး နေရပ်မပြန်လျှင် အိမ်နှင့်ခြံများ တပ်ပိုင်မြေအဖြစ် သိမ်းဆည်းမည်ဟု ခြိမ်းခြောက်သောကြောင့် နေရပ်ပြန်နေသူများရှိကြောင်း တောင်ကြီးရောက် စစ်ရှောင်များက ပြောသည်။
“နေရပ်ပြန်လာကြဖို့ အတင်းဖိအားပေးတယ်၊ ပြန်သွားရင်လည်း လုံခြုံရေးက သူတို့မှ တာဝန်မယူပေးနိုင်တာ အိမ်တွေလည်း မရှိတော့ဘူး။ ပြန်သွားရင်လည်း ဘုန်းကြီးကျောင်းတို့ စာသင်ကျောင်းတို့မှာပဲ နေခိုင်းတယ်၊ အိမ်ခြံမြေတွေ သိမ်းမှာ ကြောက်လို့သာ ပြန်ကြတာ အဆင်မပြေဘူး၊”ဟု စစ်ရှောင်အမျိုးသမီးတစ်ဦးက ပြောသည်။
စစ်ရှောင်များ နေရပ်ပြန်လျှင် မြေမြှုပ်မိုင်း အန္တရာယ်စိုးရိမ်နေရပြီး စစ်ကော်မရှင်တပ်က ဦးဆောင်၍ ရှင်းလင်းပေးမှုများ မလုပ်ပေးသောကြောင့် တချို့သော စစ်ရှောင်များ နေရပ်မပြန်ရဲသေးကြောင်း ၎င်းအမျိုးသမီးက ပြောသည်။
တောင်ကြီးမြို့နယ်တွင် လာရောက်စစ်ရှောင်နေကြသော စစ်ရှောင်များသည် အလုပ်ကိုင်အခွင့်လမ်းရှားပါးခြင်းနှင့် အိမ်ငှားခဈေးကြီးသောကြောင့် အခက်ခဲများနှင့် ကြုံတွေ့နေရကြောင်းလည်း အသက် ၅၀ အရွယ်ရှိ စစ်ရှောင် အမျိုးသားတစ်ဦးက သျှမ်းသံတော်ဆင့်ကိုပြောသည်။
“အလုပ်ကလည်း ကြုံရာကျပန်းလုပ်ရတယ်၊ လုပ်ခက မြို့ပေါ်လူတွေရဲ့ တစ်ဝက်ပဲ ရတယ်၊ တခြားသူ နှစ်သောင်းကျပ်ဆို ကျနော်တို့ စစ်ရှောင်ကိုဆို တစ်သောင်းကျပ်ပဲ ပေးတယ်၊ အိမ်မပြန်ရတာ လေးနှစ်ရှိပြီ ပြန်ချင်တာပေါ့ ပြန်လို့ အဆင်မပြေသေးလို့ နေရတာ၊ အိမ်ငှားခက အနည်းဆုံး ငါးသိန်းကျပ်ရှိတယ်၊စားဖို့ နေဖို့ ရုန်းကန်နေရတာပေါ့။”ဟု ၎င်းကဆိုသည်။
စစ်ကော်မရှင်တပ်က စစ်ရှောင်များကို အတင်းအဓမ္မ နေရပ်ပြန်ခိုင်းခြင်းသည် လူသားဒိုင်းအဖြစ်အသုံးချလိုခြင်း၊ တဖက်တွင်လည်း နယ်မြေအေးချမ်းသည်ပုံကိုဖော်ပြလိုခြင်းဖြစ်ကြောင်း စစ်ရှောင်များက ထင်မြင်ချက်အနေဖြင့်ပြောသည်။
ပြီးခဲ့သည့် ၂၀၂၄ ခုနှစ်တွင်လည်း စစ်ကော်မရှင်တပ်က လွိုင်ကော်မြို့နှင့် ဘော်လခဲမြို့ မှ စစ်ရှောင်များကို နေရပ်ပြန်ရန် ဖိအားပေးသောကြောင့် စစ်ရှောင်အချို့ ပြန်နေထိုင်ခဲ့ရသည်။
Leave a Comments