သျှမ်းပြည်တောင်ပိုင်း၊ နမ့်စန်မြို့နယ်တွင် အီလက်ထရောနစ်မဲပေးစက် MEVM ဆိုင်ရာ အသိပညာပေး လုပ်ဆောင်ခဲ့သော်လည်း ပြည်သူများက အဆိုပါ မဲပေးစက်အပေါ် ယုံကြည်မှု နည်းပါးကြကြောင်း သတင်းရရှိသည်။

ပြီးခဲ့သည့် စက်တင်ဘာလ ၁၄ ရက်တွင် နမ့်စန်မြို့ပေါ်နှင့် ပိုင်းဆည်ကျေးရွာအုပ်စု ဈေးကုန်းကျေးရွာတွင် မြို့နယ်ရွေးကောက်ပွဲကော်မရှင်အဖွဲ့ခွဲမှ ဦးဆောင်ပြီး အီလက်ထရောနစ် မဲပေးစက် အသုံးပြုနည်းကို လက်တွေ့လုပ်ဆောင် ပြသခဲ့ပြီး လာရောက်နားထောင်သူ နည်းပါးကာ ထိုစက်အပေါ်လည်း ယုံကြည်မှု နည်းပါးကြကြောင်း ဒေသခံများက ပြောသည်။

“နမ့်စန်မြို့ထဲတော့ တစ်ခါလုပ်ပြီးပြီ၊ မြို့ထဲတော့ လူနည်းတယ်။ ရွာတွေမှာတော့ နေ့တိုင်းကွင်းဆင်းနေတာပဲ။ မဲနဲ့ ပတ်သက်ပြီး အသိပညာပေးတာ အီလက်ထရောနစ်စက်ကို အသုံးပြု မဲပေးတတ်အောင် လာသင်ပေးတဲ့ သဘောပေါ့။ စက်က လုံခြုံမှုကော ရှိရဲ့လားမသိ၊ နောက်ပြီး စက်က အော်တိုလည်းမဟုတ် ကြည့်ပေးမဲ့သူ ရှိမှပဲ ပေးရတာ။ တစ်ခုခုမှားရင် ဘာသက်သေမှ မကျန်ခဲ့ဘူး၊ ပြန်ကြည့်လို့လည်း မရဘူး”ဟု နမ့်စန်ဒေသခံ အသက် ၅၀ အရွယ် အမျိုးသမီးတစ်ဦးက ပြောသည်။

စစ်ကော်မရှင်လက်အောက်ခံ ပြည်ထောင်စုရွေးကောက်ပွဲကော်မရှင် UEC မှ လာမည့် ဒီဇင်ဘာလ (၂၈) ရက်တွင် ရွေးကောက်ပွဲ အပိုင်း(၁)ကို စတင်ကျင်းပသွားမည်ဟု ကြေညာထားပြီး တိုင်းနှင့် ပြည်နယ်အလိုက် (၁၀၂)မြို့နယ် စာရင်းထုတ်ပြန်ခဲ့ရာ ထိုထဲတွင် သျှမ်းပြည်မှ (၁၂)မြို့နယ် ပါဝင်သည်။

ထိုသျှမ်းပြည် (၁၂)မြို့ထဲမှ နမ့်စန်မြို့နယ်လည်း ပါဝင်ပြီး နမ့်စန်မြို့ပေါ်နှင့် အနီးပတ်ဝန်းကျင်တွင် စစ်ကော်မရှင်တပ်များနှင့် ၎င်းတို့၏ လက်အောက်ခံ ပြည်သူ့စစ်တပ်များဖြစ်သည့် ပန်လျန်း ပြည်သူ့စစ်၊ မတ်ကျန်း ပြည်သူ့စစ်၊ နားရိုင်း ပြည်သူ့စစ်နှင့် SSS ပြည်သူ့စစ်တို့ ရှိကြပြီး ရွေးကောက်ပွဲကျင်းပသည့် အကြိမ်တိုင်း ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက နမ့်စန်မြို့တွင် အနိုင်ရရှိခဲ့သည်။

“နမ့်စန်မြို့က စစ်တပ်တွေ ပြည်သူ့စစ်တွေနဲ့ ဝိုင်းထားတဲ့မြို့လေ၊ ကြံ့ခိုင်ရေးပါတီပဲ အမြဲတမ်း နိုင်လာခဲ့တာ။ ပြည်သူ့စစ်အားကိုးနဲ့ တပ်ထောက်ခံ အားပေးတဲ့သူတွေကိုက များနေလို့ ထင်တယ်” ဟု နမ့်စန်မြို့ ဒေသခံ အသက် ၃၀ ဝန်းကျင် အမျိုးသမီးက ဆိုသည်။

အလားတူ ပင်လောင်းမြို့နယ်တွင်လည်း စစ်ကော်မရှင်၏ ရွေးကောက်ပွဲအတွက် အီလက်ထရောနစ် မဲပေးစက်ကို အသုံးပြုတတ်စေရန် စစ်ကော်မရှင်လက်အောက်ခံ မြို့နယ်ရွေးကောက်ပွဲ ကော်မရှင်အဖွဲ့ခွဲမှ ဒေသခံများကို ကွင်းဆင်းပြသကာ စမ်းသပ်လုပ်ဆောင်စေခဲ့ကြောင်း သိရသည်။

“ဒီလအစမှာ မြို့ထဲက အားကစားရုံမှာ မဲပေးတာနဲ့ ပတ်သက်ပြီး လာပြောသွားတယ်၊ သွားနားထောင်တဲ့သူတော့ ရှိတယ်။ ဒီနှစ်က မဲပေးရမယ်ဆို ပါတီတွေကို တစ်ခုမှ မကြိုက်ဘူး၊ ရွေးချယ်ဖို့လည်း မရှိဘူး။ နိုင်ငံရေးကလည်း မဲပေးလည်း ဘာမှ ပိုကောင်းလာမှာလည်း မဟုတ်ဘူး။ ဘာမျှော်လင့်ချက်မှလည်း မရှိဘူး၊ ပိုဆိုးသွားဖို့ပဲ ရှိမယ်”ဟု ပင်လောင်းဒေသခံ အသက် ၄၀ ကျော် အမျိုးသား တစ်ဦးက ပြောသည်။

Myanmar Electronic Voting Machine (MEVM) ဆိုသည်မှာ စစ်ကော်မရှင်လက်အောက်ခံ UEC တီထွင်ထားသည့် မြန်မာ့နည်း မြန်မာ့ဟန် အီလက်ထရောနစ် မဲပေးစက်ဖြစ်ပြီး ရွေးကောက်ပွဲတွင် မဲဆန္ဒရှင်များ၏ အမည်၊ ပါတီ နံပါတ်များကို ထည့်သွင်းထားပြီး စက်ပေါ်မှ ခလုတ်ကို အသုံးပြု၍ မိမိမဲထည့်လိုသည့် ပါတီကို ထိုခလုတ်ဖြင့် ရွေးချယ်နိုင်သည့် နည်းပညာဖြစ်ကြောင်း ဆိုသည်။

ရွေးကောက်ပွဲတွင် ဆန္ဒမဲပေးခြင်း ပြီးမြောက်သည့်အခါ ထိုစက်က မဲရလဒ်များကို အလိုအလျောက် တစ်ခုတည်း စုစည်း၍ ရမှတ်များကို ထုတ်ပြန်ပေးနိုင်ပြီး USB သို့မဟုတ် SD ကဒ်ထဲတွင်လည်း သိမ်းထားနိုင်ကြောင်း သိရသည်။

ယခုလက်ရှိ စစ်ကော်မရှင်၏ ရွေးကောက်ပွဲ အပိုင်း(၁)တွင် ပါဝင်သည့် မြို့နယ်များတွင် ထိုအီလက်ထရောနစ် မဲပေးစက်ဖြင့် မဲပေးခြင်း နည်းပညာများကို စစ်ကော်မရှင်နှင့် ရွေးကောက်ပွဲပါတီဝင်များက လိုက်လံအသိပညာပေးနေပြီး လက်တွေ့လုပ်ဆောင်တတ်စေရန် ညွှန်ကြားနေကြောင်း သိရသည်။